ཐའེ་ལྦན་གྱི་སྲིད་འཛིན་ཟུར་པ་ཁྲེང་ལ་ཚེ་བཙོན་ཉེས་ཁྲིམས།

༄༅༎ཐའེ་ལྦན་གྱི་སྲིད་འཛིན་ཟུར་པ་ཁྲེང་ཧྲོའོ་བེན་གྱིས་སྲིད་དབང་འཛིན་པའི་རིང་དཔལ་འབྱོར་ལྐོག་ཟའི་གནད་དོན་གྱིས་དེང་སྐབས་ཁྲིམས་བཤེར་བྱེད་བཞིན་པ་ལྟར་ད་རེས་གཟའ་པ་སངས་ཉིན་ཐའེ་ལྦན་གྱི་ཐའེ་ཕེ་ས་གནས་ཁྲིམས་ཁང་གིས་སྲིད་འཛིན་ཟུར་པ་ཁྲེང་ཧྲོའོ་བེན་ལ་ཚེ་བཙོན་གྱི་ཁྲིམས་ཐག་ཉེས་ཆད་བཏང་ཡོད་པ་དང་དུས་གཅིག་ཏུ་ཐའེ་ལྦན་གྱི་དངུལ་ས་ཡ་གཉིས་བརྒྱ་སྤྲོད་རྒྱུའི་དཔལ་འབྱོར་ཉེས་ཆད་བཅད་ཡོད་པ་རེད། དེ་ནི་འདས་པའི་ནང་ཐའེ་ལྦན་གྱི་ལོ་རྒྱུས་ཐོག་སྲིད་འཛིན་ཟུར་པར་དཔལ་འབྱོར་ལྐོག་ཟའི་གྱོད་དོན་ཐོག་ནས་ཚེ་བཙོན་གྱི་ཁྲིམས་ཐག་ཉེས་ཆད་བཏང་བ་ཐོག་མ་དེ་ཆགས་ཀྱི་ཡོད་པ་དང་སྲིད་འཛིན་ཟུར་པ་ཁྲེང་ཧྲོའོ་བེན་གྱི་ལྕམ་ལྦུའུ་ཧྲུའུ་ཀྲན་ལ་ཡང་ལུས་པོའི་གནས་སྟངས་མི་བདེ་བའི་དཀའ་ངལ་ཡོད་མིན་ལ་མ་ལྟོས་པར་ཚེ་བཙོན་གྱི་ཁྲིམས་ཐག་བཅད་ཡོད་པ་རེད། ཐའེ་ཕེ་ས་གནས་ཁྲིམས་ཁང་གི་མགྲིན་ཚབ་པས་ད་རེས་ཐའེ་ཕེ་ཁྲིམས་ཁང་གིས་ཐའེ་ལྦན་གྱི་སྲིད་འཛིན་ཟུར་པ་ཁྲེང་ཧྲོའི་བེན་ལ་ཚེ་བཙོན་གྱི་ཁྲིམས་ཐག་ཉེས་ཆད་བཏང་བའི་གནད་དོན་ཐོག་འགྲེལ་བཤད་བརྒྱབ་པའི་སྐབས་ཁྲེང་ཧྲོའི་བེན་ལ་ཁྲིམས་ཐག་ཉེས་ཆད་ཆེན་པོ་དེ་འདྲ་གཏོང་དགོས་དོན་ནི་ཁོང་གིས་རང་ཉིད་ཀྱི་དབང་ཆ་དང་རྒྱབ་ལྗོངས་ཀྱི་དབང་ཤུགས་བེད་སྤྱད་ནས་རྒྱལ་ཁབ་ཀྱི་མཚན་སྙན་མེད་པ་བཟོས་པར་བརྟེན་ནས་ཡིན་ལུགས་གསལ་བཤད་བྱས་ཡོད་འདུག དེ་དང་ཆབས་ཅིག་ཐའེ་ལྦན་གྱི་སྲིད་འཛིན་ཟུར་པ་ཁྲེང་ཧྲོའོ་བེན་ལ་རྒྱབ་སྐྱོར་བྱེད་མཁན་མི་གྲངས་བརྒྱ་ཕྲག་ཁ་ཤས་ཀྱིས་ཁྲིམས་ཁང་མདུན་ཁྲེང་ཧྲོའི་བེན་ཉེས་མེད་ཡིན་པ་དང་ཁོང་འཕྲལ་དུ་གློད་བཀྲོལ་དགོས་པའི་ངོ་རྒོལ་སྐད་འབོད་བྱས་ཡོད་འདུག སྲིད་འཛིན་ཟུར་པ་ཁྲེང་ཧྲོའོ་བེན་གྱི་མགྲིན་ཚབ་པ་གྲང་ཧྲེ་མིན་གྱིས་ཁྲིམས་ཐག་དེ་ནི་རྩ་བ་ནས་ཁས་ལེན་བྱེད་ཐབས་མེད་པ་དང་ཁྲིམས་ཐག་མ་གཅོད་སྔོན་ཁྲིམས་ཞིབ་བྱེད་པའི་སྐབས་ཁྲིམས་ལུགས་དང་མི་མཐུན་པའི་བྱ་སྤྱོད་ཁྲིམས་ཞིབ་བྱེད་པའི་རིང་ཁྲིམས་དཔོན་བརྗེ་པོ་བརྒྱབས་པ་སོགས་བྱས་ཡོད་པར་བརྟེན་ཁྲིམས་ཐག་དེ་ནི་ཁྲིམས་ལུགས་ཀྱི་འགྲོ་སྟངས་དང་མི་མཐུན་པའི་ཐོག་ནས་སྲིད་དོན་གྱི་གནོན་ཤུགས་འོག་བཅད་པ་ཞིག་ཡིན་པས་ང་ཚོས་ཁས་ལེན་རྩ་བ་ནས་བྱེད་ཐབས་མེད་ཅེས་གསུངས་བ་དང་འབྲེལ་མུ་མཐུད་ནས་ཆེས་མཐོའི་ཁྲིམས་ཁང་དུ་ཁྲིམས་རྩོད་བྱ་རྒྱུ་ཡིན་པ་གསུངས་བཞག ད་རེས་ཐའེ་ཕེ་ས་གནས་ཁྲིམས་ཁང་ནས་ཐའེ་ལྦན་གྱི་སྲིད་འཛིན་ཟུར་པ་ཁྲེང་ཧྲོའོ་བེན་ལ་ཚེ་བཙོན་གྱི་ཁྲིམས་ཐག་བཅད་པ་དེའི་ཐོག་གཞུང་འཛིན་གོ་མིན་ཏང་ཚོགས་པའི་ངོས་ནས་ཁྲིམས་ལུགས་ལ་སྲུང་བརྩི་ཞུ་རྒྱུ་ཡིན་ལུགས་འགྲེལ་བརྗོད་བྱས་ཡོད་པ་དང་ཐའེ་ལྦན་གྱི་སྲིད་འཛིན་ཟུར་པ་ཁྲེང་ཧྲོའོ་བེན་གྱི་གྱོད་དོན་དེ་མགྱོགས་ཤོས་ལ་ཡང་གཟའ་འཁོར་རྗེས་མ་ཐའེ་ལྦན་གྱི་ཆེས་མཐོའི་ཁྲིམས་ཁང་དུ་བསྐྱལ་རྒྱུ་ཡིན་པ་རེད།