ཉིས་སྟོང་དགུ་ལོའི་བོད་ཀྱི་བུད་མེད་མཛངས་མའི་འགྲན་བསྡུར།

༄༅༎ཕྱི་ལོ་ཉིས་སྟོང་དགུ་ལོའི་བོད་ཀྱི་བུད་མེད་མཛངས་མའི་འགྲན་བསྡུར་ནང་རྒྱ་གར་གྱི་ས་གནས་ཁག་བཞི་ནས་བུད་མེད་བཞི་མཉམ་ཞུགས་བྱས་ཡོད་པ་དང་མཛངས་མའི་འགྲན་བསྡུར་དེ་ཕྱི་ཟླ་དྲུག་པའི་ཚེས་ལྔ་ཉིན་འགོ་བཙུགས་ཀྱིས་ཉིན་གསུམ་རིང་འགྲན་བསྡུར་བྱེད་འཆར་ཡོད་པ་རེད།

ཐེངས་འདིའི་མཛངས་མའི་འགྲན་བསྡུར་ནང་རྒྱ་གར་བྱང་ཕྱོགས་ལྡེ་ར་ལྡུན་ནས་ཡིན་པའི་ལོ་ན་ཉི་ཤུ་རྩ་བཞི་ཡིན་པ་སྒྲོལ་དཀར་ལགས་དང་ལོ་བཅོ་བརྒྱད་ཡིན་པ་རྡོ་རྗེ་གླིང་ནས་ངག་དབང་ཆོས་དབྱིངས་ལགས།ལོ་ཉི་ཤུ་ཡིན་པ་བཞུགས་སྒར་རྡ་རམ་ས་ལ་ནས་བསྟན་འཛིན་ཆོས་འཛིན་ལགས།བཞུགས་སྒར་རྡ་རམ་ས་ལའི་ཉེ་འཁྲིས་སུ་ཆགས་པའི་སྦིར་གཞིས་ཆགས་ནས་ལོ་ཉི་ཤུ་རྩ་བཞི་ཡིན་པ་ཡེ་ཤེས་ལྷ་མོ་ལགས་བཅས་ཡིན་ཞིང་བོད་ཀྱི་བུད་མེད་མཛངས་མའི་འགྲན་བསྡུར་དེ་ནི་བཙན་བྱོལ་ནང་དུ་འཚར་ལོངས་བྱུང་བའི་གཞོན་སྐྱེས་བློ་བཟང་དབང་རྒྱལ་ལགས་ཀྱིས་ཕྱི་ལོ་ཉིས་སྟོང་གཉིས་ནས་འགོ་བཙུགས་གནང་བ་ཞིག་ཡིན་ཞིང་ད་བར་མི་ལོ་བདུན་རིང་མཛངས་མའི་འགྲན་བསྡུར་གྱི་འགྲོ་གྲོན་རྣམས་གོ་སྒྲིག་གནང་མཁན་རང་ངོས་ནས་ཐབས་འཚོལ་གནང་བ་དང་ཡིན་ནའང་འདི་ལོའི་མཛངས་མའི་འགྲན་བསྡུར་གྱི་འགྲོ་གྲོན་རྣམས་རྒྱ་གར་གྱི་སྐད་གྲགས་ཅན་གྱི་ཚོང་ལས་ཁང་ཞིག་གིས་དཔལ་འབྱོར་གྱི་རོགས་རམ་བྱས་ཡོད་པ་རེད། མཛངས་མའི་འགྲན་བསྡུར་དངོས་གཞི་ཉིན་གསུམ་གྱི་འགྲན་བསྡུར་མ་བྱས་སྔོན་ལ་གཟའ་འཁོར་གཅིག་རིང་ལུས་སྦྱོང་ཡོ་ག་དང་སྒྱུ་རྩལ།རྣམ་སྤྱོད།བོད་ཀྱི་རྒྱལ་རབས་ལོ་རྒྱུས།སྐད་ཡིག།འགྲོ་བ་མིའི་ཐོབ་ཐང་སྐོར།བོད་ནང་གི་གནས་སྟངས་སོགས་རྣམ་གྲངས་མི་འདྲ་ཁག་ཅིག་གཟབ་སྦྱོང་སྤྲད་དེ་དངོས་གཞིའི་འགྲན་བསྡུར་སྐབས་གཟབ་སྦྱོང་སྤྲད་པ་དེ་དག་མི་དམངས་འདུ་འཛོམས་ཀྱི་སྡིང་ཆའི་སྟེང་དངོས་སུ་བཏོན་ཏེ་མཛངས་མའི་རྒྱལ་ཁ་ཐོབ་མཁན་ལ་ཕྱི་ཚེས་བདུན་ཉིན་མཛད་སྒོ་ཚོགས་ཏེ་རྒྱ་གར་གྱི་སྒོར་མོ་སྟོང་ཕྲག་བརྒྱ་ཐམ་པའི་བྱ་དགའ་སྤྲོད་རྒྱུ་ཡིན་པ་རེད།