བཟོ་ལས་ཡར་ཐོན་ཅན་གྱི་རྒྱལ་ཁབ་ཀྱི་ཚོཌ་འདུ།

༄༅༎བཟོ་ལས་ཡར་ཐོན་ཅན་གྱི་རྒྱལ་ཁབ་བདུན་དང་ ར་ཤི་ཡ་བཅས་རྒྱལ་ཁབ་བརྒྱད་ཀྱི་ལྷན་ཚོགས་དེ་བཞིན་ ཕ་རན་སིའི་ནང་ཚོགས་བཞིན་ཡིན་པ་དང་ གཟའ་པ་སངས་ཉིན་རྒྱལ་ཁབ་བརྒྱད་ཀྱི་དཔོན་རིགས་ཚོས་ཚོགས་འདུའི་ཐོག་སི་རི་ཡ་གཞུང་གིས་མི་མང་གི་ཞི་བའི་ངོ་རྒོལ་ལ་དྲག་གནོན་བྱས་ནས་མང་ཚོགས་མང་པོ་རྐྱེན་འདས་སུ་བཏང་བའི་གནད་དོན་བཏོན་ནས་སི་རི་ཡ་གཞུང་གིས་འཕྲལ་དུ་མཚོན་ཆ་བེད་སྤྱོད་བྱས་ཏེ་མི་མང་ལ་དྲག་གནོན་བྱ་རྒྱུ་མཚམས་འཇོག་དགོས་པའི་དགོས་འདུན་བཏོན་རྒྱུ་ཡིན་པ་གསུང་འདུག ཡིན་ནའི་བཟོ་ལས་ཡར་ཐོན་ཅན་གྱི་ནུབ་ཕྱོགས་རྒྱལ་ཁབ་བདུན་གྱིས་འཛམ་གླིང་མཉམ་འབྲེལ་རྒྱལ་ཚོགས་སུ་སེ་རི་ཡ་ལ་ཉེས་ཆད་འཕར་མ་འགེལ་རྒྱུའི་གྲོས་འཆར་ལ་ར་ཤི་ཡས་དགག་བྱ་བྱེད་སྲིད་པ་རེད་ 

ར་ཤི་ཡ་དང་སི་རི་ཡ་ཡུལ་གཉིས་དུས་ཡུན་རིང་པོའི་མཐུན་ཕྱོགས་རྒྱལ་ཁབ་ཀྱི་འབྲེལ་ལམ་ཡོད་པ་དང་ དེར་བརྟེན་འཛམ་གླིང་མཉམ་འབྲེལ་རྒྱལ་ཚོགས་ཀྱི་བདེ་འཇགས་ལས་འཛིན་ལྷན་ཚོགས་སུ་གྲོས་གཞི་དེའི་ཐོག་གྲོས་ཐག་གཅོད་རྒྱུར་ར་ཤི་ཡ་དང་རྒྱ་ནག་གཉིས་ཀྱིས་ངོ་རྒོལ་གྱི་འོས་ཤོག་དབྱུགས་ཏེ་གྲོས་གཞིར་གྲོས་ཐག་ཆོད་མི་ཐུབ་པའི་གནས་སྟངས་ཡོང་རྒྱུའི་ཚོད་རྩིས་ཡོད་པའི་སྐོར་བཟོ་ལས་ཡར་ཐོན་ཡུལ་ཁག་གི་དཔོན་རིགས་ནས་གསུང་འདུག བཟོ་ལས་ཡར་ཐོན་ཅན་གྱི་ཡུལ་ཁག་གི་དཔོན་རིགས་ནས་མུ་མཐུད་གསུང་ན་ ང་ཚོས་གྲོས་གཞི་དེའི་ནང་ སི་རི་ཡའི་དཔོན་རིགས་ཀྱིས་མང་ཚོགས་ཐོག་དྲག་གནོན་བྱ་རྒྱུ་འཕྲལ་དུ་མཚམས་འཇོག་བྱས་ནས་ མི་མང་ཚོས་བཏོན་པའི་ཡུལ་ནང་གསར་འགོད་རང་དབང་དང་ སྤྱི་འབངས་ཀྱི་ཐོབ་ཐང་ལ་སྲུང་བརྩི་ཞུ་དགོས་པའི་དགོས་འདུན་ལ་ཁས་ལེན་བྱ་དགོས་པ་མ་ཟད་ སི་ར་ཡ་གཞུང་གིས་བཙོན་འཇུག་བྱེད་བཞིན་པའི་ཆབ་སྲིད་བཙོན་པ་ཡོངས་རྫོགས་གློད་བཀྲོལ་གཏོང་དགོས་པའི་སྐོར་སོགས་འཁོད་ཡོད་པ་གསུང་འདུག