ཚེས་༣ཉིན་བལ་ཡུལ་ལ་ངོ་རྒོལ་བྱ་རྒྱུ།

༄༅༎འདི་ལོའི་ཕྱི་ཟླ་གཉིས་པའི་ནང་བལ་ཡུལ་གྱི་རྒྱལ་ས་ཀཐ་མན་གྲུའི་མཆོད་རྟེན་བྱ་རུང་ཁ་ཤོར་གྱི་སྐོར་ལམ་དུ་རང་ལུས་མེར་བསྲེག་བཏང་ནས་འདས་གྲོངས་སུ་གྱུུར་བའི་གྲུབ་ཆེན་ཚེ་རིང་ལགས་ཀྱི་སྐུ་ཕུང་བོད་མིར་རྩིས་སྤྲོད་ཡོང་ཆེད། རྒྱལ་སྤྱིའི་ཁྱོན་ཡོངས་ནས་བལ་ཡུལ་གཞུང་ལ་འབོད་སྐུལ་ཞུས་པ་དེ་དག་ལ་བརྩིས་མེད་ཀྱིས། བལ་ཡུལ་གཞུང་གིས་ཁོང་གི་སྐུ་ཕུང་གསང་བའི་ཐོག་ནས་ཞུགས་འབུལ་ཞུས་པར་བརྟེན། ཟླ་འདིའི་ཚེས་ ༣ ཉིན་བོད་རང་བཙན་སློབ་ཕྲུག་ཚོགས་པའི་གོ་སྒྲིག་འོག་འཛམ་གླིང་གི་ས་ཕྱོགས་གང་སར་སྨོན་ལམ་གསོག་སྒྲུབ་དང༌། རྒྱ་ནག་གཞུང་ཚབ་ལས་ཁང་མདུན་ངོ་རྒོལ་སྐད་འབོད། དེ་བཞིན་བལ་ཡུལ་གཞུང་ཚབ་ལས་ཁང་ལ་ངོ་རྒོལ་གྱི་ཞུ་གཏུགས་དང་ཁ་དཔར་གཏང་རྒྱུ་སོགས་ཀྱི་ལས་འགུལ་གཞི་རྒྱ་ཆེན་པོ་ཞིག་སྤེལ་འཆར་ཡོད་པ་རེད། འཛམ་གླིང་གི་ས་ཁུལ་གང་སར་ཡོད་པའི་བོད་མི་དང་བོད་དོན་རྒྱབ་སྐྱོར་བ་ཚོས་ལས་འགུལ་ནང་མཉམ་ཞུགས་གནང་རོགས་ཞེས་འབོད་སྐུལ་ཞུས་འདུག།