དམངས་གཙོའི་ལམ་ལུགས་ལ་འཇུག་དགོས་པའི་རེ་སྐུལ།

༄༅༎གལྥ་(Gulf)མཚོ་ཁུག་གི་དམངས་གཙོ་དོན་གཉེར་ཅན་ཚོས་མངའ་ཁུལ་དེའི་ནང་ལོ་ངོ་བརྒྱ་ཕྲག་མང་པོའི་རིང་དབང་བསྒྱུར་བྱེད་མཁན་གྱི་རྒྱལ་རྒྱུད་ཚོར་དམངས་གཙོའི་ལམ་ལ་འཇུག་དགོས་རྒྱུ་དང་མང་ཚོགས་ཀྱི་སྨྲ་བརྗོད་རང་དབང་ལ་གུས་བརྩི་ཞུ་དགོས་རྒྱུའི་རེ་སྐུལ་གནང་བཞག།

དེ་བཞིན་ཁོང་རྣམ་པས་Gulfམཚོ་ཁུག་རྒྱལ་ཁབ་ཀྱི་དབང་འཛིན་མི་སྣ་ ལྷག་པར་དུ་སྦེ་རའན་དང་སའོ་རྡི་ཨ་རེ་སྦི་ཡ་བཅས་ལ་ཡུལ་དེ་གཉིས་ནང་ཞི་བའི་ངོ་རྒོལ་གྱི་ལས་འགུལ་སྤེལ་རྒྱུའི་འཆར་འགོད་བྱེད་མཁན་ཐོག་དྲག་གནོན་གནང་རྒྱུ་མེད་པའི་ཉེན་བརྡ་བཏང་ཡོད་པ་མ་ཟད། ཡུ་ཨེ་ཨི་(United Arab Emirates)གྱིས་བདུན་སྔོན་མ་དམངས་གཙོ་དོན་གཉེར་བ་ཞིག་འཛིན་བཟུང་བྱས་ཡོད་པ་དེ་གློད་བཀྲོལ་གཏོང་དགོས་རྒྱུའི་འབོད་སྐུལ་ཡང་གནང་འདུག། Gulfསྤྱི་མང་ཚོགས་པའི་འབྲེལ་མཐུད་པ་ཨན་ལྦ་རལ་ར་ཤིརྡ་ཡིས་མིང་རྟགས་བཀོད་པའི་སྤྱི་བསྒྲགས་ནང༌། Gulfམཚོ་ཁུག་གི་རྒྱལ་ཁབ་ནང་དབང་བསྒྱུར་བྱེད་བཞིན་པའི་རྒྱལ་རྒྱུད་ཚོས་མང་ཚོགས་ཀྱི་མངོན་འདོད་རེ་བ་བཞིན་དམང་གཙོའི་བཅོས་སྒྱུར་གཏོང་རྒྱུ་དེ་གལ་ཆེ་ཡིན་པ་གསལ་པོ་མཁྱེན་རྟོགས་ཡོང་བའི་རེ་བ་བཏོན་གནང་འདུག། དེ་བཞིན་གོང་ཞུས་ཚོགས་པ་དེས་རྒྱལ་རྒྱུད་དབང་འཛིན་པ་ཚོར་ད་ཆ་ཆབ་སྲིད་ཀྱི་བཙོན་པ་ཡོངས་རྫོགས་གློད་བཀྲོལ་གཏོང་རྒྱུའི་དུས་ལ་སླེབས་ཡོད་པ་མ་ཟད། དེང་དུས་ཀྱི་དགོས་འདུན་དང་འཚམས་པའི་རྩ་ཁྲིམས་གསར་པ་གཏན་འབེབས་གནང་བའི་རེ་བ་མང་ཚོགས་ཀྱི་བྱེད་ཀྱི་ཡོད་པ་མཁྱེན་རྟོགས་ཐུབ་རྒྱུའི་རེ་སྐུལ་ཡང་གནང་བཞག།

གོང་ཞུས་Gulfསྤྱི་མང་ཚོགས་པའི་ནང་Gulfམཚོ་ཁུག་གི་རྒྱལ་ཁབ་མཉམ་མཐུན་ཚོགས་པའི་ཁྱབ་ཁོངས་རྒྱལ་ཁབ་དྲུག་ནང་གི་གུ་ཡངས་ལྟ་སྤྱོད་འཛིན་མཁན་མཁས་པ་དང་ཤེས་ལྡན་མི་སྣ། རྩོམ་པ་པོ་དང་ཐོབ་ཐང་རྩོད་ལེན་དོན་གཉེར་བ་བཅུ་ཕྲག་འགའ་ཤས་ཡོད་པ་རེད། རྒྱལ་ཁབ་དྲུག་པོ་དེ་རྣམས་ནི་སྦེ་རའན་ ཀུ་ལྦེཏ་ ཨོ་མའན་ ཁ་ཏའར་ སའོ་རྡི་ཨ་རེ་སྦི་ཡ་ ཡུ་ཨེ་ཨི་བཅས་ཡིན་པ་རེད།