ཧིན་སྒོར་འབུམ་ལྔའི་རོགས་སྐྱོར།

༄༅།    །ནང་སྲིད་བཀའ་བློན་རྒྱ་རི་སྒྲོལ་མ་མཆོག་གངས་སྐྱོན་བྱུང་ཡུལ་གྱི་བོད་མི་གནས་སྡོད་བྱ་ཡུལ་ས་གནས་ཁག་ཏུ་གཟིགས་ཞིབ་ཏུ་ཕེབས་ཐོན་གནང་བ་ལྟར། ཁ་སང་ཚེས་༧ ཉིན་ལ་དྭགས་ཁུལ་དུ་ཆགས་པའི་བསོད་ནམས་གླིང་བོད་མིའི་གཞིས་ཆགས་སུ་ཕེབས་འབྱོར་བྱུང་བ་དང༌།  ཚེས་༨ ནས་གཟིགས་ཞིབ་ཀྱི་ལས་དོན་འགོ་བཙུགས་གནང་སྟེ། དེ་ཉིན་ལ་དྭགས་རྒོད་ཡུལ་དང༌། བྱང་ཐང་བཀག་གཞུང་དུ་ཡོད་པའི་བོད་མི་རྣམས་ལ་གཟིགས་ཞིབ་གནང་ཡོད་པ་རེད།  ཐེངས་འདིར་ལ་དྭགས་བྱང་ཐང་ས་ཁུལ་དུ་གངས་སྐྱོན་ཤུགས་ཆེ་ཕོག་སྟེ་བོད་མི་འབྲོག་པ་རྣམས་ཀྱི་སྒོ་ཕྱུགས་ཧ་ཅང་མང་པོའི་ཚེ་སྲོག་ཤོར་བ་སོགས་ཀྱི་དཀའ་ངལ་འཕྲད་པ་དེར་ངལ་སེལ་རོགས་སྐྱོར་ཆེད་བོད་མིའི་སྒྲིག་འཛུགས་བཀའ་ཤག་གིས་ཧིན་སྒོར་འབུམ་ལྔ་གསོལ་རས་གནང་ཡོད་པ་རེད།    ༧གོང་ས་༧སྐྱབས་མགོན་ཆེན་པོ་མཆོག་ནས་ཀྱང་ད་རེས་ཀྱི་བྱུང་རྐྱེན་གྱི་ངལ་སེལ་ཆེད་དེ་སྔ་ཧིན་སྒོར་འབུམ་བཅུ་གསོལ་རས་བསྩལ་གནང་མཛད་ཡོད་པ་རེད།།