༸གོང་ས་མཆོག་གིས་བསོད་ནམས་གླིང་བོད་མིར་བཀའ་སློབ།

༄༅༎ཕྱི་ཟླ་ ༨ ཚེས་ ༣ ཉིན། ༸གོང་ས་༸སྐྱབས་མགོན་ཆེན་པོ་མཆོག་གིས་སླེ་ལྕོག་ལམ་སར་ནང་རྟེན་གཞི་བྱས་པའི་ལ་དྭགས་བོད་ཕྲུག་ཁྱིམ་སྡེའི་སློབ་གླིང་ཐང་ཆེན་དུ་དད་ལྡན་སེར་སྐྱ་མི་མང་དང་དགེ་ལས་སློབ་ཕྲུག་བཅས་ཁྱོན་མི་གྲངས་ ༧༠༠༠ བརྒལ་བར་བཀའ་སློབ་གནང་སྐབས། ང་ཚོ་ནི་ཆོས་རྒྱལ་མེས་དབོན་རྣམ་གསུམ་ཀྱི་སྐབས་བོད་གངས་ཅན་པ་ཞེས་ཆོས་སྲིད་གང་ཅིའི་ཐོག་ནས་དབུས་ཨེ་ཤི་ཡའི་ནང་སྟོབས་དང་ལྡན་པ་ཞིག་ཆགས་ཡོད་པ་དེའི་བརྒྱུད་པ་ཆགས་ཡོད་ཀྱང་། བར་སྐབས་བོད་སིལ་བུར་འཐོར་ཆིག་སྒྲིལ་གྱི་གོང་བུའི་ནུས་པ་ཉམས་པ་དང་། ཡུལ་ལུང་སོ་སོའི་ནང་གི་བླ༌དཔོན་རྣམས་ནས་སོ་སོའི་སྡེ་ཁོ་ན་ལས། བོད་སྤྱིའི་བདེ་དོན་ལ་བསམ་བློ་གཏོང་རྒྱུ་ཉུང་དྲགས་པ། གཅིག་འོག་གཅིག་ཏུ་མ་བསྡུས་པའི་ཐོག་ནས་སོ་སོའི་ཕ་མེས་ཀྱི་གཟི་བརྗིད་ལྡན་པ་དེ་དག་རིམ་བཞིན་བྱབ་བསྐྱལ་ནས། མཐར་ང་ཚོ་བཙན་བྱོལ་བ་ཆགས་ཡོད་པ་དང་། ཐབས་སྡུག་ཤོས་དེ་བོད་ནང་ཡོད་པའི་གཞིས་ལུས་རྒྱ་ཆེའི་མི་མང་གི་ཐ་ན་རང་ཉིད་ཀྱི་སྲོག་ཀྱང་ཧ་ལམ་རང་ཉིད་ལ་མ་དབང་བ་ལྟ་བུ་ཆགས་ཡོད་ཅེས་བཀའ་གནང་འདུག
དེ་བཞིན་༧གོང་ས་༧སྐྱབས་མགོན་ཆེན་པོ་མཆོག་ནས་བོད་རྒྱ་ནག་གིས་ཡོངས་སུ་བཙན་བཟུང་བྱས་ཏེ་དུས་འགྱུར་ཧ་ལས་པའི་ཆེན་པོ་བྱུང་བའི་རྐྱེན་ངན་གྲོགས་སུ་འགྱུར་བ་ལྟ་བུ་བྱུང་སྟེ་སླར་ཡང་བོད་མིའི་སྙིང་སྟོབས་འཕེལ་བ་དང༌། ཆོས་གསུམ་བོད་མི་ཡོངས་རྫོགས་ཀྱི་ཆིག་བསྒྲིལ་གྱི་ནུས་པ་ཧ་ལས་པའི་ཆེན་པོའི་ཐོག་གནས་ཏེ། རྒྱ་ནག་གཞུང་གིས་ཐབས་ཤེས་འཇམ་རྩུབ་སྣ་ཚོགས་གང་བྱས་ཀྱང་བོད་མིའི་སྙིང་སྟོབས་ཇེ་མཐོར་འགྲོ་བཞིན་ཡོད་པ་བཀའ་གནང་ཡོད་པ་རེད།།