༸གོང་ས་མཆོག་ནས་ཉི་ཧོང་དུ་མཛད་འཆར་སྐྱོང་གནང་བཞིན་པ།

༄༅༎ཉི་ཧོང་གི་གྲོས་ཚོགས་ནང་བོད་དོན་རྒྱབ་སྐྱོར་ཚོགས་པ་ཞིག་འཛུགས་རྒྱུ་དང་གོང་ས་མཆོག་གྲོས་ཚོགས་ནང་གདན་ཞུས་ཀྱིས་བཀའ་སློབ་བསྩལ་རྒྱུ་ཡིན་འདུག
བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཉི་ཧོང་ནང་མཛད་འཆར་སྐྱོང་བཞིན་པར་ཕྱི་ཚེས་༡༠ཉིན་གྲོང་ཁྱེར་ཨོ་ཁི་ན་ཝ་ཁུལ་དུ་ཞབས་སོར་འཁོད་གནང་མཛད་པ་དང་། ཕྱི་ཚེས་༡༡་ཉིན་ཨོ་ཁི་ན་ཝ་ཁུལ་དུ་འགྲེམས་སྟོན་ཁང་ཁག་ལ་གཟིགས་སྐོར་གནང་རྗེས། མང་ཚོགས་ལ་བཀའ་སློབ་བསྩལ་རྒྱུ་སོགས་ཀྱི་མཛད་རིམ་ཡོད་འདུག །དེ་ནས་ཕྱི་ཚེས་༡༢་ཉིན་སྔ་དྲོར། གསར་འགོད་པ་ཚོ་དང་ལྷན་དུ་དྲི་བ་དྲིས་ལན་གྱི་མཛད་འཆར་གྲུབ་མཚམས། སླར་ཉི་ཧོང་གི་རྒྱལ་ས་ཁྲོག་ཡོ་ལ་ཞབས་སོར་འཁོད་གནང་མཛད་རྒྱུ་དང་། ཕྱི་ཚེས་༡༣་ཉིན་རྒྱལ་ས་ཊོག་ཡོ་ན་གནའ་རབས་དང་དེང་དུས་ཀྱི་ཤེས་རབ་སྐོར་གྱི་བགྲོ་གླེང་ལྷན་ཚོགས་ཐོག་ཆིབས་བསྒྱུར་མཛད་འཆར་ཡོད་པ་མ་ཟད། ད་དུང་ཉི་ཧོང་གི་གྲོས་ཚོགས་སུ་གདན་ཞུས་ཀྱིས་བཀའ་སློབ་གནང་རྒྱུ་ཡིན་པའི་གནས་ཚུལ་ཞིག་ཀྱང་ཐོན་འདུག
དེང་སང་ཉི་ཧོང་དང་རྒྱ་ནག་བར་གླིང་ཕྲན་རྩོད་གླེང་གི་འགལ་ཟླ་ཡོད་མུས། ༸གོང་ས་མཆོག་གི་མཛད་རིམ་དེས་རྒྱ་ནག་དང་ཉི་ཧོང་བར་མི་དགའ་བར་ཆེ་རུ་ཕྱིན་ཡོད་པ་དང་། ད་དུང་ཉི་ཧོང་གི་བདེ་སྲུང་བློེན་ཆེན་གཞོན་པ་ཨ་ཀི་ཧི་ས་ ན་ག་ཤི་མ་དང་། ཨ་མི་རི་ཀའི་ཆེས་མཐོའི་དཔོན་རིགས་ཁག་གཅིག་བར་གཟའ་པ་སངས་ཉིན་མཇལ་འཕྲད་གནང་སྟེ། ཡུལ་གྲུ་གཉིས་པོ་དམག་དོན་ཐབས་བྱུས་ཀྱི་འབྲེལ་ལམ་གཟབ་ཏུ་གཏོང་རྒྱུར་མོས་མཐུན་བྱུང་ཡོད་པ་དེས་ཀྱང་། རྒྱ་ནག་གཞུང་མི་དགའ་བ་ཆེན་པོ་གྱུར་ཡོད་འདུག།