འབྲས་ལྗོངས་སུ་ཆིབས་བསྒྱུར་བསྐྱང་རྒྱུ།

༄༅༎བོད་ཀྱི་བླ་ན་མེད་པའི་དབུ་འཁྲིད་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་རྒྱ་གར་བྱང་ཤར་འབྲས་ལྗོངས་མངའ་སྡེའི་གཞུང་གིས་ཇི་ལྟར་གདན་ཞུ་གསོལ་འདེབས་ཞུས་དོན་ལྟར་འབྲས་ལྗོངས་ཁུལ་དུ་ཟླ་བ་འདིའི་ཟླ་མཇུག་ཏུ་ཆིབས་བསྒྱུར་བསྐྱང་གནང་མཛད་གཏན་འཁེལ་འདུག།
༧གོང་ས་༧སྐྱབས་མགོན་ཆེན་པོ་མཆོག་ཕྱི་ཟླ་ ༣ ཚེས་ ༢༤ ནས་ཉིན་གྲངས་དྲུག་རིང་འབྲས་ལྗོངས་ཁུལ་གྱི་ར་བང་ལྭ་ཁུལ་དང། དེ་རྗེས་རྒྱ་གར་གྱི་མངའ་སྡེ་ནུབ་སྦེང་གལ་གྱི་ས་གནས་ས་ལུ་ག་ར་བཅས་སུ་ཞབས་སོར་བཀྲིན་ཆེ་གནང་གིས་ཆོས་འབྲེལ་གསུང་ཆོས་ཀྱི་མཛད་འཕྲིན་བསྐྱང་མཛད་རྒྱུ་ཡིན་འདུག།
ར་བང་ལྭར་བོད་མི་གང་ཙམ་གནས་སྡོད་བྱེད་བཞིན་ཡོད་ལ། ས་ཁུལ་དེའི་ནང་འབྲས་ལྗོངས་མངའ་སྡེའི་གཞུང་གིས་སྟོན་པའི་སྐུ་བརྙན་ཆེན་པོ་ཞིག་གསར་བཞེངས་གནང་ཡོད་པ་དེར། ༧གོང་ས་༧སྐྱབས་མགོན་ཆེན་པོ་མཆོག་ནས་དབུ་འབྱེད་རབ་གནས་བསྩལ་གནང་མཛད་རྒྱུ་ཡིན་འདུག་ཅིང། སྐབས་དེར་མངའ་སྡེའི་སྲིད་སྐྱོང་དང་སྤྱི་ཁྱབ་བློན་ཆེན་སོགས་ཀྱང་ཆེད་བཅར་ཞུ་རྒྱུ་ཡིན་འདུག།  དེ་བཞིན་༧གོང་ས་སྐྱབས་མགོན་ཆེན་པོ་མཆོག་ནས་ས་གནས་དེའི་ནང་ཆོས་འབྲེལ་གསུང་ཆོས་དང་མང་ཚོགས་ལ་ཚེ་དབང་བསྩལ་གནང་མཛད་རྒྱུ་ཡིན་འདུག་ཅིང། ཕྱི་ཚེས་ ༢༦ ཉིན་ར་བང་ལྭ་ནས་འབྲས་ལྗོངས་ཀྱི་རྒྱལ་ས་སྒང་ཏོག་ཁུལ་ཆིབས་ཞལ་བསྒྱུར་གནང་གིས་མཐོ་རིམ་སློབ་གྲྭ་ཁག་གི་སློབ་མ་ཚོར་ཤེས་རིག་དང་འབྲེལ་བའི་བླང་དོར་བཀའ་སློབ་བསྩལ་གནང་མཛད་རྒྱུ་ཡིན་འདུག།
ཕྱི་ཚེས་ ༢༧ ཉིན་འབྲས་ལྗོངས་ནས་ནུབ་སྦེང་གལ་གྱི་ས་གནས་ས་ལུ་ག་རར་སྲས་བརྒྱུད་གྲྭ་ཚང་དང་ཧི་མ་ལ་ཡའི་ཆོས་ཚོགས་ཐོུང་ནས་ཇི་ལྟར་གསོལ་འདེབས་ཞུས་དོན་ལྟར་མང་ཚོགས་ལ་འཇམ་མགོན་བླ་མ་ཙོང་ཁ་ཆེན་་པོས་མཛད་པའི་ལམ་རིམ་བསྡུས་དོན་དང། ཀུན་མཁྱེན་ཀློང་ཆེན་རབ་འབྱམས་པས་མཛད་པའི་སེམས་ཉིད་ངལ་གསོའི་སྒོ་ནས་ཆོས་འབྲེལ་གསུང་ཆོས་བསྩལ་གནང་མཛད་རྒྱུ་སོགས་ཀྱི་མཛད་འཆར་ཡོད་པ་རེད།།