སྒེར་པའི་སློབ་གྲྭའི་ནང་བཀའ་སློབ།

༄༅༎ཁ་ས་ཕྱི་ཚེས་ ༢༨ ཉིན་༧གོང་ས་༧སྐྱབས་མགོན་ཆེན་པོ་མཆོག་གིས་ཌལ་ཧོར་གཏན་སློབ་ཀྱི་ཉེ་འགྲམ་དུ་རྟེན་གཞི་བྱས་པའི་རྒྱ་གར་གྱི་སྒེར་པའི་སློབ་གྲྭ་Public Shool དུ་ཆིབས་སྒྱུར་བསྐྱངས་ཏེ་སློབ་གྲྭ་དེའི་སློབ་ཕྲུག་དང་ཉེ་འཁོར་ནས་ཆེད་བཅར་ཞུས་པའི་དགེ་ལས་སློབ་ཕྲུག་སྟོང་ཕྲག་བརྒལ་བར་སེམས་ཀྱི་སློབ་གསོའི་སྐོར་ལམ་སྟོན་བཀའ་སློབ་བསྩལ་གནང་མཛད་ཡོད་པ་དང༌། ཕྱི་ཚེས་ ༢༩ ཉིན། ༧གོང་ས་མཆོག་ནས་ཌལ་ཧོར་བོད་མིའི་གཏན་འཇགས་སློབ་གྲྭ་དབུ་བརྙེས་ནས་ལོ་ངོ་ལྔ་བཅུ་འཁོར་བའི་དུས་དྲན་སྲུང་བརྩིའི་མཛད་སྒོ་དང་། ས་གནས་སློབ་གྲྭ། དེ་བཞིན་ཁུལ་དེའི་ས་གནས་མི་མང་བཅས་ལ་བཀའ་སློབ་དང་། ལག་ལེན་སོ་བདུན་མའི་ཆོས་འབྲེལ་སོགས་ཀྱི་མཛད་འཕྲིན་ལེགས་པར་གྲུབ་སྟེ། བཞུགས་སྒར་དུ་༸ཞབས་སོར་འཁོད་གནང་སྐབས་རྡ་སའི་མི་མང་དང་དད་ལྡན་པ་རྣམས་ནས་གཞུང་ལམ་གཡས་གཡོན་དུ་ལག་ཏུ་མཇལ་དར་དང་བདུག་སྤོས་ཐོགས་ཏེ་ཕེབས་བསུ་དང་། ཕོ་བྲང་གི་རྒྱལ་སྒོའི་ནང་ཁྲིམས་ཞིབ་པ་གཞན་གཉིས་དང་། ལྷན་ཁང་ཁག་གཅིག་གི་བཀའ་བློན་རྣམ་པ་སོགས་ཀྱིས་ཕེབས་བསུ་གཟབ་རྒྱས་ཞུས་ཡོད་པ་རེད༎