༸གོང་ས་མཆོག་འཛམ་གླིང་གྲཌ་ཅན་མི་སྣའི་ཁོངས་མཚན་བཏོན།

༄༅༎ཨ་མི་རི་ཀའི་སྙན་གྲགས་ཆེ་བའི་ཀྲའེམ་དུས་དེབ་ཀྱིས་ཨ་མི་རི་ཀའི་སྲིད་འཛིན་སྦ་རཀ་ཨོ་སྦ་མ་དང་བོད་ཀྱི་ཆོས་སྲིད་གཉིས་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་འཛམ་གླིང་ནང་མིའི་མི་ཚེར་ཤུགས་རྐྱེན་སྤྲོད་ཐུབ་མཁན་གྱི་སྐྱེ་བོ་གྲགས་ཅན་བརྒྱའི་ཁོངས་མཚན་བཏོན་གནང་ཡོད་པ་རེད།

ཀྲའེམ་དུས་དེབ་ཀྱིས་ཕྱི་ལོ་ཉིས་སྟོང་བརྒྱད་ལོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་འཛམ་གླིང་གི་དབུ་ཁྲིད་དང་གསར་བརྗེ་པའི་མི་སྣ་གྲགས་ཅན་བརྒྱ་མཚན་གཞུང་གི་ཁོངས་བདམས་གནང་ཡོད་ཅིང་ཕྱོགས་མཚུངས་ཨེ་ཤེ་ཡའི་མངའ་ཁུལ་ལ་དཔར་བསྐྲུན་བྱེད་པའི་ཀྲའེམ་དུས་དེབ་ཀྱིས་ཕྱི་ལོ་ཉིས་སྟོང་དྲུག་ལོར་བོད་ཀྱི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་འདས་པའི་ལོ་ངོ་དྲུག་བཅུ་ནས་ཨེ་ཤེ་ཡའི་མངའ་ཁུལ་ནང་བྱུང་བའི་ཨེ་ཤེ་ཡའི་དཔའ་བོ་ལྔའི་ཁོངས་མཚན་འདོན་གྱིས་ཆེ་བསྟོད་ཞུས་ཡོད་པ་རེད།

ཀྲའེམ་དུས་དེབ་ཀྱི་འདི་ལོའི་འཛམ་གླིང་ནང་ཤུགས་རྐྱེན་གཏོང་ཐུབ་པའི་མི་སྣ་གྲགས་ཆེ་བ་བརྒྱ་མཚན་གཞུང་གི་ནང་ཨ་མི་རི་ཀའི་སྲིད་འཛིན་སྦ་རཀ་ཨོ་སྦ་མ་མཆོག་ཨང་གྲགས་སུམ་ཅུ་སོ་བདུན་པ་དང་བོད་ཀྱི་དབུ་ཁྲིད་སྤྱི་ནོར་༸གོང་ས་མཆོག་ལ་དུས་དེབ་ལྟ་ཀློག་གནང་མཁན་འབུམ་དྲུག་དང་ཕྱེད་ཀ་ཙམ་གྱིས་འོས་འཕེན་གནང་སྟེ་ཨང་གྲགས་དྲུག་ཅུ་རེ་དྲུག་ལ་མཚན་བཀོད་གནང་ཡོད་པ་རེད།