༧གོང་ས་མཆོག་ནས་གུ་རུ་ན་ནཀ་འཁྲུངས་ནས་ལོ་༥༥༠འཁོར་བའི་རྗེས་དྲན་མཛད་སྒོར་ཆིབས་བསྒྱུར།

༄༅། །༧གོང་ས་མཆོག་གིས་རྒྱ་གར་གྱི་སྲིད་བློན་སྐུ་གཞོན་ཟུར་པ་ ཨད་ཝ་ཎི་ མཆོག་དགུང་གྲངས་༩༡ལ་ཕེབས་པའི་འཁྲུངས་སྐར་གྱི་འཚམས་འདྲི་གནང་བར་ ཨད་ཝ་ཎིའི་གཟིམ་ཤག་ལ་ཆིབས་བསྒྱུར་བསྐྱངས་གནང་མཛད་པའི་རྗེས། རྒྱ་གར་གྱི་རྒྱལ་ས་ལྡི་ལིར་སིཁ་ཆོས་ལུགས་སྲོལ་གཏོད་པ་གུ་རུ་ན་ནཀ་དེཝ་ཇི་(Guru Nanak)འཁྲུངས་ནས་ལོ་༥༥༠འཁོར་བའི་རྗེས་དྲན་མཛད་སྒོའི་ཐོག་ཆིབས་བསྒྱུར་གྱིས་རྒྱ་གར་གྱི་སྲིད་བློན་ཟུར་པ་ཌོཀ་ཊར་མན་མོ་ཧན་སིངྒ( Dr. Manmohan Singh)མཆོག་གི་གཙོས་པའི་གནད་ཡོད་མི་སྣ་དང་ཆོས་ཕྱོགས་ཀྱི་དབུ་ཁྲིད།  དེ་བཞིན་སིཁ་ཆོས་ལུགས་ཀྱི་རྗེས་འབྲང་པ་ཚོར་བཀའ་སློབ་བསྩལ་གནང་མཛད་སྐབས། རྒྱ་གར་གྱི་ཆོས་ལུགས་རིས་མེད་ཀྱི་ལམ་སྲོལ་ལ་བསྔགས་བརྗོད་མཛད་པ་དང་། གཙོ་བོ་༧གོང་ས་མཆོག་གི་ཐུགས་བསྐྱེད་དམ་བཅའ་བཞིའི་ནང་ནས་ཆོས་ལུགས་ནང་ཕན་ཚུན་མཐུན་འབྲེལ་སྤེལ་རྒྱུའི་དགོངས་གཞི་སྐོར་བཀའ་གནང་འདུག
༸གོང་ས་༧སྐྱབས་མགོན་ཆེན་པོ་མཆོག་གིས་རྒྱལ་ས་ལྡི་ལི་ནང་གི་མཛད་འཆར་གྲུབ་རྗེས།  སང་ཉིན་ཕྱི་ཚེས་ ༡༡ ཉིན་མཁའ་ལམ་རྒྱུད་ཉི་ཧོང་ཕྱོགས་སུ་ཆིབས་ཞལ་བསྒྱུར་གནང་མཛད་རྒྱུ་དང་། ཕྱི་ཚེས་ ༡༤དང་༡༥གཉིས་ལ་ཉི་ཧོང་གྱི་གྲོང་ཁྱེར་ ཡོ་ཀོ་ཧྰ་མྰ(Yokohama)ནང་དུ་དད་ལྡན་མང་ཚོགས་ལ་ཤེས་རབ་སྙིང་པོ་དང་རྟེན་འབྲེལ་བསྟོད་པ།  དེ་བཞིན་སྒོམ་རིམ་བར་མ་བཅས་ཀྱི་གསུང་ཆོས་དང་། འཕགས་པ་སྤྱན་རས་གཟིགས་ཀྱི་བཀའ་དབང་བཀའ་དྲིན་ཆེ་གནང་མཛད་ཀྱི་ཡོད་པ་མ་ཟད།  དེ་ནས་ཕྱི་ཚེས་༡༦ཉིན་ཁུལ་དེར་ནང་པའི་ཚན་རིག་དང་དེང་དུས་ཚན་རིག་དབར་གྱི་བགྲོ་གླེང་ཚོགས་འདུའི་ཚོགས་མགོན་དུ་དབུ་བཞུགས་མཛད་ཀྱི་ཡོད་པ་རེད།
ཡང་ཕྱི་ཚེས་ ༡༧ ཉིན་མགོན་པོ་༸གང་ཉིད་མཆོག་གིས་ཉི་ཧོང་གི་རྒྱལ་ས་ Tokyo ནང་གནས་སྡོད་གཞོན་སྐྱེས་ཚོ་ལ་( We Are One་Family)འམ་ང་ཚོ་ཚང་མ་ཁྱིམ་ཚང་གཅིག་རེད་ཅེས་པའི་བརྗོད་གཞིའི་ཐོག་བཀའ་སློབ་དང་། ཕྱི་ཚེས་༡༨ ཉིན་ཉི་ཧོང་གི་Chiba ས་གནས་སུ་ཤེས་རབ་སྐྱེད་ཚལ་གླིང་ལྟེ་གནས་ཁང་དབུ་འབྱེད་མཛད་རྒྱུ་སོགས་ཀྱི་མཛད་འཆར་འདུག།
གསར་འགོད་པ་རྩོམ་སྒྲིག་འགན་འཛིན་རིག་ལྡན་སྒྲོལ་མ།