༸གོང་ས་མཆོག་གིས་ཨ་རིའི་ནང་གི་མཛད་འཆར་སྐོར།

༄༅༎བོད་ཀྱི་བླ་ན་མེད་པའི་དབུ་འཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཨ་རིའི་སེན་ཕེ་རན་སིསི་ཀོ་གྲོང་ཁྱེར་ནང་དབུལ་ཕོངས་མི་མང་གི་ངལ་སེལ་དང་འབྲེལ་བའི་མཛད་འཆར་ཁག་ཅིག་བསྐྱངས་གནང་ཡོད་པ་རེད།

དང་ཐོག་དབུལ་ཕོངས་མི་མང་ལ་སྦྱིན་གཏོང་གནང་མཁན་གྱི་ཚོགས་པའི་འགོ་འཁྲིད་ཁག་ཅིག་དང་སྦྱིན་གཏོང་གི་དགའ་སྐྱིད་ཅེས་པའི་བརྗོད་གཞིའི་ཐོག་གསུང་གླེང་གནང་ཡོད་ཅིང་གླེང་མོལ་དེ་སྦྱིན་གཏོང་ཚོགས་པ་རྡ་ཕོར་གོ་ཀྲེན་ཨིན་ཊར་ནེ་ཤི་ནེལ་ཞེས་པས་གོ་སྒྲིག་གནང་བ་ཞིག་ཡིན་པ་དང་ཚོགས་པ་དེ་དབུལ་ཕོངས་མིའི་ངལ་སེལ་དང་དེ་དང་འབྲེལ་བའི་དཀའ་སྡུག་སེལ་ཆེད་བཙུགས་གནང་བ་ཞིག་ཡིན་པ་རེད།

སྐབས་དེར་༸གོང་ས་༸སྐྱབས་མགོན་ཆེན་པོ་མཆོག་གིས་གང་ཟག་གང་ཞིག་གཞི་རྩའི་ཐོག་སྤྱི་ཚོགས་ལ་རྟེན་དགོས་པ་ཞིག་ཆགས་པར་བརྟེན་འགྲོ་བ་མིའི་སྤྱི་ཚོགས་འཚོ་གནས་དེ་གང་ཟག་མི་ངོ་རེར་རག་ལུས་ཀྱི་ཡོད་སྐོར་དང་མི་གཞན་ལ་བྱམས་སྐྱོངས་བྱེད་རྒྱུ་དེ་རང་ཉིད་སོ་སོར་བྱམས་སྐྱོངས་བྱེད་པ་དང་འདྲ་མཚུངས་ཆགས་ཀྱི་ཡོད་སྐོར་བཀའ་གནང་འདུག གོང་ཞུས་ཀྱི་མཛད་འཆར་དེ་རྗེས་༸གོང་ས་མཆོག་སེན་ཕེ་རན་སིསི་ཀོ་གྲོང་ཁྱེར་ནང་གི་རང་ཁྱིམ་མེད་པ་རྣམས་ལ་ཁ་ལག་སྤྲོད་ཡུལ་ཞིག་ལ་ཆེད་ཕེབས་ཀྱིས་དེར་འདུས་རང་ཁྱིམ་མེད་པ་རྣམས་དང་གསུང་གླེང་དང་འབྲེལ་༸གོང་ས་མཆོག་གང་ཉིད་ཡང་རང་ཁྱིམ་མེད་པ་ཞིག་ཡིན་སྐོར་བཀའ་གནང་འདུག དེ་རྗེས་༸གོང་ས་མཆོག་འཛམ་གླིང་གི་རྒྱལ་ཁབ་བཅུ་གསུམ་གྱི་མི་གྲངས་བཞི་ཅུ་ཞེ་དགུ་ཞིག་ལ་ཕྱི་ལོ་ཉིས་སྟོང་དགུ་ལོའི་བྱམས་སྙིང་རྗེའི་གཟེངས་རྟགས་ཀྱི་མཛད་སྒོ་ཞིག་ལ་ཆིབས་བསྒྱུར་གྱིས་གཟེངས་རྟགས་ཐོབ་མིའི་ཁུངས་ནིའུ་ཛི་ལེནདྲ་གྱི་བོད་རིགས་ཐུབ་བསྟན་སྐལ་བཟང་ལགས་དང་ཨོ་སོ་ཀྲོ་ལི་ཡའི་ཡུལ་ནས་རྡོ་རྗེ་འགྲམ་འདུལ་ལགས་དང་ཨ་མི་རི་ཀ་ནས་འཇིགས་མེད་སྟོབས་རྒྱལ་ལགས་ཡང་ཚུད་ཡོད་པའི་གནས་ཚུལ་ཐོན་འདུག