ཨ་རིའི་ཧ་ལྦེ་མཚོ་གླིང་དུ་༧གོང་ས་མཆོག་གི་མཛད་འཆར་སྐོར་།

༄༅༎༧གོང་ས་༧སྐྱབས་མགོན་ཆེན་པོ་མཆོག་གིས་ཨ་རིའི་ཧ་ལྦ་ཨི་མཚོ་གླིང་ཁུལ་གྱི་མཛད་འཆར་ཁག་ཅིག་དྲ་ལམ་བརྒྱུད་ཐད་ཀར་རྒྱང་སྲིང་ཞུ་རྒྱུ་ཡིན་འདུག་༎
བོད་མིའི་དབུ་འཁྲིད་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ ཕྱི་ཚེས་༡༤ནས་༡༦བར་ ཉིན་གྲངས་གསུམ་གྱི་རིང་ ཨ་རིའི་མཚོ་གླིང་མངའ་སྡེ་ཧ་ལྦ་ཨི་ཁུལ་གྱི་ཨོ་ཨ་ཧུ་ས་གནས་སུ་ཆིབས་སྒྱུར་བསྐྱང་གཏན་འཁེལ་ཡོད་པ་རེད་ ཁུལ་དེར་༸གོང་ས་མཆོག་གི་ཆིབས་བསྒྱུར་གོ་སྒྲིག་ཞུ་མཁན་གཙོ་བོའི་གྲས་ཧ་ལྦ་ཨི་སྤྱི་ཚོགས་ཐེབས་རྩ་ཁང་གི་འགན་འཛིན་དང་ཚོགས་གཙོ་གཅིག་ལྕོག་སྐུ་ཞབས་ཀེལ་ལྦིན་ཀྲ་ཀེ་ཀྲ་ ཡིས་ཧ་ལྦ་ཨི་དང་ཧ་ལྦ་ཨི་མཚོ་གླིང་ཕྱི་ཕྱོགས་སུ་མང་ཚོགས་རྣམས་ནས་ ༸གོང་ས་མཆོག་གི་བཀའ་སློབ་གསུངས་བཤད་གསན་གཟིགས་ཐུབ་རྒྱུའི་ཆེད་ ད་རེས་༸གོང་ས་མཆོག་གིས་ཁུལ་དེའི་མཛད་འཆར་ཆེ་གྲས་རྣམས་དྲ་ལམ་བརྒྱུད་དུས་ཐོག་ཐད་ཀར་རྒྱང་སྲིང་ཞུ་རྒྱུ་ཡིན་པའི་སྐོར་གསལ་བསྒྲགས་གནང་བཞག་ ༸གོང་ས་མཆོག་གིས་བཀའ་སློབ་གསུངས་བཤད་ཀྱི་མཛད་འཆར་ཁོངས་ནས་ དྲ་ལམ་བརྒྱུད་ཐད་ཀར་རྒྱང་སྲིང་ཞུ་རྒྱུའི་མཛད་རིམ་གཏན་འབེབས་བྱུང་བ་ཁག་ནི་ ཚེས་ ༡༤ སྔ་དྲོ་ཚོུད་༡༡དང་སྐར་མ་༤༥ཐོག་ཧ་ལྦ་ཨི་གཙུག་ལག་སློབ་གཉེར་ཁང་གི་ཚོགས་ཁང་ཆེན་མོའི་ནང་སློབ་ཕྲུག་༨༥༠༠བརྒལ་བར་ ནང་སེམས་ཀྱི་ཤེས་ཡོན་སློབ་གསོ་དང་འབྲེལ་བའི་བཀའ་སློབ་བཀའ་དྲིན་སྩལ་རྒྱུའི་མཛད་རིམ་དང་ ཕྱི་ཚེས་ ༡༥ ཉིན་ཚོགས་ཁང་དེ་གའི་ནང་ ས་གནས་ཡུལ་མིའི་འགོ་ཁྲིད་ཁག་ཅིག་དང་ལྷན་བགྲོ་གླེང་ཚོགས་འདུ་ཞིག་གི་ཐོག་གོང་ས་མཆོག་དབུ་བཞུགས་མཛད་རྒྱུའི་མཛད་རིམ་དང་ དེ་བཞིན་ཡང་ཚེས་༡༥ཉིན་ཧ་ལྦ་ཨི་མི་རིགས་ཀྱི་ཐུན་མོང་མ་ཡིན་པའི་ཨ་ལོ་ཧ་ཞེས་པའི་གོམ་སྲོལ་བརྒྱུད་ ཞི་བདེ་གོང་འཕེལ་གཏོང་ཐབས་ཞེས་པའི་བརྗོད་གཞིའི་ཐོག་ མང་ཚོགས་ལ་བཀའ་སློབ་གསུངས་བཤད་ཀྱི་མཛད་རིམ་བཅས་ཡིན་པར་གསལ་བསྒྲགས་གནང་མཁོད་འདུག་་ ད་རེས་སྤྱི་ནོར་གོང་ས་སྐྱབས་མགོན་ཆེན་པོ་མཆོག་གིས་ཧ་ལྦ་ཨི་མཚོ་གླིང་དེའི་ནང་ཉིན་གྲངས་གསུམ་གྱི་རིང་ མང་ཚོགས་ལ་བརྗོད་གཞི་འདྲ་མིན་ཐོག་བཀའ་སློབ་གསུངས་བཤད་གནང་རྒྱུའི་མཛད་རིམ་དང་འབྲེལ་ ཁུལ་དེའི་ནང་གི་ལོ་རྒྱུས་ཀྱི་རང་བཞིན་ལྡན་པའི་ས་ཚིགས་ཁག་གཅིག་ཏུ་ཡང་འཚམས་གཟིགས་མཛད་རྒྱུ་ཡིན་འདུག་༎