ཨ་རིའི་དམངས་གཙོ་ཚོགས་པའི་འོས་མིར་སྲིད་འཛིན་འོས་ཐོབ་པ།

༄༅༎འགྲན་རྩོད་ཤུགས་ཆེ་བྱུང་བའི་ཨ་མི་རི་ཀའི་སྲིད་འཛིན་གྱི་འོས་བསྡུ་དེ་དམངས་གཙོ་ཚོགས་པའི་སྲིད་འཛིན་གྱི་འོས་མི་སྦ་རཀ་ཨོ་སྦ་མ་ལ་འོས་ཐོབ་བྱུང་སྟེ་ཨ་མི་རི་ཀའི་རྒྱལ་རབས་ལོ་རྒྱུས་ནང་མི་རིགས་ནག་པོ་ཞིག་ལ་སྲིད་འཛིན་དུ་འདེམས་ཐོན་བྱུང་བའི་ལོ་རྒྱུས་ཀྱི་རང་བཞིན་ལྡན་པའི་འོས་བསྡུ་ཆགས་ཡོད་པ་རེད།

དགུང་གྲངས་བཞི་ཅུ་ཞེ་བདུན་ལ་ཕེབས་པའི་སྦ་རཀ་ཨོ་སྦ་མ་ཨ་མི་རི་ཀའི་སྲིད་འཛིན་བཞི་བཅུ་ཞེ་བཞི་པ་དེ་ཆགས་ཀྱི་ཡོད་པ་དང་ཁོང་ནས་སྲིད་འཛིན་གསར་པའི་ལས་འཁུར་དངོས་གཞི་དེ་འཆར་ལ་ཉེ་བའི་ཕྱི་ལོ་༢༠༠༩ཕྱི་ཟླ་དང་པོའི་ཚེས་ཉི་ཤུ་ཉིན་བཞེས་ཀྱི་ཡོད་པ་རེད།

སྲིད་འཛིན་འོས་ཐོབ་ཀྱི་གསལ་བསྒྲགས་གནང་བའི་རྗེས་སྦ་རཀ་ཨོ་སྦ་མས་སྐབས་དེར་དགའ་སྟོན་ཆེད་དུས་འཛོམས་ཡོད་པའི་ཁོང་གི་རྒྱབ་སྐྱོར་བ་མི་གྲངས་ཉིས་འབུམ་བཞི་ཁྲི་ཙམ་གསུང་བཤད་ཅིག་ནང་དེ་རིང་ཉིན་མོའི་ལོ་རྒྱུས་ཀྱི་རང་བཞིན་ལྡན་པའི་འོས་བསྡུའི་གྲུབ་འབྲས་དེ་བརྒྱུད་ང་ཚོས་ཨ་རིའི་ནང་ལེགས་བཅོས་ཀྱི་བཅོས་བསྒྱུར་ཆེན་པོ་ཞིག་གཏོང་རྒྱུའི་འགོ་བཙུགས་བྱས་ཡོད་ཅེས་དང་ང་ཚོའི་འོས་འགན་དེ་ཆེན་པོ་ཞིག་དང་དཀའ་ངལ་ཅན་ཞིག་ཡིན་ནའང་ངོས་ལ་བཟང་ཕྱོགས་ཀྱི་འགྱུར་བ་ཞིག་གཏོང་ཐུབ་པའི་སེམས་ཤུགས་དེ་དེ་རིང་ལས་ཆེ་བ་ཞིག་ནམ་ཡང་བྱུང་མ་མྱོང་ལ་ང་ཚོས་ལས་འཁུར་ཆ་ཚང་གང་ལེགས་ངང་བསྒྲུབ་ཐུབ་པའི་གདེང་ཚོད་ཡོད་ཅེས་གསུངས་ཡོད་པ་རེད།

ཁོང་གི་ཁ་གཏད་སྤྱི་མཐུན་ཚོགས་པའི་སྲིད་འཛིན་གྱི་འོས་མི་ཇོན་མེ་ཀེན་གྱིས་ཀྱང་རང་གི་རྒྱབ་སྐྱོར་ཚོགས་མི་ཚོར་ཁོང་ལ་ད་རེས་སྲིད་འཛིན་གྱི་འོས་ཐོབ་མ་བྱུང་བ་དེ་རྒྱབ་སྐྱོར་ཚོགས་མི་ཚོས་དཀའ་ལས་མ་རྒྱབ་པའི་རྐྱེན་གྱི་མིན་པར་ཁོང་རང་ཉིད་ཀྱི་ལས་དོན་ལམ་ལྷོངས་མ་བྱུང་བ་ཞིག་ཡིན་པའི་ཐུགས་གསོ་དང་སྦྲགས་ཨ་རིའི་མི་མང་གིས་སྲིད་འཛིན་གྱི་འདེམས་ཁ་དེ་ཐག་ཆོད་པའི་ངང་གནང་ཡོད་ཅིང་ཁོང་ནས་དམངས་གཙོ་ཚོགས་པའི་སྲིད་འཛིན་འོས་མི་སྦ་རཀ་ཨོ་སྦ་མ་ལ་འོས་བསྡུའི་རྒྱལ་ཁ་ཐོབ་པའི་འཚམས་འདྲིའི་ཞལ་དཔར་ཞིག་ཀྱང་ཕུལ་ཡོད་པ་རེད། ཕྱོགས་མཚུངས་ཨ་རིའི་སྲིད་འཛིན་སྦུའུ་ཤེ་ཡིས་ཀྱང་སྦ་རཀ་ཨོ་སྦ་མར་སྲིད་འཛིན་འོས་ཐོབ་བྱུང་བའི་འཚམས་འདྲི་གནང་ཡོད་པ་རེད།