ངོ་རྒོལ་སྣེ་ཁྲིད་མཁན་ཁག་གཅིག་ལ་འོས་བསྡུའི་རྒྱལ་ཁ་ཐོབ་པ།

ཧོང་ཀོང་ནང་ས་གནས་འཐུས་མིའི་འོས་བསྡུ་ཁྲོད་ལོ་སྔོན་མར་སློབ་ཕྲུག་གི་ངོ་རྒོལ་སྣེ་ཁྲིད་བྱེད་མཁན་ཁག་གཅིག་ལ་རྒྱལ་ཁ་ཐོབ་འདུག
དེ་ཡང་ལོ་སྔོན་མའི་ནང་རྒྱ་ནག་གཞུང་གིས་ཧོང་ཀོང་ས་གནས་སྲིད་གཞུང་གི་འགོ་ཁྲིད་དེ་རྒྱ་ནག་གཞུང་གིས་མིང་འདོན་བྱས་པའི་འོས་མིའི་ཁོངས་ནས་འདེམས་སྒྲུག་བྱེད་དགོས་པའི་གསལ་བསྒྲགས་ཤིག་སྤེལ་བའི་རྗེས། ཧོང་ཀོང་ནང་སློབ་ཕྲུག་གིས་སྣེ་ཁྲིད་བྱས་པའི་མི་མང་སྟོང་ཕྲག་མང་པོས་ཁྲོམ་གཞུང་དུ་ཐོན་ཏེ་ས་གནས་མང་ཚོགས་ལ་ཧོང་ཀོང་གི་འགོ་ཁྲིད་འདེམས་རྒྱུའི་ཐོབ་ཐང་ཆ་ཚང་དགོས་པའི་དགོས་འདུན་སྟོན་ཏེ་ངོ་རྒོལ་བྱས་ཡོད་པ་ལྟར། སྐབས་དེའི་ངོ་རྒོལ་ངོ་རྒོལ་ལས་འགུལ་སྣེ་ཁྲིད་བྱེད་མཁན་གྱི་ན་གཞོན་ཁག་གིས་འདི་ཚེས་ ༢༢ཉིན་ཧོང་ཀོང་གི་རྫོང་རིམ་པའི་འོས་བསྡུའི་འགྲན་རྩོད་ནང་མཉམ་ཞུགས་བྱས་ཡོད་པའི་ཁོངས་ནས་ད་བར་གཞོན་སྐྱེས་བཞི་ལ་རྒྱལ་ཁ་ཐོབ་ཡོད་པ་རེད། དེ་ཡིས་སློབ་ཕྲུག་གི་སྣེ་འཁྲིད་བྱས་པའི་དམངས་གཙོའི་ཐོབ་ཐང་རྩོད་གླེང་གི་ལས་འགུལ་ལ་སེམས་ཤུགས་འཕར་མ་ཞིག་བྱུང་བ་ལྟབུ་ཆགས་ཡོད་འདུག
གནས་ཚུལ་ནང་འགྲེལ་བརྗོད་བྱས་པར་གཞིགས་ན། འདི་ཚེས་༢༢ཀྱི་འོས་བསྡུའི་སྐབས་ཧོང་ཀོང་དེ་བཞིན་རྫོང་ཁག་བཅོ་བརྒྱད་ལ་ཆ་བགོས་བྱས་ཡོད་པ་རྣམས་ལ་ཁྱོན་སྡོམ་འཐུས་མི་ ༤༣༡འོས་འདེམས་བྱེད་དགོས་ཀྱི་ཡོད་ཅིང༌། སྤྱིར་བཏང་རྫོང་རིམ་པའི་འོས་བསྡུའི་སྐབས། འོས་ཤོག་འཕེན་མཁན་དེ་ཙམ་ཡོང་གི་མེད་ཀྱང༌། ཐེངས་འདིའི་འོས་བསྡུའི་ནང་གཞོན་སྐྱེས་ཧ་ཅང་མང་པོས་འོས་ཤོག་འཕང་ཏེ་འོས་ཤོག་འཕང་མཁན་གྱི་གྲངས་ཚད་བརྒྱ་ཆ་༤༩ཙམ་ལོངས་ཐུབ་པ་བྱུང་ཡོད་པ་རེད།

གསར་འགོད་པ་ངག་དབང་ཆོས་འཕེལ།