རྒྱ་ནག་གི་སྐྱོན་བརྗོད་ལ་རྒྱ་གར་གྱིས་ཁས་ལེན་གནང་མེད་པ།

༄༅༎༸གོང་ས་༸སྐྱབས་མགོན་ཆེན་པོ་མཆོག་ཨ་རུ་ན་ཅཱལ་པཱར་རྡེཤི་མངའ་ཁུལ་དུ་ཆིབས་བསྒྱུར་གནང་རྒྱུའི་མཛད་འཆར་དེས་རྒྱ་དཀར་ནག་གཉིས་དབར་གྱི་འབྲེལ་བར་འགོག་རྐྱེན་བཟོ་གིན་ཡོད་སྐོར་རྒྱ་ནག་གི་སྐྱོན་བརྗོད་ལ་རྒྱ་གར་གྱིས་ཁས་ལེན་གནང་མི་འདུག

དེ་རིང་རྒྱ་གར་གྱི་རྒྱལ་ས་ལྡི་ལི་གསར་པའི་ནང་གསར་འགོད་པ་ཚོས་༸གོང་ས་༸ཏཱ་ལའི་བླ་མ་མཆོག་ཨ་རུ་ན་ཅཱལ་ཆིབས་བསྒྱུར་བསྐྱངས་གནང་མཛད་རྒྱུ་ཡིན་པ་དེས་རྒྱལ་ཁབ་གཉིས་དབར་གྱི་འབྲེལ་བར་དོ་ཕོག་ཐོབ་ཡོད་མེད་བཀའ་འདྲི་ཞུས་པར་རྒྱ་གར་ཕྱི་སྲིད་དྲུང་ཆེ་ལྕམ་ནི་རུ་པ་མ་རའོ་ཡིས་ཕྱོགས་གཉིས་དབར་གྱི་འབྲེལ་བར་གནོད་སྐྱོན་གང་ཡང་བྱུང་མེད་སྐོར་གསུངས་པ་དང་༸གོང་ས་མཆོག་རྒྱ་གར་གྱི་ས་ཕྱོགས་ག་པར་ཕེབས་ནའང་རང་དབང་གི་སྒོ་ནས་ཕེབས་ཆོག་རྒྱུ་ཡིན་པའི་རྒྱ་གར་གཞུང་གི་ལངས་ཕྱོགས་གསལ་པོ་ཡིན་ཞེས་འགྲེལ་བརྗོད་གནང་འདུག རྒྱ་གར་བདེ་སྲུང་ཞིབ་འཇུག་སློབ་གཉེར་ཁང་གིས་ལྷོ་ཨེ་ཤེ་ཡའི་ཐོག་གི་ཞུགས་མོལ་ལྷན་ཚོགས་སར་ཕྱི་སྲིད་དྲུང་ཆེ་ནི་རུ་པ་མ་རའོ་ཡིས་གསུངས་བཤད་གནང་སྐབས་རྒྱ་དཀར་ནག་གཉིས་དབར་གྱི་འབྲེལ་བ་དེ་རྙོག་འཛིང་ཅན་ཞིག་ཡིན་པ་དང་ཕྱོགས་གཉིས་དབར་གྱི་ས་མཚམས་ཀྱི་རྩོད་གཞི་དེ་མེད་པ་ཆགས་རྒྱུར་དུས་ཚོད་གང་འཚམས་འགོར་རྒྱུ་ཡིན་སྐོར་གསུངས་བཞག

ཁ་ས་རྒྱ་ནག་གིས་ཏཱ་ལའི་བླ་མ་མཆོག་ཨ་རུ་ན་ཅཱལ་ཁུལ་ཆིབས་བསྒྱུར་གནང་རྒྱུ་ཡིན་པ་དེས་རྒྱ་དཀར་ནག་གཉིས་དབར་གྱི་འབྲེལ་བར་བརྡབ་སིག་ཐེབས་རྒྱུ་ཡིན་པའི་སྐྱོན་བརྗོད་ཞུས་ཡོད་ནའང་རྒྱ་གར་གཞུང་གིས་༸གོང་ས་མཆོག་ལ་ཁུལ་དེའི་ནང་ཕེབས་ཆོག་པའི་ཆོག་མཆན་ཕུལ་བ་དེར་ཐད་ཀར་སྐྱོན་བརྗོད་བྱས་མེད་པ་རེད།