རྒྱ་གར་དུ་ལྷན་ཁང་སོ་སོའི་བློན་ཆེན་གསར་པ་བདམས་ཡོད་པ།

༄༅༎རྒྱ་གར་ཀོང་རེསི་སྲིད་དོན་ཚོགས་པའི་འགོ་འཁྲིད་རྒན་གྲས་སྐུ་ཞབས་པརྰ་ནཔ་མུ་ཁར་ཇི་སྲིད་བློན་མན་མོ་ཧན་སིངྒ་མཆོག་གིས་དབུ་འཁྲིད་པའི་རྒྱ་གར་གི་མནའ་འབྲེལ་གཞུང་གསར་པའི་དཔལ་འབྱོར་བློན་ཆེན་དུ་གཟའ་སྤེན་པའི་ཉིན་བསྐོ་བཞག་གནང་འདུག

དགུང་གྲངས་བདུན་བཅུ་དོན་གསུམ་ལ་ཕེབས་པའི་སྐུ་ཞབས་པརྰ་ནཔ་མུ་ཁར་ཇིས་ཀོང་རེསི་ཚོགས་པས་སྣེ་འཁྲིད་པའི་གཞུང་གོང་མའི་སྐབས་ཕྱི་སྲིད་བློན་ཆེན་དང་དེ་རྗེས་དཔལ་འབྱོར་བློན་ཆེན་གྱི་ལས་ཚབ་སོགས་གནང་ཡོད་པ་དང་དཔལ་འབྱོར་བློན་ཆེན་གྱི་ལས་ཚབ་གནང་སྐབས་ཁོང་གིས་རྒྱ་གར་ཐོག་གོ་ལའི་དཔལ་འབྱོར་ཉམས་རྒུད་འགྲོ་བཞིན་པ་དེས་ཤུགས་རྐྱེན་ཆེན་པོ་མི་ཡོང་བའི་ཆེད་རྒྱ་གར་གཞུང་གི་འགྲོ་གྲོན་འཕར་མ་གཏོང་དགོས་སྐོར་གསུངས་ཡོད་པ་རེད།

ཡང་དེ་བཞིན་པ་ཀིསི་ཐན་དང་ཨཕ་གཧ་ནིས྄་ཐན་གྱི་ནང་བརྟན་ལྷིངས་མེད་པའི་གནས་སྟངས་དེའི་འོག་རྒྱ་གར་གྱི་གཞུང་གསར་པས་ཕྱི་འབྲེལ་སྲིད་བྱུས་ཐོག་དམིགས་བསལ་གྱི་དོ་སྣང་བྱེད་དགོས་པ་ཆགས་རྒྱུ་དང་ཕྱི་འབྲེལ་བློན་ཆེན་དུ་སྲིད་དོན་པ་རྒན་གྲས་སྐུ་ཞབས་ཨེས་ཨེམ་ཀི་རིཤ་ནྰ་ལ་བསྐོ་བཞག་གནང་ཡོད་འདུག

མནའ་འབྲེལ་གཞུང་ལ་རྒྱབ་སྐྱོར་ཆེན་པོ་གནང་མཁན་སྐུ་ཞབས་ཤ་རརྡ་པ་བར་སོ་ནམ་ལས་དོན་བློན་ཆེན་གྱི་མཚན་གནས་མུ་མཐུད་བཞེས་རྒྱུ་དང་ཨེ་ཀེ་ཨན་ཏོ་ནིས་བདེ་སྲུང་བློན་ཆེན་གྱི་མཛད་འཁུར་བཞེས་རྒྱུ་ཡིན་འདུག

དཔལ་འབྱོར་བློན་ཆེན་ཟུར་པ་སྐུ་ཞབས་པ་ལ་ནི་ཡཔ་པན་ཅི་དམ་འབའ་རམ་གྱིས་མུ་མཐུད་ནང་སྲིད་བློན་ཆེན་དང་ནུབ་སྦེང་གལ་མངའ་སྡེའི་ཏི་རི་ནྰ་མུལ་ཀོང་རེསི་སྲིད་དོན་ཚོགས་པའི་དབུ་འཁྲིད་ལྕམ་མམ་ཏ་སྦེ་ནར་ཇི་ལ་རི་ལིའི་བློན་ཆེན་དུ་བསྐོ་བཞག་གནང་ཡོད་པ་རེད།

རྒྱ་གར་ཀོང་རེསི་སྲིད་དོན་ཚོགས་པར་འདི་ལོའི་རྒྱ་གར་རྒྱལ་ཡོངས་ཀྱི་འོས་བསྡུའི་སྐབས་གྲུབ་འབྲས་ཧ་ཅང་བཟང་པོ་བྱུང་རྗེས་གཟའ་པ་སངས་ཀྱི་ཉིན་སྲིད་བློན་མན་མོ་ཧན་སིངྒ་མཆོག་གིས་སྲིད་བློན་ལས་འཁུར་ཐེངས་གཉིས་པ་བཞེས་རྒྱུའི་དམ་བཅའ་ཕུལ་ཡོད་པ་དང་ཁོང་གི་སྲིད་བློན་གྱི་ལས་འཁུར་འདིའི་རིང་གཙོ་བོ་དཔལ་འབྱོར་ཡར་རྒྱས་སླར་གསོ་དང་དབུལ་ཕོངས་ས་ཡ་མང་པོའི་འཚོ་བའི་ཆུ་ཚད་མཐོ་རུ་གཏོང་ཐབས་གནང་རྒྱུ་ཡིན་པའི་སྐོར་གནད་དོན་དབྱེ་ཞིབ་པ་ཚོས་འགྲེལ་བརྗོད་བྱེད་བཞིན་ཡོད་པ་རེད།།