རྒྱ་གར་གྱིས་ཕྱིའི་གོ་མཚོན་ཉོ་སྒྲུབ་ལ་བརྟེན་དྲགས་རྒྱུ་མེད་སྐོར།

༄༅༎རྒྱ་གར་གྱི་བདེ་སྲུང་བློན་ཆེན་ཨེ་ཀེ་ཨེན་ཐོ་ནི་མཆོག་གིས་རྒྱ་གར་ངོས་ནས་ཕྱིའི་རྒྱལ་ཁབ་ཁག་ལ་དྲག་པོའི་གོ་མཚོན་ཉོ་སྒྲུབ་ཐོག་བརྟན་དྲགས་པ་དེར་ཁོང་ལ་ཉེས་དམིགས་ཡོད་པའི་ཚོར་བ་ཞིག་ཡོང་གི་ཡོད་སྐོར་གསུང་འདུག

གོང་ཞུས་ཁོང་གི་བཀའ་མོལ་དེ་རྒྱ་གར་གྱི་མཁའ་དབྱིངས་འཕྲུལ་རིག་གི་ཚོགས་འདུ་ཞིག་གི་ཐོག་གསུང་ཡོད་པ་དང་དེ་ཡང་ཁོང་གིས་ང་ཚོས་དྲག་པོའི་གོ་མཚོན་འཕྲུལ་རིག་ཐོག་རང་རྐྱ་འཕེར་བ་བཟོ་རྒྱུའི་ཐོག་ཤིན་ཏུ་ནས་དལ་དྲགས་པ་དེར་ངོས་རང་ལ་མཚམས་རེ་འགྱོད་སེམས་དང་ཉེས་དམིགས་ཡོད་པའི་ཚོར་བ་ཡོང་གི་འདུག་ཅེས་གསུང་འདུག ཡང་ཁོང་གིས་ང་ཚོའི་དྲག་པོའི་འཕྲུལ་རིག་གི་དགོས་མཁོ་ཆ་ཚང་ཕྱིའི་རྒྱལ་ཁབ་ཁག་ནས་ནང་འདྲེན་བྱེད་མ་དགོས་པ་བཟོ་ཐབས་བྲལ་ཡང་བརྒྱ་ཆ་བདུན་ཅུ་ཐམ་པ་ནང་འདྲེན་བྱེད་དགོས་པའི་གནས་སྟངས་དེ་ངོས་ལེན་བྱེད་ཐབས་བྲལ་སྐོར་དང་དེ་ང་ཚོར་རན་པོ་ཞིག་ཀྱང་ཆགས་ཀྱི་མེད་སྐོར་གསུང་འདུག ཡང་བདེ་སྲུང་བློན་ཆེན་ཨེན་ཐོ་ནི་མཆོག་གིས་གཞུང་ཕྱོགས་ནས་དྲག་པོའི་འཕྲུལ་རིག་གསར་པ་བཟོ་འདོན་བྱེད་རྒྱུར་ཚན་རིག་པ་རྣམ་པར་གང་ཅིའི་རོགས་རམ་གང་ཡོང་གནང་རྒྱུའི་ཞལ་བཞེས་གནང་ཡོད་པ་རེད། རྒྱ་གར་ནི་ཡར་རྒྱས་འགྲོ་བཞིན་པའི་ཡུལ་ཁག་ནང་ནས་དྲག་པོའི་གོ་མཚོན་ནང་འདྲེན་བྱེད་མཁན་གྱི་ཡུལ་ཁག་གཙོ་བོའི་གྲས་ཤིག་ཡིན་པ་དང་ཡུལ་དེས་ཕྱི་ལོ་ཉིས་སྟོང་ཚུན་ཨ་རིའི་ཌོ་ལར་འཐེར་འབུམ་ཉི་ཤུ་རྩ་བརྒྱད་ཀྱི་གོ་མཚོན་ནང་འདྲེན་གནང་ཡོད་པ་རེད། ཡང་ཡུལ་དེས་ཕྱི་ལོ་ཉིས་སྟོང་བཅུ་ཚུན་ཨ་རིའི་ཌོ་ལར་འཐེར་འབུམ་སུམ་ཅུ་ཐམ་པ་མ་གནས་ཀྱི་གོ་མཚོན་ནང་འདྲེན་གནང་རྒྱུའི་འཆར་གཞི་ཡོད་པའི་གནས་ཚུལ་ཐོན་འདུག