བོད་དོན་ཆེད་འཛིན་སྐྱོང་ལྷན་ཚོགས།

༄༅། །ཁ་སང་ཕྱི་ཚེས་ ༩ རེས་གཟའ་མིག་དམར་ཉིན་རྒྱ་གར་རྒྱལ་ས་ལྡི་ལིའི་ནང་རྒྱ་གར་རྒྱལ་ཡོངས་འཕགས་བོད་མཛའ་འབྲེལ་ཚོགས་པའི་ (Bharat Tibbat Sahyog Manch) འཛིན་སྐྱོང་ལྷན་ཚོགས་སྐོང་ཚོགས་གནང་ཡོད། སྐབས་དེར་གཞུང་འབྲེལ་མིན་པའི་བོད་དོན་རྒྱབ་སྐྱོར་གྱི་ཚོགས་པ་འདྲ་མིན་ཁག་གི་ལས་དོན་བྱེད་ཕྱོགས་ཀྱི་གཙོས་འབྱུང་འགྱུར་བོད་དོན་རྒྱབ་སྐྱོར་ཚོགས་པའི་ལས་དོན་བྱེད་ཕྱོགས་དང་ཚོགས་པ་སྔར་བས་ཤུགས་ཆེ་རུ་ཇི་ལྟར་གཏང་ཐུབ་མིན་སོགས་ཀྱི་སྐོར་གོ་བསྡུར་སྦྱང་བཤད་ལྷུག་པོ་གནང་ཡོད་པ་རེད། དེ་ཡང་ལྷན་ཚོགས་སྐབས་རྒྱ་གར་མངའ་སྡེ་བཅུ་དགུའི་ནང་བོད་དོན་རྒྱབ་སྐྱོར་ཚོགས་པའི་འཛིན་སྐྱོང་འཐུས་མི་དགུ་བཅུ་གོ་ལྔ་ལྷན་འཛོམས་ཀྱིས་དེང་སྐབས་བོད་ནང་དུ་འཕྲད་བཞིན་པའི་ཛ་དྲག་གནས་སྟངས་ཐོག་ལའང་གོ་བསྡུར་གནང་ཡོད། གཞན་ཡང་ལྷན་ཚོགས་སྐབས་འཕགས་བོད་མཛའ་འབྲེལ་ཚོགས་པ་ཐོག་མར་གསར་འཛུགས་གནང་མཁན་སྐུ་ཞབས་ཨིན་དི་རེ་ཤི་ཀུ་མར་ (shri Indresh Kumar) ལགས་དང། བོད་མི་མང་སྤྱི་འཐུས་ཨ་ཅརྱཱ་ཡེ་ཤེས་ཕུན་ཚོགས་ལགས། དེ་བཞིན་སྐུ་མགྲོན་གཙོ་བོར་སྐུ་ཞབས་སུ་རེ་ཤི་ (Shri Suresh Ji) ལགས་ཡིན་འདུག གཞན་ཡང་སྐབས་དེར་གསུང་བཤད་གནང་མཁན་འཕགས་བོད་མཛའ་འབྲེལ་ཚོགས་པའི་ཚོགས་གཙོ་ལས་ཐོག་པ་སྐུ་ཞབས་ཀུལ་དིབ་ཅནྜ་ཨག་ནི་ཧོ་ཏི་རི་Dr. Kuldeep Chand Agnihotri ལགས་དང། དྲུང་ཆེ་ཨ་ཤོཀ་མེན་ཌེ་Shri Ashok Mende བཅས་ཡིན་འདུག།