རྒྱ་གར་གཞུང་ནས་ལྐོག་ཟའི་གནད་དོན་ཐོག་ཞིབ་འཇུག་གནང་རྒྱུ།

༄༅༎ཟླ་བ་འགའ་ཤས་ནས་གོང་ནས་བཟུང་རྒྱ་གར་གྱི་མནའ་འབྲེལ་གཞུང་འཛིན་གྱི་ཏར་འཕྲིན་བློན་ཆེན་ཨེ་ ར་ཇེས་གཙོས་པས་འབྲེལ་ཡོད་ཁག་ཅིག་ནས་འདས་པའི་ལོ་ཤས་ནང་ཚུད་ལུགས་དང་མ་མཐུན་པའི་ཐོག་ནས་ཚོང་དོན་ཚན་པ་འགའ་ཤས་ལ་ཆོག་ཆ་སྤྲད་པ་དང་། དེ་བཞིན་རྒྱལ་ས་ལྡི་ལིའི་ནང་ཚུགས་པའི་རྩེད་འགྲན་ཆེན་མོ་བཅས་ཀྱི་ལས་དོན་ཁག་འཐུས་ཚང་མེད་པའི་ཁར་ལྐོག་ཟ་རུལ་སུངས་ཚབས་ཆེ་བྱུང་བའི་ཉེས་བཙུགས་བྱས་པ་དང་དེ་དག་གི་ཐོག་ཕྱོགས་འགལ་ཚོགས་པ་ཚོས་ཟུང་སྦྲེལ་གྱི་ཞིབ་མཇུག་ཚོགས་ཆུང་བཙུགས་དགོས་ལུགས་བཤད་པ་སོགས་ཀྱིས་གྲོས་ཚོགས་སྔོན་མའི་ཚོགས་ཐེངས་དེ་བཞིན་རྙོག་ཁྲའི་འོག་ཡག་པོ་ཞིག་ཚོགས་ཐུབ་མེད་པ་རེད། འོན་ཀྱང་ད་རིང་སྔོན་རྩིས་ཀྱི་གྲོས་ཚོགས་ཚུགས་ཡོད་པ་མ་ཟད་སྲིད་བློན་མཆོག་གིས། སྔོན་མའི་གྲོས་ཚོགས་ཚོགས་དུས་དང་མི་འདྲ་བར་ཐེངས་འདིར་ཞི་འཇག་དང་། དོན་འབྲས་ལྡན་པའི་གྲོས་ཚོགས་ཚུགས་ཐུབ་པའི་རེ་བ་བྱེད་ཀྱི་ཡོད་ཅེས་གསར་འགོད་པ་ཚོར་འགྲེལ་བརྗོད་གནང་ཡོད་པ་རེད།