རྒྱ་གར་གྱི་དབུས་མཁའ་འགྲུལ་གྱི་བློན་ཆེན་གསར་པ་བསྐོ་བཞག

༄༅༎རྒྱ་གར་གཞུང་གིས་ཨུ་ཏར་པར་རྡེ་ཤེ་མངའ་སྡེའི་ས་གནས་འོས་བསྡུར་དམིགས་ཏེ་ ར་ཤེ་ཊི་རི་ཡ་ ལོཀ་རྡལ་(Rashtriya Lok Dal) ཞེས་པའི་ཆབ་སྲིད་ཚོགས་པའི་དབུ་ཁྲིད་ཨ་ཇིརྡ་སིང་(Ajit Singh)དབུས་གཞུང་གི་མཁའ་ལམ་འགྲིམ་བཞུད་བློན་ཆེན་དུ་བསྐོ་བཞག་གནང་ཡོད་འདུག
རེས་གཟའ་ཉི་མའི་ཉིན་དགུང་ལོ་༧༢ལ་ཕེབས་པའི་ཨ་ཇིརྡ་སིང་ད་བར་ཐེངས་བཞིན་བློན་ཆེན་བསྐོར་གནང་བྱུང་ཡོད་པ་དང་ ཁོང་གི་ར་ཤེ་ཊི་རི་ཡ་ལོཀ་དལ་ཚོགས་པས་ཀོངྒེརེསེ་ཚོགས་པས་སྣེ་ཁྲིད་པའི་ཆིག་སྒྲིལ་ཡར་ཐོན་ཚོགས་པར་རྒྱབ་སྐྱོར་གནང་བ་དེས་ གྲོས་ཚོགས་མནའ་སྦྲེལ་གཞུང་འཛིན་ཚོགས་པར་གྲོས་ཚོགས་ཀྱི་ཞབས་སྟེགས་རྩ་འབོར་༥༤༣ཡོད་པ་ནས་ཞབས་སྟེགས་༢༧༢ལས་མེད་ཀྱང་ད་ཆ་༢༧༧ལ་འཕར་ཡོད་འདུག། ཨ་ཇིརྡ་སིང་ཆབ་སྲིད་ནང་མ་ཞུགས་གོང་ལོ་བཅོ་ལྔའི་རིང་ཨ་མི་རི་ཀར་ཀོམ་པུ་ཊར་ཆེད་ལས་པ་གནང་རྗེས་ཕྱི་ལོ་༡༩༨༦ལོར་རང་ཡུལ་དུ་ཕྱིར་ལོག་གིས་ཆབ་སྲིད་ནང་འཛུལ་ཞུགས་ཀྱིས་གྲོས་ཚོགས་འོག་མའི་ཁྲིམས་བཟོ་ཐེངས་དྲུག་གནང་མྱོང་ཡོད་པ་རེད། ནུབ་ཕྱོགས་ཨུ་ཏར་པར་རྡེ་ཤེ་མངའ་སྡེའི་ནང་ཁོང་གི་ཚོགས་པར་ནུས་པ་གང་འཚམས་ཡོད་པར་བརྟེན་གཞུང་འཛིན་ཚོགས་པར་རིང་མིན་འོས་བསྡུའི་སྐབས་ཁོང་གི་ཚོགས་པས་རྒྱབ་སྐྱོར་ཐོབ་པའི་ཆེད་དུ་ཁོང་གློ་བུར་དུ་བློན་ཆེན་དུ་བསྐོ་གནང་གནང་བར་ངོས་འཛིན་བྱེད་ཀྱི་ཡོད་འདུག།