རྒྱ་གར་སྲིད་བློན་འབར་མར་འཚམས་གཟིགས་ཕེབས་འཆར༎

༄༅༎འབར་མའི་མང་གཙོ་ཚོགས་པའི་དབུ་ཁྲིད་ལྕམ་ཨང་སན་སུ་ཆི་མཆོག་ལ་འོས་བསྡུའི་རྒྱལ་ཁ་ཆེན་པོ་ཐོབ་རྗེས་ རྒྱ་གར་གྱི་སྲིད་བློན་མཱན་མོ་ཧན་སིང་མཆོག་གིས་ ཁོང་རིང་མིན་འབར་མའི་ནང་གཟིགས་སྐོར་ཕེབས་རྒྱུ་ཡིན་སྐོར་གསུང་ཡོད་ལུགས་རྒྱ་གར་གཞུང་གི་དཔོན་རིགས་ཤིག་གིས་དེ་རིང་གསུང་བཞག། རྒྱ་གར་གྱི་སྲིད་བློན་སིང་མཆོག་གི་གཟིགས་སྐོར་དེ་ནི་ མི་ལོ་༢༥རྗེས་སུ་རྒྱ་གར་གྱི་སྲིད་བློན་འབར་མའི་ནང་གཟིགས་སྐོར་ཕེབས་པ་ཐོག་མ་དེ་ཆགས་རྒྱུ་ཡིན་པ་རེད།
མིང་འདོན་གནང་འདོད་མེད་པའི་རྒྱ་གར་གཞུང་གི་དཔོན་རིགས་དེས་གསུང་པར་གཞིགས་ན་ སྲིད་བློན་མཱན་མོ་ཧན་སིང་མཆོག་ཟླ་བ་རྗེས་མ་འབར་མའི་ནང་གཟིགས་སྐོར་ཕེབས་འཆར་ཡོད་འདུག་ འོན་ཀྱང་ཞིབ་གསལ་མཛད་འཆར་སྐོར་གང་ཡང་གསུང་མིན་འདུག་། འབར་མའི་ནང་རྒྱ་ནག་གི་ཤུགས་རྐྱེན་འགོག་ཐབས་སུ་འདས་པའི་མི་ལོ་བཅུ་ཕྲག་གཅིག་ལྷག་ཙམ་ནས་བཟུང་རྒྱ་གར་གཞུང་གིས་འབར་མའི་དྲག་པོའི་གཞུང་དང་ལྷན་དུ་མཐུན་འབྲེལ་དམ་ཟབ་གནང་ཡོད་པ་རེད། རྒྱ་གར་གཞུང་གི་མཛད་ཇུས་དེར་ རྒྱལ་སྤྱིའི་ངོས་ནས་སྐྱོན་བརྗོད་ཞུ་མཁན་ཡང་མང་པོ་བྱུང་ཡོད་པ་ དཔེར་ན་ཕྱི་ལོ་༢༠༡༠ལོར་ ཨ་མི་རི་ཀའི་སྲིད་འཛིན་སྦ་རཀ་ཨོ་སྦ་མ་མཆོག་རྒྱ་གར་ནང་གཟིགས་སྐོར་ཕེབས་སྐབས་ ཁོང་གིས་ འབར་མའི་དྲག་པོའི་གཞུང་གིས་འགྲོ་བ་མིའི་ཐོབ་ཐང་ལ་བརྩི་མེད་རྡོག་རོལ་གཏོང་བཞིན་ཡིན་ཀྱང་ རྒྱ་གར་གཞུང་གིས་གང་ཡང་གསུང་གི་མིན་འདུག་ཅེས་སྐྱོན་བརྗོད་ཞུས་ཡོད་པ་རེད།
འོན་ཀྱང་སྔ་ལོ་འབར་མའི་ནང་བཟང་ཕྱོགས་ཀྱི་འགྱུར་བ་ཕྱིན་ནས་ཡུལ་དེ་མང་གཙོའི་ཕྱོགས་སུ་བསྐྱོད་ཐུབ་པ་དེས་རྒྱ་གར་གྱིས་འབར་མའི་མཉམ་དུ་འབྲེལ་བ་བྱས་པ་དེ་འགྲིགས་ཡོད་པའི་ཚོར་བ་ཞིག་རྒྱ་གར་གཞུང་ལ་བྱུང་ཡོད་པ་རེད།