ཕྱི་ལོ་ཉིས་སྟོང་བཅུ་ལོའི་འབར་མའི་འོས་བསྡུ་དྲང་བདེན་ཡོང་མིན།

༄༅༎དེ་རིང་རེས་གཟའ་མིག་དམར་ཉིན་ཨིན་ཌོ་ནེ་ཤི་ཡའི་གཞུང་གིས་གལ་ཏེ་འབར་མའི་དྲག་པོའི་གཞུང་གིས་དོ་དམ་བཀག་ཉར་འོག་ཏུ་གནས་བཞིན་པའི་དམངས་གཙོའི་དབུ་ཁྲིད་ལྕམ་ཨོང་སན་སུ་ཆི་གློད་འགྲོལ་མ་བཏང་བར་དྲག་པོའི་གཞུང་གིས་ཕྱི་ལོ་ཉིས་སྟོང་བཅུ་ལོའི་འོས་བསྡུའི་ལས་དོན་སྤེལ་བ་ཡིན་ནའང་རྒྱལ་སྤྱིའི་སྤྱི་ཚོགས་ཀྱིས་འོས་བསྡུ་དེ་དྲང་བདེན་བྱུང་ཡོད་པ་ངོས་ལེན་ཞུ་ཐུབ་ཀྱི་མ་རེད་ཅེས་གསུངས་ཡོད་པ་རེད།

ཨིན་ཌོ་ནེ་ཤི་ཡའི་གཞུང་གིས་ལྷོ་ཤར་ཨེ་ཤེ་ཡའི་རྒྱལ་ཁབ་ཚོར་འབར་མའི་དྲག་པོའི་གཞུང་གིས་འགྲོ་བ་མིའི་ཐོབ་ཐང་རྩིས་མེད་རྡོག་རོལ་གཏོང་བའི་བྱ་སྤྱོད་ལ་རྣོ་ངར་ཆེ་བའི་བྱ་ཐབས་ལག་བསྟར་ཞིག་བྱ་དགོས་གལ་ཆེ་བའི་གནོན་ཤུགས་སྤྲོད་བཞིན་པ་ལྟར་ཨིན་ཌོ་ནེ་ཤི་ཡའི་ཕྱི་སྲིད་བློན་ཆེན་ཧ་སན་ལྦི་ར་ཡུ་རྡ་ཡིས་དེང་སྐབས་ཨིན་ཌོ་ནེ་ཤི་ཡའི་གླིང་ཕྲན་ཐོག་ཚོགས་བཞིན་པའི་ལྷོ་ཤར་ཨེ་ཤེ་ཡའི་ཡུལ་ཁག་གི་ལྷན་ཚོགས་ཀྱི་ཟུར་ཏུ་ཨེ་པི་གསར་འགོད་པར་གསུངས་དོན་ལ་ང་ཚོ་ཨིན་ཌོ་ནེ་ཤི་ཡའི་རྒྱལ་ཁབ་ཀྱི་ཐོག་ནས་འབར་མའི་དྲག་པོའི་གཞུང་ལ་མ་འོངས་པའི་འོས་བསྡུའི་ལས་དོན་ནང་ངེས་པར་དུ་འབར་མའི་ནང་གི་སྤྱི་ཚོགས་ཀྱི་ཚོགས་པ་ཡོངས་རྫོགས་མཉམ་ཞུགས་ཐུབ་པ་བྱ་རྒྱུ་གལ་འགངས་ཆེན་པོ་ཡིན་པའི་སྐོར་ཐད་ཀར་བཀའ་མོལ་ཞུ་གི་ཡོད་ལ་ལྷག་པར་དུ་འོས་བསྡུའི་ལས་དོན་ནང་འབར་མའི་དམངས་གཙོའི་དབུ་ཁྲིད་ལྕམ་ཨོང་སན་སུ་ཆི་ཡི་དམངས་གཙོ་ཚོགས་པ་མཉམ་ཞུགས་བྱ་རྒྱུ་དང་ཁོང་དོ་དམ་འོག་ནས་གློད་འགྲོལ་བཏང་སྟེ་འོས་བསྡུའི་ལས་དོན་དྲང་བདེན་དང་དམངས་གཙོ་ལྡན་པ་ཡོང་རྒྱུའི་ཆ་རྐྱེན་སྐྲུན་དགོས་ཀྱི་རེད་ཅེས་དང་ད་ལྟ་ནས་རྩིས་པའི་མ་འོངས་ཕྱི་ལོ་ཉིས་སྟོང་བཅུ་བར་གྱི་དུས་ཚོད་དེའི་ནང་ང་ཚོས་འབར་མའི་དྲག་པོའི་གཞུང་གིས་རང་དབང་དང་དྲང་བདེན།དམངས་གཙོ་དང་ལྡན་པའི་འོས་བསྡུའི་ལས་དོན་ཞིག་སྤེལ་རྒྱུ་དང་དེར་རྒྱལ་སྤྱིའི་སྤྱི་ཚོགས་ཀྱིས་ངོས་འཛིན་བྱ་ཐུབ་པའི་ལས་དོན་ཐད་ཡར་རྒྱས་ཀྱི་ཁ་ཕྱོགས་ཇི་འདྲ་ཞིག་ཐོག་བསྐྱོད་ཀྱི་ཡོད་མེད་དོ་སྣང་བྱ་རྒྱུ་ཡིན་ཞེས་གསུངས་ཡོད་པ་རེད།