རྒྱ་གར་དུ་བོད་ཁྱིམ་སློབ་ཕྲུག་བར་མཚན་ཉིད་འགྲན་བསྡུར།

༄༅༎རྒྱ་གར་ནང་ཡོད་པའི་མ་སུ་རི་བོད་ཁྱིམ་སློབ་གྲའི་ནང་གཞི་རིམ་སློབ་གྲ་ནང་ཁུལ་གྱི་མཚན་ཉིད་འགྲན་བསྡུར་ཐེངས་གཉིས་པ་དེ་ཚུགས་བཞག

དེ་ཡང་མ་སུ་རི་བོད་ཁྱིམ་ནས་གོ་སྒྲིག་གནང་བའི་ཐོག་བོད་ཁྱིམ་སློབ་གྲྭའི་ཚེ་རིང་སྒྲོལ་མ་ཚོགས་ཁང་ནང་མཚན་ཉིད་འགྲན་བསྡུར་དེ་ཚོགས་ཡོད་པ་དང་ཉིན་གཉིས་ཀྱི་མཚན་ཉིད་འགྲན་བསྡུར་དེའི་དབུ་འབྱེད་མཛད་སྒོའི་སྐུ་མགྲོན་གཙོ་བོར་ས་སྐྱ་མཐོ་སློབ་ཀྱི་མཁན་པོ་རྒྱ་མཚོ་ལགས་ཕེབས་ཡོད་པ་དང་མ་སུ་རི་བོད་ཁྱིམ་སློབ་གྲྭའི་དབུ་འཛིན་བཀྲིས་ཕུན་ཚོགས་ལགས་ཀྱིས་སྐུ་མགྲོན་རྣམ་པར་འཚམས་འདྲི་ཞུས་གནང་བཞག ཐེངས་འདིའི་འགྲན་བསྡུར་ནང་མ་སུ་རི་གཏན་འཇགས་སློབ་གྲྭ་དང་སྤོན་གྲ་གཏན་སློབ།རྡ་ས་བོད་ཁྱིམ་སློབ་གྲྭ།སུ་ཇ་བོད་ཁྱིམ་སློབ་གྲྭ།སམ་སྦོ་ཌའི་སློབ་ཁོངས་ཅོན་ཏ་ར་དང་སྦུན་ཏར་བདེ་སྐྱིད་གླིང་དེ་བཞིན་མ་སུ་རི་དང་ར་ཇེ་པུར་བོད་ཁྱིམ་བཅས་ཀྱི་འཛིན་རིམ་བདུན་པ་དང་བརྒྱད་པའི་སློབ་ཕྲུག་རྣམས་ནས་མཉམ་ཞུགས་གནང་བཞག འཛིན་རིམ་བདུན་པའི་མཚན་ཉིད་འགྲན་བསྡུར་གྱི་ཨང་དང་པོ་དེ་རྡ་ས་བོད་ཁྱིམ་སློབ་གྲྭར་ཐོབ་ཡོད་པ་དང་ར་ཇེ་པུར་བོད་ཁྱིམ་སློབ་གྲྭ་དང་སུ་ཇ་བོད་ཁྱིམ་སློབ་གྲྭར་ཨང་གཉིས་པ་དང་གསུམ་པའི་བྱ་དགའ་ཐོབ་བཞག འཛིན་རིམ་བརྒྱད་པའི་མཚན་ཉིད་འགྲན་བསྡུར་གྱི་བྱ་དགའ་ཨང་དང་པོ་དེ་སུ་ཇ་བོད་ཁྱིམ་སློབ་གྲྭ་དང་མ་སུ་རི་བོད་ཁྱིམ་དང་རྡ་ཤོད་བོད་ཁྱིམ་སློབ་གྲྭ་ཨང་གཉིས་པ་དང་གསུམ་པའི་བྱ་དགའ་གསོལ་སྩལ་བྱུང་བཞག བཙན་བྱོལ་གཞུང་གི་ཤེས་རིག་བཀའ་བློན་མཆོག་གིས་བྱ་དགའ་གསོལ་སྩལ་གནང་བཞག བོད་པའི་གཞི་རིམ་སློབ་གྲྭ་ནང་ཁུལ་དབར་གྱི་མཚན་ཉིད་འགྲན་བསྡུར་ཐེངས་དང་པོ་དེ་ཕྱི་ལོ་༢༠༠༥ལོར་ཚུགས་ཡོད་པ་རེད།