རྒྱལ་སྤྱིའི་བོད་དོན་ལས་འགུལ་ཁང་གིས་རྒྱ་ནག་ལ་་སྐྱོན་བརྗོད།

༄༅༎རྒྱ་བོད་གཉིས་དབར་བཞག་པའི་གྲོས་མཐུན་དོན་ཚན་༡༧སྐོར་རྒྱ་ནག་གཞུང་གི་ལོ་རྒྱུས་ལ་འཁྱོག་བཤད་ཅན་གྱི་དྲིལ་བསྒྲགས་བྱེད་བཞིན་པ་དེས་བོད་རྒྱའི་དཀའ་རྙོག་སེལ་ཐབས་ལ་འགོག་རྐྱེན་བཟོ་ཡི་ཡོད་པའི་སྐོར་རྒྱལ་སྤྱིའི་བོད་དོན་ལས་འགུལ་ཁང་གིས་སྐྱོན་བརྗོད་གསལ་འདོན་གནང་བཞག་༎

༡༩༥༡ལོའི་ཕྱི་ཟླ་༥པའི་ཚེས་༢༣ཉིན་བོད་རྒྱའི་དབར་གྲོས་མཐུན་དོན་ཚན་༡༧བཞག་ཏེ་ད་ཆ་ལོ་ངོ་དྲུག་བཅུ་འཁོར་ལ་ཉེ་བའི་སྐབས་རྒྱ་ནག་གཞུང་གིས་གོང་གསལ་གྱི་གྲོས་མཐུན་གཞིར་བཟུང་སྟེ་ བོད་བཅིངས་བཀྲོལ་བཏང་ནས་ལོ་ངོ་དྲུག་བཅུ་འཁོར་བ་ཟེར་བའི་དུས་དྲན་སྲུང་བརྩི་ཞུ་འཆར་ཡོད་པ་རེད་ རྒྱ་ནག་གི་གཞུང་འབྲེལ་གསར་འགྱུར་བརྒྱུད་ལམ་ཁག་གིས་དུས་དྲན་སྲུང་བརྩི་དང་འབྲེལ་བའི་གནས་ཚུལ་བཀོད་ཕྱོགས་ནང་ གྲོས་མཐུན་དོན་ཚན་༡༧གྱི་ལོ་རྒྱུས་ལ་འཁྱོག་བཤད་བྱས་ཏེ་ བོད་ཐོག་རྒྱ་ནག་གི་བདག་དབང་དག་བུད་་བྱེད་ཐབས་བྱེད་བཞིན་པ་དེར་ ཨ་རིའི་རྒྱལ་ས་ལྦ་ཤིང་ཀྲོན་ཏུ་རྟེན་གཞི་བྱས་པའི་རྒྱལ་སྤྱིའི་བོད་དོན་ལས་འགུལ་ཁང་གིས་སྐྱོན་བརྗོད་བྱས་འདུག དེ་ཡང་ཚེས་༡༩ཉིན་རྒྱལ་སྤྱིའི་བོད་དོན་ལས་འགུལ་ཁག་གིས་གསར་འགོད་གསལ་བསྒྲགས་ཤིག་སྤེལ་བ་བརྒྱུད་ རྒྱ་ནག་གཞུང་གིས་ད་ལྟ་བོད་ཐོག་དངོས་སུ་ལག་བསྟར་བྱེད་བཞིན་པའི་སྲིད་ཇུས་དང་ གྲོས་མཐུན་དོན་ཚན་བཅུ་བདུན་ཀྱི་ནང་དོན་དབར་བར་ཁྱད་ཤིན་ཏུ་ཆེ་བའི་སྐོར་གསལ་འདོན་བཞག རྒྱལ་སྤྱིའི་བོད་དོན་ལས་འགུལ་ཁང་གི་ཚོགས་གཙོ་ལྕམ་མེ་རི་སྦེཐ་མའར་ཀི་Mary Beth Markeyལགས་ཀྱིས་་ རྒྱ་ནག་གཞུང་གིས་གྲོས་མཐུན་དོན་ཚན་༡༧པའི་དགའ་སྟོན་སྲུང་བརྩི་བྱེད་པ་དེ་ རྒྱ་ནག་གཞུང་གིས་བོད་མི་རྣམས་ལ་རང་དབང་དང་ཐོབ་ཐང་ཁས་ལེན་བྱས་པ་དེ་དག་ དངོས་སུ་དོན་འཁྱོལ་ཅི་ནས་མེད་པའི་དགའ་སྟོན་སྲུང་བརྩི་ལྟ་བུ་ཡིན་པའི་སྐོར་སྐྱོན་བརྗོད་གནང་བཞག་  རྒྱལ་སྤྱིའི་བོད་དོན་ལས་འགུལ་ཁག་གིས་གསར་འགོད་གསལ་བསྒྲགས་ནང་གསལ་ལྟར་ན་ རྒྱ་བོད་དབར་གྱི་གྲོས་མཐུན་དོན་ཚན་༡༧པའི་ནང་ བོད་མི་རྣམས་ལ་རང་སྲིང་རང་སྐྱོང་གི་ཐོབ་ཐང་ཁས་ལེན་བྱས་ཡོད་ཀྱང་ གྲོས་མཐུན་གཏན་འབེབས་བྱས་པ་བཟུང་ འདས་པའི་ལོ་ངོ་༦༠ཐམ་པའི་རིང་ རྒྱ་ནག་གཞུང་གིས་གྲོས་མཐུན་གྱི་དོན་ཚན་ཁག་ལ་བརྩི་སྲུང་བྱ་རྒྱུའི་ཚབ་ ཐུན་མོང་མ་ཡིན་པའི་བོད་མིའི་ཆོས་དང་རིག་གཞུང་སྐད་ཡིག་བཅས་པར་ རྩ་རླག་གཏོང་རྒྱུའི་སྲིད་ཇུས་ལག་བསྟར་བྱས་དང་བྱ་མུས་ཁར་ བོད་མི་ཚོའི་གཞི་རྩའི་འགྲོ་བ་མིའི་ཐོབ་ཐང་ལ་བརྩི་མེད་རྡོག་རོལ་གཏོང་མུས་ཡིན་པའི་བྱ་སྤྱོད་གསལ་འདོན་གནང་ཡོད་པ་རེད་༎