རྒྱ་གར་བོད་གྲོགས་པོ་ཚོགས་པའི་ཡན་ལག་གསར་བཙུགས།

༄༅༎རྒྱ་གར་བོད་ཀྱི་གྲོགས་པོ་ཚོགས་པས་གོའོ་ཨ་ཁུལ་ཚོགས་པའི་ཡན་ལག་ཅིག་ཕྱི་ཚེས་༢༦ཉིན་གསར་འཛུགས་གནང་བཞག། ཚོགས་པ་གསར་པ་དེའི་ནང་གོའོ་ཨ་ས་གནས་ཀྱི་རྒྱ་གར་མི་སྣ་གྲགས་ཅན་ཁག་ཅིག་དང་བོད་རིགས་བཅས་ཡོད་པ་དང༌། ཚོགས་པ་དེའི་དམིགས་ཡུལ་ནི་ སྤྱི་དམངས་ཀྱི་ངོས་ནས་རང་དབང་དང་འགྲོ་བ་མིའི་ཐོབ་ཐང་དང་འབྲེལ་བའི་གྲོས་མོལ་ཁག་ལ་དོ་སྣང་བྱ་རྒྱུའི་དོན་དུ་ཡིན་པ་རེད།

གོའོ་ཨ་ས་གནས་རྒྱ་གར་བོད་ཀྱི་གྲོགས་པོ་ཚོགས་པའི་དྲུང་ཆེ་ཨ་པར་ན་ཤའ་ཡིས་རེས་གཟའ་སྤེན་པའི་ཉིན་ཟུང་འབྲེལ་གསར་འགོད་ལྷན་ཚོགས་ཤིག་གི་ཐོག་འགྲེལ་བརྗོད་གནང་ཡག་ལ། ༡༩༦༠ལོར་གསར་འཛུགས་གནང་བའི་རྒྱ་གར་བོད་ཀྱི་གྲོགས་པོ་ཚོགས་པའི་དམིགས་ཡུལ་ནི་རྒྱ་གར་དང་བོད་ཀྱི་མི་མང་དབར་ཕན་ཚུན་དུས་ཡུན་རིང་པོ་ནས་ཡོད་བཞིན་པའི་རིག་གཞུང་དང་ཆོས་ཕྱོགས་ཀྱི་འབྲེལ་བ་དེ་བཞིན་མུ་མཐུད་སྲུང་སྐྱོབ་དར་སྤེལ་དང་སྲ་བརྟན་གནས་ཐབས་བཅས་ཡིན་སྐོར་འགྲེལ་བརྗོད་གནང་བཞག གོའོ་ཨ་ས་གནས་རྒྱ་གར་བོད་ཀྱི་གྲོགས་པོ་ཚོགས་པས་གོའོ་ཨ་མང་ཚོགས་ལ་རྒྱ་གར་ཁྱོན་ཡོངས་ཀྱི་ནང་ཞི་བདེ་དང་བདེ་སྐྱིད་ཕུན་སུམ་ཚོགས་པ་གོང་འཕེལ་གཏོང་རྒྱུའི་གོ་རྟོག་སྤེལ་བ་བརྒྱུད་། བོད་མི་ཚོར་གོའོ་ཨ་མི་མང་གིས་རྒྱབ་སྐྱོར་གནང་བའི་རེ་བ་ཡོད་ཅེས་ ཚོགས་པའི་དྲུང་ཆེ་ཨ་པར་ན་ཤའ་ཡིས་གསུང་འདུག།

ཉེ་ཆར་གསར་འཛུགས་གནང་བའི་གོའོ་ཨ་ས་གནས་རྒྱ་གར་བོད་ཀྱི་གྲོགས་པོ་ཚོགས་པའི་ཚོགས་གཙོ་ཇ་ཡནཏ་ཤའ་དང༌། ཚོགས་གཞོན་ ཚེ་རིང་ཆོས་འཕེལ་ལགས། དྲུང་ཆེ་ཨ་པར་ན་ཤའ་དང༌། དྲུང་གཞོན་ཚེ་དབང་ཆོས་འཕེལ་ལགས། དངུལ་གཉེར་ཚེ་རིང་ཆོས་སྐྱིད་ལགས་བཅས་རེད་འདུག།