ཁེ་ན་ཊའི་ཕྱི་མི་གཞིས་སྤོས་ལས་ཁུངས་ཀྱི་བློན་ཆེན་དང་མཇལ་བ།

ནང་སྲིད་བཀའ་བློན་རྒྱ་རི་སྒྲོལ་མ་མཆོག་གིས་ཁེ་ན་ཊའི་ཕྱི་མི་གཞིས་སྤོས་ལས་ཁུངས་ཀྱི་བློན་ཆེན་དང་མཇལ་འཕྲད་ཀྱིས་འཚམས་འདྲི་ཞུས་གནང་འདུག  
དེ་ཡང་བོད་མིའི་སྒྲིག་འཛུགས་ཀྱི་ནང་སྲིད་བཀའ་བློན་རྒྱ་རི་སྒྲོལ་མ་མཆོག་གིས་ཁ་ས་ཕྱི་ཚེས་༡༡་ཉིན་རྒྱ་གར་གྱི་རྒྱལ་ས་ལྡི་ལི་གསར་པའི་ནང་ཁེ་ན་ཊའི་ཕྱི་མི་གཞིས་སྤོས་ལས་ཁུངས་ཀྱི་བློན་ཆེན་གསར་པ་ལྕམ་Shannon  Fraserམཆོག་དང་མཇལ་འཕྲད་ཞུས་ནས་འཚམས་འདྲིའི་མཇལ་དར་ཕུལ་བ་དང་སྦྲགས་ཁེ་ན་ཊའི་གཞུང་གིས་ད་བར་བོད་དོན་ཐོག་རྒྱབ་སྐྱོར་གནང་བར་ཐུགས་རྗེ་ཞུས་པ་མ་ཟད། དེང་སྐབས་ཁེ་ན་ཊའི་ནང་བོད་མི་གཞིས་སྤོས་ཀྱི་ལས་གཞིའི་སྐོར་ལ་འགྲེལ་བཤད་སྐྱོན་གནང་འདུག དེ་བཞིན་དུ་བཀའ་བློན་མཆོག་ནས་དོགས་སེལ་དགོས་པའི་གནད་དོན་ཆུང་ཙག་ཁག་གཅིག་གི་ཐོག་ལ་ལམ་སྟོན་ཡང་ཞུས་འདུག སྐབས་དེར་ཁེ་ན་ཊའི་ཕྱི་མི་གཞིས་སྤོས་ལས་ཁུངས་ཀྱི་བློན་ཆེན་མཆོག་དང་ཁོང་གི་ཕྱག་རོགས་ལྕམ་Lillian Zadravetzརྣམ་གཉིས་ཀྱིས་ཀྱང་ནང་སྲིད་བཀའ་བློན་རྒྱ་རི་སྒྲོལ་མ་མཆོག་དབུས་པའི་བོད་མིའི་སྐུ་ཚབ་རྣམ་པར་གནས་ཚུལ་ཞིབ་ཕྲ་ངོ་སྤྲོད་གནང་བར་ཐུགས་རྗེ་ཆེ་ཞུས་པ་དང་སྦྲགས་ཁེ་ན་ཊར་བོད་མི་གཞིས་སྤོས་ལས་གཞི་འདི་མདུན་བསྐྱོད་བྱེད་བཞིན་པར་འདོད་བློ་ཁེངས་པོ་བྱུང་ཡོད་པའི་རྣམ་པ་ཤུགས་ཆེ་སྟོན་གནང་འདུག ཁོང་རྣམ་གཉིས་ཀྱིས་དོགས་སེལ་དགོས་པའི་གནད་དོན་དེ་དག་གི་ཐོག་གཟིགས་ཞིབ་གནང་རྒྱུའི་ཞལ་བཞེས་ཀྱང་གནང་འདུག ནང་སྲིད་བཀའ་བློན་རྒྱ་རི་སྒྲོལ་མ་མཆོག་གི་ལྷན་དུ་རྒྱ་གར་གྱི་རྒྱལ་ས་ལྡི་ལི་གསར་པར་ཡོད་པའི་ལྡི་ལི་སྐུ་ཚབ་དོན་གཅོད་ཁང་གི་དྲུང་ཆེ་ཚེ་དབང་རྒྱལ་པོ་ལགས་ཀྱང་ལྷན་བཅར་ཞུས་གནང་འདུག

གསར་འགོད་པ་བསོད་ནམས་ལྷ་མོ།