ཤེས་རིག་བཀའ་བློན་མཆོག་གིས་ཁེ་ན་ཌའི་རྒྱལ་ས་ཨོ་ཊ་ཝར་འཚམས་གཟིགས།

ཤེས་རིག་བཀའ་བློན་པདྨ་དབྱངས་ཅན་མཆོག་དང་བྱང་ཨ་རིའི་སྐུ་ཚབ་དོན་གཅོད་དངོས་གྲུབ་ཚེ་རིང་ལགས་རྣམ་གཉིས་ཀྱིས་ཁེ་ན་ཌའི་རྒྱལ་ས་ཨོ་ཊ་ཝ་རུ་འཚམས་གཟིགས་གནང་ཡོད་པ་རེད།
དེ་ཡང་དབུས་བོད་མིའི་སྒྲིག་འཛུགས་ཀྱི་གནས་ཚུལ་ལྟར་ན། ཤེས་རིག་བཀའ་བློན་པདྨ་དབྱངས་ཅན་མཆོག་དང་བྱང་ཨ་རིའི་སྐུ་ཚབ་དོན་གཅོད་དངོས་གྲུབ་ཚེ་རིང་ལགས་རྣམ་གཉིས་ཀྱིས་ཁེ་ན་ཌའི་གཞུང་གིས་བོད་མིའི་སྒྲིག་འཛུགས་ཤེས་རིག་ལས་ཁུངས་ལ་གནང་བཞིན་པའི་རོགས་སྐྱོར་རྒྱུན་གནས་ཡོང་ཆེད་སྤྱི་ཟླ་༧་པའི་ཚེས་༣༠་ཉིན་ནས་ཁེ་ན་ཌའི་རྒྱལ་ས་ཨོ་ཊ་ཝར་འཚམས་གཟིགས་གནང་བ་ཞིག་ཡིན་པ་དང་། ཤེས་རིག་བཀའ་བློན་མཆོག་དང་སྐུ་ཚབ་དོན་གཅོད་རྣམ་གཉིས་ཀྱིས་ཁེ་ན་ཌ་རྒྱལ་སྤྱིའི་ཡར་རྒྱས་ལས་ཁུངས་ཀྱི་ངེས་སྟོན་པ་དང་ཐུག་འཕྲད་གནང་སྟེ་རོགས་དངུལ་ཀྱི་དགོས་མཁོའི་རང་བཞིན་དང་། དཀའ་ངལ་སྐོར་འགྲེལ་བརྗོད་གནང་ཡོད། སྐབས་དེར་ངེས་སྟོན་པས་ཁཱ་ན་ཌ་གཞུང་གིས་རྒྱབ་སྐྱོར་གནང་བཞིན་ཡོད་པ་ལྟར། མགྱོགས་མྱུར་ཁེ་ན་ཌ་གཞུང་གིས་གཞུང་འབྲེལ་ཐོག་གསལ་བསྒྲགས་གནང་རྒྱུ་ཡིན་པ་གསུངས་འདུག
གཞན་ཡང་བཀའ་བློན་མཆོག་དང་སྐུ་ཚབ་དོན་གཅོད་རྣམ་གཉིས་ནས་ཁེ་ན་ཌའི་ཆོས་དད་རང་དབང་དང་སྲིད་བྱུས་སློབ་སྟོན་ཚན་པའི་ངེས་སྟོན་པ་དང་ཐུག་འཕྲད་ཀྱིས་ད་ལྟའི་བོད་ནང་གི་གནས་སྟངས་དང་། ཕྱོགས་མཚུངས་ཉེ་ཆར་ཨ་རིའི་ཕྱི་སྲིད་ལྷན་ཁང་གིས་བསྐོངས་པའི་རྒྱལ་སྤྱིའི་བློན་ཆེན་རིམ་པའི་ཆོས་དད་རང་དབང་གི་ཚོགས་ཆེན་སྐོར་སྙན་སེང་ཞུས་ཡོད་པ་རེད།
དེ་མིན་བཀའ་བློན་མཆོག་དང་སྐུ་ཚབ་དོན་གཅོད་རྣམ་གཉིས་ནས་ཁེ་ན་ཌའི་རྒྱ་གར་གཞུང་ཚབ་པ་དང་མཇལ་འཕྲད་ཀྱིས་ཀེ་ན་ཌ་ཁུལ་གནས་སྡོད་བོད་མི་རྣམས་རྒྱ་གར་དུ་འགྲོ་རྒྱུའི་མཐོང་མཆན་ཝི་ས་ཐོབ་རྒྱུའི་དཀའ་ངལ་གྱི་གནས་ལུགས་གསལ་བཤད་གནང་ཞིང་།  ཀེ་ན་ཌའི་རྒྱ་གར་གཞུང་ཚབ་ཀྱི་ངོས་ནས་དཀའ་ངལ་དེ་སེལ་ཐབས་གནང་རྒྱུའི་ཁས་ལེན་ཡང་གནང་ཡོད་འདུག

གསར་འགོད་པ་སྟག་ལྷ་རྒྱལ།