རྒྱལ་བ་ཀརྨ་པ་མཆོག་རྒྱལ་སྤྱིའི་ལྷན་ཚོགས་ཤིག་སར་ཆེད་ཕེབས།

༄༅༎རྒྱལ་བ་ཀརྨ་པ་རིན་པོ་ཆེ་མཆོག་ཕྱི་ཚེས་བཞི་ནས་བདུན་གྱི་བར་རྒྱ་གར་ལྷོ་ཕྱོགས་མེ་སོར་གྲོང་ཁྱེར་ནང་བསྐོང་ཚོགས་གནང་བཞིན་པའི་རྒྱལ་སྤྱིའི་འཕྲུལ་རིགས་དང་གློག་བརྙན་བཟོ་བསྐྲུན་གྱི་སྒྱུ་རྩལ་སོགས་དང་འབྲེལ་སྤྲོ་སེང་དང་འཆར་འགོད་ཅེས་པའི་རྒྱལ་སྤྱིའི་ལྷན་ཚོགས་ལ་ཚོགས་བཞུགས་གནང་གི་ཡོད་འདུག

དེ་ཡང་གནས་ཚུལ་ཐོན་ཁུངས་ལ་གཞིགས་ན་རྒྱལ་སྤྱིའི་ལྷན་ཚོགས་དེར་མགྲོན་འབོད་གནང་བའི་སྐུ་མགྲོན་ཆིག་སྟོང་བརྒལ་བ་ཕེབས་ཀྱི་ཡོད་པ་དང་དེའི་ནང་གསུང་བཤད་གནང་མཁན་ཁོངས་ཨ་རིའི་སྲིད་འཛིན་ཟུར་པ་སྦིལ་ཁི་ལིན་ཊེན་དང་དབྱིན་ཇིའི་སྲིད་བློན་གོར་ཌེན་སྦ་རའོན་དེ་བཞིན་མའེ་ཁོ་རོ་སོཕཏི་ཀམ་པིའུ་ཊར་འཕྲུལ་རིགས་ཀྱི་འགན་འཛིན་སྦིལ་གེཏ་སི་གཙོས་གཞན་ཡང་ཚན་རིག་སོགས་ལས་རིགས་འདྲ་མིན་ནས་མི་སྣ་གྲགས་ཅན་མང་པོ་ཞིག་ཕེབས་ཏེ་གསུང་བཤད་གནང་རྒྱུ་ཡིན་པ་དང་ཀརྨ་པ་རིན་པོ་ཆེ་མཆོག་ནས་ལྷན་ཚོགས་དེར་ཚོགས་ཞུགས་ཀྱིས་ཕྱི་ཚེས་བདུན་གྱི་ཉིིན་ལྷན་ཚོགས་ལ་གསུང་བཤད་གནང་གི་ཡོད་འདུག

རྒྱ་གར་གྱི་གསར་ཤོག་ཁག་ནང་གནས་ཚུལ་ཐོན་གསལ་ལ་གཞིགས་ན་ཀརྨ་རིན་པོ་ཆེ་མཆོག་ནས་ད་རེས་རྒྱ་གར་ལྷོ་ཕྱོགས་ལ་ཕེབས་རིང་༸གོང་ས་མཆོག་གི་བཀའ་འབྲེལ་ཉེ་དུས་རྒྱ་གར་ལྷོ་ཕྱོགས་ཀར་ན་ཊ་ཀ་མངའ་སྡེའི་ས་ཁུལ་ཁག་ཅིག་ལ་ཆུ་ལོག་གི་རྐྱེན་པས་མང་ཚོགས་ཆེས་མང་པོ་ཞིག་ལ་གོད་ཆགས་ཆེན་པོ་ཕོག་ཡོད་པར་གོད་ཆགས་ཕོག་པའི་མང་ཚོགས་རྣམས་ལ་དམིགས་ཏེ་སྨོན་ལམ་གསོལ་འདེབས་ཤིག་གི་ཐོག་ཏུའང་ཕེབས་ཀྱི་ཡོད་འདུག