༸སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་ལ་ལ་དྭགས་དཔལ་རྔམ་དུས་སྟོན་གྱི་གཟེངས་རྟགས་འབུལ་རྒྱུ།

བོད་ཀྱི་བླ་ན་མེད་པའི་དབུ་འཁྲིད་༸སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་འགྲོ་བ་མི་སྤྱིའི་བདེ་རྩར་ཕན་པའི་རླབས་ཆེན་གྱི་མཛད་པ་འཕྲིན་ལས་རྣམས་ལ་ཆེས་བསྟོིད་སླད་ལ་དྭགས་དད་ལྡན་མི་མང་ཡོངས་ནས་དཔལ་རྔམ་དུས་སྟོན་གྱི་གཟེངས་རྟགས་འབུལ་རྒྱུ་ཡིན་འདུག རིང་མིན་སྤྱི་ཟླ་༨ པའི་ཚེས་༥ ཉིན་རྒྱ་གར་བྱང་ཕྱོགས་ལ་དྭགས་གླེ་རང་སྐྱོང་རི་ལྗོངས་ཡར་རྒྱས་ལྷན་ཚོགས་ཀྱིས་གོ་སྒྲིག་འོག་༸གོང་ས་༸སྐྱབས་མགོན་ཆེན་པོ་མཆོག་དབུ་བཞུགས་ཐོག་ལ་དྭགས་དཔལ་རྔམ་དུས་སྟོན་སྲུང་བརྩི་ཞུ་རྒྱུ་ཡིན་འདུག་པ་མ་ཟད། སྐབས་དེར་དུས་སྟོན་ཉིན་མོིར་༸མགོན་པོ་གང་ཉིད་མཆོག་ལ་ལ་དྭགས་དཔལ་རྔམ་དུས་སྟོན་གྱི་གཟེངས་རྟགས་འབུལ་བཞེས་མཛད་རྒྱུ་ཡིན་འདུག་ཅིང་། ལ་དྭགས་ནང་ཚོགས་དབུ་སྐྱོང་སྐུ་ཞབས་ཐུབ་བསྟན་ཚེ་དབང་ལགས་ཀྱིས། ད་བར་༧རྒྱལ་བ་རིན་པོ་ཆེ་མཆོག་གིས་རླབས་ཆེན་གྱི་མཛད་པ་འཕྲིན་ལས་ལ་བརྟེན་ནས་འཛམ་གླིང་གི་རྒྱལ་ཁབ་འདྲ་མིན་དང་ཚོགས་སྡེ་ཁག་མང་པོ་ཞིག་ནས་ཆེས་མཐོའི་གཟེངས་རྟགས་མང་དག་ཤིག་ཕུལ་ཡོད་པས། ང་ཚོས་གོ་སྒྲིག་བྱས་པའི་གཟེངས་རྟགས་དེ་བཞིན་ཆུང་འདྲ་དྲགས་པའི་མྱོང་ཚོར་བྱུང་། འོན་ཀྱང་། གསོལ་འདེབས་ཞུས་པ་བཞིན། ༸གོང་ས་༸སྐྱབས་མགོན་ཆེན་པོ་མཆོག་ནས་ཐུགས་བརྩེ་བ་ཆེན་པོས་ཞལ་བཞེས་གནང་བར་ལ་དྭགས་ཀྱི་བསོད་ནམས་རེད་ཅེས་འགྲེལ་་བརྗོད་གནང་བྱུང་།

ལ་དྭགས་དཔལ་རྔམ་དུས་སྟོན་ཞེས་པ་ནི་ལ་དྭགས་ས་གནས་ལ་དབུས་གཞུང་གི་ཐད་སྐྱོང་ས་ཁུལ་གྱི་མིང་མ་ཐོབ་གོང་ནས་སྲུང་བརྩི་ཞུས་སྲོལ་ཡོད་ཅིང་། དཔལ་རྔམ་དུས་སྟོན་གྱི་གཟེངས་རྟག་དེ་ཆོས་སྲིད་གཉིས་ཀའི་ཐད་སྤྱི་ཚོགས་ཞབས་ཞུ་གནང་མཁན་ལ་རྣམས་ལ་འབུལ་སྲོལ་ཡོད་པ་དང་། སྤྱི་ལོ་༢༠༡༩ ལོའི་ཕྱི་ཟླ་༨ ཚེས་༥་ཉིན་རྒྱ་གར་དབུས་གཞུང་ནས་ལ་དྭགས་ས་གནས་དེ་དབུས་གཞུང་གི་ཐད་སྐྱོང་ས་ཁུལ་ལ་ངོས་འཛིན་གྱིས་ཁྱབ་བསྒྲགས་བྱེད་པ་ནས་ཟུང་ལ་དྭགས་དཔལ་རྔམ་དུས་སྟོན་དེ་ཕྱི་ཟླ་༨ པའི་ཚེས་༥ ཉིན་ལོ་ལྟར་སྲུང་བརྩི་ཞུ་འགོ་བཙུགས་ཡོད་འདུག འདི་ལོའི་དཔལ་རྔམ་དུས་སྟོན་གྱི་ཉིན་མོ་དེ་བོད་ནས་རྒྱུག་པའི་སེང་གེ་གཙང་པོའི་ཆུ་མཐའ་ཆགས་པའི་སིན་དྷུ་གཊ་ཡང་ན་རུ་སྲུང་བརྩི་ཞུ་རྒྱུ་ཡིན་འདུག

ད་བར་ལ་དྭགས་དཔལ་རྔམ་དུས་སྟོན་གྱི་གཟེངས་རྟགས་བཞེས་མྱོང་མཁན་རྣམས་ནི། ཁྲིག་སེ་རིན་པོ་ཆེ་མཆོག་དང་ལ་དྭགས་ནང་ཚོགས་ཀྱི་དབུ་སྐྱོང་སྐུ་ཞབས་ཐུབ་བསྟན་ཚེ་དབང་ལགས་སོགས་ཡིན་འདུག

གསར་འགོད་པ། འཕྲིན་ལས་ཆོས་སྒྲོན། 
རྩོམ་སྒྲིག་པ། བསྟན་འཛིན་འཕགས་སྒྲོན། 
དྲ་ཐོག་སྤེལ་མཁན། བསྟན་འཛིན་འཕགས་སྒྲོན།