རྒྱལ་སྤྱིའི་ན་ཆུང་དབུ་ཁྲིད་ལྷན་ཚོགས་ཐེངས་བཞི་པ།

༄༅༎ལྷ་རྒྱ་རི་ཁྲི་ཆེན་རྣམ་རྒྱལ་རྒྱ་མཚོའི་སྲས་ལྷ་རྒྱ་རི་ཁྲི་ཆེན་རྣམ་རྒྱལ་དབང་ཕྱུག་ལགས། ༢༠༡༢ ལོའི་འཛམ་གླིང་ན་ཆུང་དབུ་ཁྲིད་༣༠ཁྲོད་བདམས་ཐོན་བྱུང་སྟེ། རྒྱལ་ཁབ་ ༡༤ ནས་ན་གཞོན་ ༣༠ ཨ་རིའི་ནེའུ་ཡོག་གྲོང་ཁྱེར་དུ་མགྲོན་འབོད་ཀྱིས་བདུན་གཅིག་རིང་ལྷན་ཚོགས་ཟབ་སྦྱོང་ཁྲོད་ཞུགས་འདུག
ཕྱི་ཟླ་ ༣ ཚེས་ ༢༤ ནས་ ༣༠ བར་ཉིན་དྲུག་རིང་ཨ་རིར་རྟེན་གཞི་བྱས་པའི་རྒྱལ་སྤྱིའི་གོ་ལ་ཁྱིམ་ཚང་གཅིག་གྱུར་ཚོགས་པའི་ (Global Family Foundation) གོ་སྒྲིག་འོག་རྒྱལ་སྤྱིའི་ན་ཆུང་དབུ་ཁྲིད་(Global Teen Leaders) ལྷན་ཚོགས་ཐེངས་ ༤ དེ་ཨ་རིའི་ནེའུ་ཡོག་གྲོང་ཁྱེར་དུ་ཚོགས་ཡོད་པ་དང་། ལས་རིགས་འདྲ་མིན་ཐོག་འཛམ་གླིང་ནང་ཤུགས་རྐྱེན་ཆེན་པོ་ཡོད་པའི་ཆེད་ལས་པ་དང་དབུ་ཁྲིད་མི་སྣ་གདན་ཞུས་ཀྱིས་མ་འོངས་པའི་སྤྱི་ཚོགས་ནང་རེ་བ་ཡོད་པའི་ན་ཆུང་ཚོར་སྤྱི་ཚོགས་ཀྱི་བདེ་དོན་འདྲ་མིན་ཐོག་བགྲོ་གླེང་དང་། སྤྱི་ཚོགས་འཕེལ་རྒྱས་ཐད་ནུས་ཤུགས་གོང་མཐོར་གཏོང་ཐབས་སྐོར་ལ་ཟབ་སྦྱོང་གནང་འདུག།
རྒྱལ་སྤྱིའི་ན་ཆུང་དབུ་ཁྲིད་ཀྱི་ལས་གཞི་འདི་ ༢༠༠༨ ལོ་ནས་འགོ་ཚུགས་ཡོད་པ་དང་། དེ་ནི་འཛམ་གླིང་ཞི་བདེ་དང་གོ་ལ་ཁྱིམ་ཚང་གཅིག་གྱུར་བཅས་ཀྱི་དམིགས་ཡུལ་འོག་ལོ་ ༡༣ ནས་ ༡༩ བར་ན་ཆུང་ཚོའི་ཁྲོད་ནས། ལོ་ལྟར་རྒྱལ་སྤྱིའི་སྤྱི་ཚོགས་ནང་རེ་བ་དང་ཤུགས་རྐྱེན་ཡོད་པ་ཁག་ཅིག་འཛམ་གླིང་ན་ཆུང་དབུ་ཁྲིད་ལ་འདེམས་སྒྲུག་གནང་སྟེ། མ་འོངས་པའི་འཛམ་གླིང་དབུ་ཁྲིད་གསར་པར་སྐྱེད་བསྲིང་གནང་གི་ཡོད་པ་ལྟར། ༢༠༡༢ ལོའི་རྒྱལ་ཁབ་ ༡༤ ནང་འཛམ་གླིང་ན་ཆུང་དབུ་ཁྲིད་གྲངས་༣༠འདེམས་ཐོན་བྱུང་པའི་ཁྲོད། གུང་ལོ་ ༡༩ ཡིན་པའི་བོད་བཙན་པོའི་གདུང་རབས་ལྷ་རྒྱ་རི་ཁྲི་ཆེན་རྣམ་རྒྱལ་དབང་ཕྱུག་ལགས་བདམས་ཐོན་བྱུང་ཡོད་པ་དང་། ཁོང་ནི་བོད་རིགས་ན་ཆུང་ཞིག་རྒྱལ་སྤྱིའི་ན་ཆུང་དབུ་ཁྲིད་ཁྲོད་བདམས་ཐོན་བྱུང་བ་ཐོག་མ་དེ་ཆགས་ཡོད་པ་རེད།
 ཁོང་གིས་ “ལྷན་ཚོགས་ཀྱི་གོ་སྐབས་གང་ཡོད་ལ་བོད་ཀྱི་གནས་སྟངས་དང་། ༧གོང་ས་མཆོག་གི་དགོངས་གཞི། བཙན་བྱོལ་བོད་གཞུང་གི་སྲིད་བྱུས་སོགས་ངོ་སྤྲོད་གནང་ཡོད་པ་རེད།ལྷ་རྒྱ་རི་ཁྲི་ཆེན་རྣམ་རྒྱལ་དབང་ཕྱུག་ལགས་ནི་བོད་བཙན་པོའི་གདུང་རྒྱུད་ལྷ་རྒྱ་རི་ཁྲི་ཆེན་རྣམ་རྒྱལ་རྒྱ་མཚོ་ལགས་ཀྱི་སྲས་ཡིན་པ་དང༌།  ༢༠༠༤ ལོར་༧གོང་ས་མཆོག་གིས་ཁྲི་འདོན་གནང་ཡོད་པ་དང་། ད་ལྟ་ཨ་རིའི་སན་ཨན་ཌི་རེབ་ (St.Andrew's school) སློབ་གྲྭར་སློབ་གཉེར་གནང་བཞིན་ཡོད་།