ཆབ་སྲིད་བཙོན་པ་ཞིག་གློད་བཀྲོལ།

༄༅།    །ཁ་སང་ཕྱི་ཟླ་༥ ཚེས་༢ ཉིན་ཁམས་སོག་རྫོང་གི་ཆབ་སྲིད་བཙོན་པ་བློ་གྲོས་རྒྱ་མཚོ་ལགས་རྒྱ་གཞུང་གི་བཙོན་ཁང་ནང་མི་ལོ་༢༡ རིང་བཙོན་བཅུག་བྱས་རྗེས། གློད་བཀྲོལ་ཐོབ་ཡོད་ནའང་།  ད་ལྟའི་ཆར་ཁོ་རང་གི་གཟུགས་པོའི་གནས་སྟངས་སྐྱོ་བོ་ཡོད་པ་རེད་འདུག    དེ་ཡང་བོད་ཀྱི་བང་ཆེན་དྲ་གནས་ཐོག་སྤེལ་བའི་གནས་ཚུལ་ལྟར་ན།    བློ་གྲོས་རྒྱ་མཚོ་ལགས་སུ་རྒྱ་གཞུང་གིས་བཙོན་ཁང་ནང་མི་སྤྱོད་ལས་འདས་པའི་སྡུག་སྦྱོང་མནར་གཅོད་ཚད་མེད་བཏང་ཡོད་པ་དང་། ད་རེས་ལོ་༢༡ཙམ་གྱི་རྗེས་གློད་བཀྲོལ་ཐོབ་པ་ཞིག་ཡིན་པ་རེད་འདུག
དེ་ཡང་རང་ལོ་༥༢ལ་ཕེབས་པའི་སོག་རྫོང་བློ་གྲོས་རྒྱ་མཚོ་ལགས་ནི།    དེ་སྔ་ཕྱི་ལོ་༡༩༩༥ལོར་གྲྭ་བཞི་བཙོན་ཁང་དུ་ཡོད་པའི་སྐབས། བོད་རང་བཙན་ཡིན། ༸རྒྱལ་བ་བསྟན་འཛིན་རྒྱ་མཚོ་སྐུ་ཚེ་ཁྲི་ལོར་བརྟན་པར་ཤོག བོད་དུ་ཡོད་པའི་རྒྱ་མི་ཚང་མ་རྒྱ་ནག་ཏུ་ལོག་དགོས། སོགས་ཀྱི་འབོད་ཚིག་སྒྲོག་བཞིན་དུ་སྔ་ས་ནས་གྲ་སྒྲིག་བྱས་པའི་ལག་བྲིས་ཡིག་ཆ་ཁྱོན་ཆེ་ཞིག་ཡོད་དེ་དག་གྲྭ་བཞི་བཙོན་ཁང་གཏོར་འགྲེམས་གནང་ཡོད་པ་དང་།    དེས་རྐྱེན་པས་བཙོན་སྲུང་མགོ་ཁྲིད་རྣམས་ཀྱི་ཁྲིམས་ཁང་ལ་སྙན་ཞུ་བརྒྱབས་ནས། སྐབས་དེར་ཉིན་གསུམ་ལས་མ་འགྱངས་བར་དམར་གསོད་གཏོང་རྒྱུའི་བཀའ་རྒྱ་འབྱོར་ཡོད་པ་རེད།
དེ་དང་དུས་མཚུངས་མཉམ་སྦྲེལ་རྒྱལ་ཚོགས་ཀྱི་དམིགས་བསལ་བལྟ་རྟོག་ཚོགས་པའི་འགན་འཛིན་ནས། བློ་གྲོས་རྒྱ་མཚོ་ལགས་དམར་གསོད་གཏང་མི་ཆོག་པའི་གནོན་ཤུགས་སྤྲད་པས་མ་ཟད།  རྒྱལ་སྤྱིའི་ཉེས་ཡང་ཚོགས་པ་ཁག་གཅིག་གིས་ཀྱང་གནོན་ཤུགས་སྤྲད་པའི་རྐྱེན།    རྒྱ་གཞུང་གི་ཁྲིམས་ཁང་ནས་དུས་བཀག་བཙོན་འཇུག་ལོ་དྲུག་འཕར་འགྱངས་དང་། ཆབ་སྲིད་ཐོབ་ཐང་ལོ་༣ ཕྲོགས་ནས་ཁྱོན་བཙོན་དུས་ལོ་ངོ་༢༡  རྗེས་ད་རེས་གློད་བཀྲོལ་ཐོབ་པ་ཞིག་ཡིན་པ་རེད།།