ངོས་རང་གི་ངོས་ནས་རིང་དུ་འཚོ་རྒྱུའི་སྨོན་ལམ་རྒྱག་གི་ཡིན།

༧གོང་ས་མཆོག་དཔལ་དུས་ཀྱི་འཁོར་ལོའི་དབང་ཆེན་ཐེངས༣༣པའི་ཉིན་མཐའ་མར། ༢༠༡༤།༧།༡༤

༧གོང་ས་མཆོག་གིས་ངོས་ཀྱིས་འབུལ་བ་རྩ་བ་ནས་ལེན་གྱི་མེད་འབུལ་བ་བླང་ན་ཆོས་བཙོང་པ་དང་གཅིག་པ་རེད་གསུངས་འདུག དེ་ཡང་དགའ་ལྡན་ཁྲི་པ་རི་རྫོང་རིན་པོ་ཆེ་མཆོག་རྡོ་རྗེ་སློབ་དཔོན་དུ་དབུ་བཞུགས་ཐོག་དུས་དབང་གོ་སྒྲིག་ཚོགས་ཆུང་གི་ཚོགས་མི་ཡོངས་ནས་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་བསྟན་འགྲོ་སྤྱི་དང་ཁྱད་པར་གངས་ལྗོངས་འགྲོ་བའི་མགོན་དཔུང་དམ་པར་སྐུ་ཚེ་བསྐལ་བརྒྱའི་བར་དུ་བརྟན་ཅིང་ཐུགས་བཞེད་འབད་མེད་ལྷུན་འགྲུབ་ཡོང་ཆེད་བརྟན་བཞུགས་བསྟར་འབུལ་ཞུས་ཡོད་པ་དང་། སྐབས་དེར་༧གོང་ས་མཆོག་གིས། དེ་རིང་དབང་ཆེན་དུ་ཐོག་མཐའ་བར་གསུམ་དུ་བཀྲ་ཤིས་པ་ཧ་ཅང་གྲ་སྒྲིག་པོ་ཡག་པོ་བྱུང་སོང་། དེར་བརྟེན་ཚང་མར་ཐུགས་རྗེ་ཆེ་ཞུ་རྒྱུ་ཡིན། དེ་རིང་འདིར་ཉིན་མཐའ་མར་སྒྲོལ་དཀར་གྱི་སྒོ་ནས་ཚེ་སྒྲུབ་ཧ་ལམ་བདུན་ཕྲག་གཅིག་རིང་ཁྲི་རིན་པོ་ཆེ་དབུ་བཞུགས་ཐོག་བསྒྲུབས་གནང་ཡོད། དེ་རྗེས་དེ་རིང་སྒྲོལ་དཀར་གྱི་བརྟན་བཞུགས་གནང་བར་ཐུགས་རྗེ་ཆེ་ཞུ་གི་ཡིན། ངོས་རང་གི་ངོས་ནས་རིང་དུ་འཚོ་རྒྱུའི་སྨོན་ལམ་རྒྱག་གི་ཡིན། དེ་རིང་བརྟན་བཞུགས་སྐབས་གཟུགས་ཅན་མིའི་ཐོག་གཟུགས་མེད་དྲེགས་པ་ཕོ་རྒྱུད་མོ་རྒྱུད་རྗེ་འབྲང་དང་བཅས་པ་འདིར་འདུན་པ་གཅིག་སྒྲིལ་གྱི་ཐོག་གནང་སོང་། ཐུགས་རྗེ་ཆེ་ཞུ་རྒྱུ་ཡིན། དེ་རིང་འདིར་མངའ་སྡེ་བློན་ཆེན་འདིར་ཕེབས་ཡོད། ཁོང་ཆ་བཞག་ན་ཁོང་མི་རབས་གསུམ་པ་དེ་རེད། དེ་རིང་ཁྱེད་རང་ཚོས་ངོས་ལ་དགའ་བསུ་གནང་བར་ཐུགས་རྗེ་ཆེ་ཞུ་རྒྱུ་ཡིན། ཁྱེད་རང་ཚོར་ཡིད་ཆེས་དང་རེ་བ་བྱེད་མཁན་རྒྱ་ཆེའི་མི་མང་ལ་ཕན་ཐོགས་དང་ཞབས་འདེགས་རླབས་ཆེན་སྒྲུབ་ཐུབ་རྒྱུར་ངོས་ཀྱི་སྨོན་ལམ་ཡོད། དེ་བཞིན་འདི་གའི་ནང་པའི་ཆོས་ཚོགས་ཀྱི་གཙོ་འཛིན་དང་དགོན་པའི་ཚོགས་པའི་གཙོ་འཛིན་ཁྱེད་རང་གཉིས་ཀྱི་ངོས་ནས་དགའ་བསུ་དང་གསུང་བཤད་གནང་བར་ཐུགས་རྗེ་ཆེ་ཞུ་རྒྱུ་ཡིན། དངུལ་གྱི་འགྲོ་གྲོན་སྐོར་གྱི་རྩིས་ཁྲ་ཧ་ཅང་ཁ་གསལ་གསུངས་པར་དགའ་པོ་བྱུང་། ཐུགས་རྗེ་ཆེ། ངོས་ཀྱིས་འབུལ་བ་རྩ་བ་ནས་ལེན་གྱི་མེད། འབུལ་བ་བླང་ན་ཆོས་བཙོང་པ་དང་གཅིག་པ་རེད། སྔར་བོད་ཀྱི་རྫོགས་ཆེན་སྣ་ཚོགས་རང་གྲོལ་གྱི་རྣམ་ཐར་ནང་ཁོང་གི་དམ་བཅའ་གཅིག་ལ་ཆོས་བཤད་ནས་འབུལ་བ་ལེན་གྱི་མིན་ཞེས་དམ་བཅའ་བཞག་ཡོད། ངོས་རང་དེར་ཧ་ཅང་གི་ཡིད་འཕྲོག་སོང་། དངོས་གནས་དྲང་གནས་ཀྱི་ཆོས་བཤད་ནས་འབུལ་བར་ཨང་ཉན་བརྒྱབ་ན། བོད་ཀྱི་བླ་མ་ཞིག་གིས་གསུངས་ཡོད། །དབང་བསྐུར་ཆོས་བཤད་བྱེད་དུས། །རྣམ་དཔྱོད་འདྲ་ཞིང་འདུག་སྟེ། །འབུལ་བ་ཨང་ཉན་བྱེད་དུས། །སེམས་པ་གཏིང་ནས་སྐྱོ་བྱུང་། ཞེས་པ་འདི་ཆགས་ན་རྩ་བ་ནས་ཡག་པོ་མེད། དེར་བརྟེན་ངོས་རང་འབུལ་བ་ལེན་གྱི་མེད། ཚང་མ་རང་ལོག་ཕུལ་གྱི་ཡོད། ད་ལྟ་ཇོ་ནང་མཁན་པོ་ཁྱེད་རང་ཚོས་མཎྜལ་ཧ་ཅང་ཆེན་པོ་བཟོས་འདུག ངོས་ཀྱིས་ད་གིན་ཞུས་པ་བཞིན་ཁྱེད་རང་ཚོ་སིམ་ལའི་དགོན་པར་དྲན་རྟེན་ཆེད་སྒྲིག་འཇོག་བྱོས། དྲན་རྟེན་བྱེད་སྐབས་ག་རེ་དྲན་དགོས་རེད་ཅེ་ན། དཔལ་དུས་ཀྱི་འཁོར་ལོའི་སྦྱོར་བ་ཡན་ལག་དྲུག་གི་ལག་ལེན་དམར་ཁྲིད་རྒྱུན་མ་ཆད་པ་ཞིག་ཁྱེད་རང་ཚོ་ཇོ་ནང་པ་ཚོར་ཡོད། རང་སྟོང་དང་གཞན་སྟོང་། དོན་དམ་བདེན་པ། རྟག་པ་རང་དབང་པ་སོགས་ལ་ང་ཚོ་རྩོད་པ་ཡོད་པ་རེད། གང་ལྟར་དུས་ཀྱི་འཁོར་ལོའི་སྦྱོར་བ་ཡན་ལག་དྲུག་སྐོར་བོད་གངས་ཅན་གྱི་ལྗོངས་ལ་སངས་རྒྱས་ཀྱི་བསྟན་པའི་ནང་ནས་སྦྱོར་བ་ཡན་ལག་དྲུག་གི་ལག་ལེན་རྒྱུན་མ་ཆད་པར་ཡོད་པ་དེ་ཇོ་ནང་པ་རེད། བོད་ནང་དུ་ཆ་བཞག་ན། ཛམ་ཐང་ཁུལ་དུ་ཧ་ཅང་དར་སོ་ཆེན་པོ་ཡོད་པ་ཡག་པོ་འདུག གཞན་ཞུ་རྒྱུ་གང་ཡང་མི་འདུག ཁྱེད་རང་ཚོ་ཆང་མས་བློ་ཆོས་སུ་སོང་བ་དང་། བློ་དུལ་བའི་ཁས་ལེན་དམ་བཅའ་གནང་སོང་ལ། ཧུར་ཐག་གནང་ཤོག ངོས་ལ་ཆ་བཞག་ན་ལོ་ ༧༩ བསླེབས་ཡོད། ད་བར་ཧུར་ཐག་བྱས་པ་ཡིན། ད་དུང་ཡིན་ནའང་སྟོན་པ་བཀའ་དྲིན་ཅན་གྱི་རྗེས་འབྲང་གི་དགེ་སློང་ཞིག་གི་སྟོན་པའི་ཞབས་འདེགས་བསྒྲུབ་མ་ཐུབ་ནའང་ཞབས་མ་འདྲེན་པ་ཞིག་བྱེད་དགོས་བསམ་པ་རྟག་ཏུ་དྲན་བཞིན་ཡོད། ཁྱེད་རང་ཚོས་ཀྱང་ཧུར་ཐག་བྱོས་དང་། འདི་གར་ཕྱི་རྒྱལ་གྱི་མི་རིགས་མང་པོ་ཞིག་བསླེབས་འདུག མ་གཞི་ནས་གོང་དུ་བརྗོད་པ་ཡིན། སངས་རྒྱས་ཀྱི་ཆོས་དང་། ལྷག་པར་དཔལ་ནལེནྡྲའི་ཆོས་བརྒྱུད་ལུང་ལ་སྐྱབས་སུ་མི་འཛིན་པར། རིག་པ་ཁོ་ན་ལ་བརྟེན་ནས་བསམ་བློར་འགྱུར་བ་གཏོང་རྒྱུ་ནི། དེང་སྐབས་ཚན་རིག་པ་དང་མཉམ་དུ་གོ་བསྡུར་བྱེད་སྐབས་གཅིག་ཕན་གཅིག་གྲོགས་བྱེད་ཐུབ་ཀྱི་འདུག འདི་ནི་དཔལ་ན་ལེནྡྲའི་ཆོས་བརྒྱུད་ཀྱི་རིག་པར་བརྟེན་ནས་རྣམ་རྟོགས་འགྱུར་བ་གཏོང་རྒྱུ་འདི་ཡིན་པ་ཧ་ཅང་གསལ་པོ་རེད་འདུག ན་ལེནྡྲའི་ཆོས་བརྒྱུད་ཀྱི་རིང་ལུགས་བོད་གངས་ཅན་གྱི་ལྗོངས་ལ་ལོ་སྟོང་ཕྲག་རིང་ཉར་ཚགས་བྱས་ཡོད་པའི་ཐོག་ཁྱེད་རང་ཚོས་ཐུགས་སྣང་གནང་བ་རེད། ཁྱེད་རང་ཚོས་ལ་དྭགས་ལ་ཕྱིན་པ་ཡིན། དུས་འཁོར་དབང་ཆེན་ཐོབ་སོང་ཞེས་པའི་སྐད་ཆ་ཙམ་མིན་པར་སྔ་རྗེས་འབོད་སྐུལ་ཞུས་པ་ནང་བཞིན། སྐད་ཡིག་ཀྱི་ཐོག་ནས་དཀའ་ངལ་ཡོད་ཀྱང་སློབ་སྦྱོང་བྱེད་རྒྱུ་དེ་ཧ་ཅང་གལ་ཆེན་པོ་རེད། ཤེས་སོང་ངམ། ཁྱེད་རང་ཚོ་ལ་དྭགས་སུ་ཡོང་བ་རེད། ཁྱེད་རང་ཚོ་རྒྱ་མཚོའི་མཐའ་རུ་ཕྱིན་ཏེ་གདོང་ནག་པོ་བཟོ་མ་དགོས་པར་འདི་ག་ལ་དྭགས་སུ་རང་བཞིན་གྱིས་གདོང་ནག་པོ་ཆགས་ཡོད། གདོང་ནག་པོ་ཆགས་ཏེ་འགྱུར་བ་ཕྱིན་པ་ལྟར་ནང་བསམ་བློར་ཡང་འགྱུར་བ་གཏོང་དགོས། ཞེས་བཀའ་སློབ་སྩལ་ཏེ་དཔལ་དུས་ཀྱི་འཁོར་ལོའི་དབང་ཆེན་ཐེངས་ ༣༣ པ་ཡོངས་སུ་ལེགས་གྲུབ་འདུག

<p>པ་སངས་ཚེ་རིང་ལགས་ཀྱིས་ས་གནས་ནས་བཏང་བའི་གནས་ཚུལ།<p/>

<p> བློ་བྷེ་ལགས་ཀྱིས་ས་གནས་ནས་བཏང་བའི་གནས་ཚུལ།<p/>

<p>ཉི་མ་ལགས་སྐལ་ལྡན་བློ་གྲོས་ལགས་དང་ལྷན་དུ་གླེང་བའི་ལས་རིམ།<p/>

<p>ངག་ཆོས་ལགས་ཀྱིས་ཚེ་བརྟན་རྣམ་རྒྱལ་ལགས་དང་ལྷན་དུ་གླེང་བའི་ལས་རིམ།<p/>