རྒྱ་གར་མའོ་གྱེན་ལོག་ཤོག་ཁག་གིས་རི་ལི་ཞིག་བཙན་ཁྲིད།

༄༅༎རྒྱ་གར་རྒྱལ་ཡོངས་འོས་འདེམས་བྱེད་ལ་ཉེ་བའི་དུས་ཚོད་དེ་དང་སྟབས་བསྟུན་ནས་རྒྱ་གར་ནང་ཡོད་པའི་མའོ་གྱེན་ལོག་ཤོག་ཁག་གིས་རྒྱ་གར་ཤར་ངོས་སུ་བསྐྱོད་མཁན་འགྲུལ་པ་ལྔ་བརྒྱ་ཙམ་ཡོད་པའི་རི་ལི་ཞིག་བཙན་ཁྲིད་བྱས་ཡོད་པ་རེད་ཅེས་ས་གནས་ཉེན་རྟོག་པས་དེ་རིང་རེས་གཟའ་ལྷག་པའི་ཉིན་གསལ་བསྒྲགས་བྱས་འདུག

གནད་དོན་དེའི་ཐད་རྒྱ་གར་ནང་ཡོད་པའི་མའོ་གྱེན་ལོག་ཤོག་ཁག་གིས་བརྗོད་ན་ད་རས་མའོ་གྱེན་ལོག་ཤོག་ཁག་གིས་ཡུལ་ནང་ས་ཞིང་མེད་པའི་མི་མང་ཚོའི་ཐོབ་ཐང་དང་དེ་བཞིན་ཞིང་པ་དབུལ་པོ་ཚོས་རྒྱ་གར་རྒྱལ་ཡོངས་འོས་བསྡུའི་ཐོག་རྒོལ་རྡུང་བྱེད་རྒྱུའི་གོམ་པ་སྤོས་པ་ཞིག་ཡིན་ལུགས་བརྗོད་ཡོད་པ་རེད། མའོ་གྱེན་ལོག་ཤོག་ཁག་གིས་རྒྱ་གར་རྒྱལ་ཡོངས་འོས་བསྡུའི་ཐད་འགོག་རྒོལ་བྱས་པ་ཐོག་མ་དེ་བདུན་ཕྲག་སྔོན་མའི་རེས་གཟའ་ཕུར་བུའི་ཉིན་ཡིན་པ་རེད། རྒྱ་གར་གྱི་སྲིད་བློན་མཱན་མོ་ཧན་སིང་མཆོག་གིས་མའོ་གྱེན་ལོག་ཤོག་ཁག་དེ་བཞིན་རྒྱ་གར་རྒྱལ་ཡོངས་ཀྱི་བདེ་འཇགས་ཐོག་གནོད་འཚེ་གཏོང་མཁན་ཤུགས་ཆེ་ཤོས་ཤིག་ཡིན་པ་རེད། ཚོགས་པ་དེས་ན་ནིང་རྒྱ་གར་ནང་འགོག་རྒོལ་གྱི་ལས་འགུལ་ཁྲོད་མི་མང་ལྔ་བརྒྱ་དང་ཉེན་རྟོག་པ་སོགས་རྐྱེན་འདས་སུ་བཏང་ཡོད་པ་རེད་ཅེས་གསལ་སྟོན་གནང་འདུག དེང་སྐབས་རྒྱ་གར་རྒྱལ་ཡོངས་འོས་བསྡུའི་ལས་འགུལ་དང་སྟབས་བསྟུན་ནས་མའོ་གྱེན་ལོག་ཤོག་ཁག་གིས་ས་གནས་ཁག་འདྲ་མིན་ནང་རི་ལིའི་འགྲོ་ལམ་གྱི་ལས་དོན་ཐོག་གནོད་འཚེ་བཏང་བ་མ་ཟད་འཕྲོད་བསྟེན་གྱི་ལྟེ་གནས་ཁག་དང་སློབ་གྲྭ་སོགས་གཏོར་རྒོལ་གཏོང་རྒྱུའི་ལས་འགུལ་འདྲ་མིན་བརྩམས་བཞིན་ཡོད་པ་རེད།