གཞུང་ཚབ་མདུན་ངོ་རྒོལ་གནང་རྒྱུ།

༄༅། རྒྱལ་སྤྱིའི་བོད་རང་བཙན་ལས་འགུལ་ཚོགས་པས་བོད་ནང་གི་ཛ་དྲག་གནས་སྟངས་སྤྱི་དང་ལྷག་དོན་དུ་བོད་མི་མང་པོས་རང་ལུས་མེར་སྲེག་གནང་ནས་རྒྱ་ནག་གཞུང་ལ་ངོ་རྒོལ་དང་།    བོད་ལ་རང་དབང་དགོས་པ་དང་།    ༧གོང་ས་མཆོག་བོད་ལ་གདན་འདྲེན་ཞུ་དགོས་པའི་མངོན་འདོད་ཁག་རྒྱལ་སྤྱིའི་མང་ཚོགས་ལ་གོ་རྟོགས་སྤེལ་ཕྱིར་འདི་ཟླའི་ཚེས་༢༣་ཉིན་ནས་བཟུང་ཨ་རིའི་ནུབ་ཕྱོགས་མངའ་སྡེ་ཀེ་ལི་ཕོར་ནིའི་གྲོང་ཁྱེར་Richmond ནས་བོད་རང་བཙན་ཆེད་ཞི་བའི་གོམ་བགྲོད་དབུ་འཛུགས་གནང་སྟེ་ཁ་སང་ཉིན་ལྡ་པ་དེ་ཡིན་པ་རེད། ཨ་རིའི་ཀེ་ལི་ཕོར་ནིའི་མངའ་སྡེའི་གྲོང་ཁྱེར་Richmond ནས་San Francisco འི་བར་རྒྱང་ཐག་མི་ལེ་༡༠༨ལྷག་གིས་བོད་རང་བཙན་ཆེད་ཀྱི་གོམ་བགྲོད་དེར་Bay Area Friends of Tibetཞེས་ས་གནས་བོད་དོན་རྒྱབ་སྐྱོར་ཚོགས་པ་དང་།    ས་གནས་བོད་རིགས་སྤྱི་མཐུན་ཚོགས་པ། ས་གནས་བོད་ཀྱི་གཞོན་ནུ་ལྷན་ཚོགས། ས་གནས་བོད་རང་བཙན་སློབ་ཕྲུག་ཚོགས་པ། དེ་བཞིན་ས་ཚིག་ཁག་ལ་གནས་པའི་བོད་མི་རྣམས་ཀྱིས་མཐུན་འགྱུར་རོགས་རམ་གང་ལེགས་གནང་བཞིན་ཡོད་སྐོར་བསྟན་པ་འཇམ་དབྱངས་ལགས་ཀྱིས་ང་ཚོ་རླུང་འཕྲིན་ཁང་ལ་འགྲེལ་བརྗོད་གནང་སོང་།     གོམ་བགྲོད་པ་རྣམས་ཕྱི་ཚེས་༣༠ཉིན་སྟེ།    རེས་གཟའ་སྤེན་པའི་ཉིན་གྲོང་ཁྱེར་San Francisco འི་ནང་རྒྱ་ནག་གི་དོན་གཅོད་ལས་ཁང་མདུན་ཕེབས་འབྱོར་དང་བསྟུན།    བོད་མི་དང་བོད་དོན་རྒྱབ་སྐྱོར་བ་རྣམས་ཚང་འཛོམས་ཀྱིས་རྒྱ་ནག་གཞུང་ལ་ཞི་བའི་ངོ་རྒོལ་གྱི་ལས་འགུལ་གཞི་ཆ་ཆེན་པོ་ཞིག་སྤེལ་བ་དང་སྦྲགས་ ལས་འགུལ་དེ་མཇུག་སྒྲིལ་གནང་འཆར་ཡོད་པ་རེད།།