མི་ནི་སོ་ཀྲའི་སྲིད་སྐྱོང་གསར་པར་བོད་མིས་འཚམས་འདྲི་ཞུས།

༄༅༎ཨ་རིའི་མི་ནི་སོ་ཀྲ་ས་གནས་ནང་ཡོད་པའི་བོད་མི་ཚོས་མངའ་སྡེའི་སྲིད་སྐྱོང་དུ་འོས་འདེམས་བྱུང་བ་སྐུ་ཞབས་མཀ་ཌེ་ཀྲེན་མཆོག་གིས་སྲིད་སྐྱོང་གི་ཐུགས་འགན་དངོས་སུ་བཞེས་པར་འཚམས་འདྲིའི་བཀྲིས་བདེ་ལེགས་ཞུས་ཡོད་པ་རེད་  

མི་ནི་སོ་ཀྲ་ནང་ཡོད་པའི་ཨ་རི་དང་བོད་རིགས་ཐེབས་རྩ་ཚོགས་པའི་འབྲེལ་ཡོད་རྣམ་རྒྱལ་ལགས་དང་ ཉི་མ་རྡོ་རྗེ་ལགས་ཀྱི་ཚོགས་པ་དེའི་ཚབ་ཞུས་ནས་མངའ་ཁུལ་སྤྱི་ཁྱབ་གསར་པ་སྐུ་ཞབས་ཌེ་ཀྲེན་མཆོག་ལ་བོད་མིའི་དབུ་འཁྲིད་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་སྐུ་ཚེའི་ལོ་རྒྱུས་ལས་ ངོས་ཀྱི་ཡུལ་དང་ངོས་ཀྱི་མི་མང་ཞེས་པའི་ཕྱག་དེབ་དང་མཇལ་དར་ཕུལ་ནས་ས་གནས་བོད་མི་ཚོས་ཁོང་མངའ་སྡེའི་སྲིད་སྐྱོངས་སུ་འོས་འདེམས་བྱུང་བར་བཀྲིས་བདེ་ལེགས་ཀྱི་འཚམས་དྲི་ཞུས་གནང་ཡོད་པ་དང་ཕྱོགས་མཚུངས་ ༧གོང་ས་༧སྐྱབས་མགོན་ཆེན་པོ་མཆོག་ཕྱི་ཟླ་ལྔ་པའི་ནང་གྲོང་ཁྱེར་ནང་ཆིབས་བསྒྱུར་བསྐྱངས་འཆར་ཡོད་པའི་སྐོར་བཀའ་མོལ་གནང་ཡོད་པ་དང་ གསར་དུ་འོས་འདེམས་བྱུང་བའི་མངའ་སྡེའི་སྲིད་སྐྱོངས་དྲེ་ཀྲེན་མཆོག་ནས་༧གོང་ས་མཆོག་མངའ་ཁུལ་དེའི་ནང་ཆིབས་བསྒྱུར་བསྐྱངས་འཆར་ཡོད་པའི་གནས་ཚུལ་གོ་བ་དེར་ཧ་ཅང་གི་དགའ་པོ་བྱུང་ ༧གོང་ས་༧སྐྱབས་མགོན་ཆེན་པ་མཆོག་གྲོང་ཁྱེར་དེའི་ནང་ཆིབས་བསྒྱུར་བསྐྱངས་སྐབས་ མངའ་སྡེའི་སྲིད་སྐྱོངས་ཀྱི་གཞུང་ལས་ཁང་དུ་གདན་ཞུ་གནང་ཐུབ་པ་ཁོང་གིས་འབད་བརྩོན་གནང་རྒྱུ་ཡིན་ཞེས་བཀའ་ལན་གནང་བའི་སྐོར་ཉི་མ་རྡོ་རྗེ་ལགས་ཀྱིས་འགྲེལ་བརྗོད་གནང་འདུག