ཚིག་མཛོད་སྒྲིག་སྟངས་ཀྱི་བགྲོ་གླེང།

༄༅།    །ཁ་སང་ཕྱི་ཚེས་༦ ནས་ཉིན་གཉིས་རིང་སྨོན་ལམ་བོད་ཀྱི་བརྡ་འཕྲིན་ཞིབ་འཇུག་ཁང་གིས་གོ་སྒྲིག་འོག    སྨོན་ལམ་བོད་ཀྱི་ཀུན་བཏུས་ཚིག་མཛོད་ཆེན་མོའི་ནང་ཆོས་ལུགས་དང་འབྲེལ་བའི་ཐ་སྙད་རྩོམ་སྒྲིག་བྱ་ཕྱོགས་སྐོར་ལ། ཆོས་བརྒྱུད་སོ་སོས་བསྐོ་འཇོག་བྱས་པའི་རྩོམ་སྒྲིག་མི་སྣ་ལྷན་འཛོམས་ཀྱི་ཚོགས་འདུ་ཐེངས་དང་པོ་དེ་དྷ་ས་བོད་ཀྱི་དཔེ་མཛོད་ཚོགས་ཁང་དུ་འཚོགས་ཡོད་པ་རེད། ཚོགས་ཐོག་དེར་བོད་ཀྱི་ཆོས་བརྒྱུད་ཆེན་པོ་ས་དགེ་བཀའ་རྙིང་དང་། ཇོ་ནང་། བོ་དོང། གཡུང་དྲུང་བོན་བཅས་ཀྱི་རྩོམ་སྒྲིག་མི་སྣ་སུམ་ཅུ་ལྷག་མཉམ་འཛོམས་གནང་ཡོད་པ་དང་།    ཚོགས་འདུ་དབུ་འབྱེད་མཛད་སྒོའི་ཐོག་མཁས་དབང་ཟམ་གདོང་རིན་པོ་ཆེ་མཆོག་ནས་དུས་རབས་དང་མཐུན་པའི་འགྱུར་བ་གཏོང་དགོས་སྐོར་སོགས་ལམ་སྟོན་གནང་འདུག བགྲོ་གླེང་སྐབས་ཚིག་མཛོད་ནང་དུ་ཆོས་བརྒྱུད་ཁག་གི་ཆོས་འབྱུང་ལོ་རྒྱུས་དང།  ཆོས་ལུགས་དང་ལྟ་གྲུབ་ཀྱི་ཐ་སྙད། ཆོས་བརྒྱུད་སོ་སོ་དང་འབྲེལ་བའི་རིག་གཞུང་བཅས་ཀྱི་སྐོར་རྩོམ་སྒྲིག་བྱ་ཕྱོགས་ངོ་སྤྲོད་དང་གོ་བསྡུར་གནང་ཡོད་པ་རེད།།