རྒྱ་ནག་ནས་ཐའེ་ལྦན་དུ་བསྐྱོད་རྒྱུར་ཆོག་མཆན་ཕར་སྣོན།

༄༅༎རྒྱ་ནག་སྐམ་ས་ཆེན་པོའི་ཞིང་ཆེན་དང་རང་སྐྱོང་ལྗོངས་ཀྱི་ས་ཁུལ་དྲུག་ཐའེ་ལྦན་དུ་འགྲིམས་འགྲུལ་བྱེད་ཆོག་པའི་ཕར་སྣོན་བྱས་ཡོད་པའི་སྐོར་དེ་རིང་རྒྱ་ནག་ནང་རྟེན་གཞི་བྱས་པའི་མཚོ་ཁག་གཉིས་ཀྱི་ཡུལ་སྐོར་སྤྲོ་ཆམ་བརྗེ་ལེན་ལས་ཁུངས་ཀྱིས་གནས་ཚུལ་སྤེལ་ཡོད་པ་རེད།

ཐའེ་ལྦན་དུ་ཡུལ་བསྐོར་སྤྲོ་འཆམ་སོགས་འགྲིམས་འགྲུལ་བྱེད་ཆོག་པའི་ཞིང་ཆེན་དང་རང་སྐྱོང་ལྗོངས་ཀྱི་ས་གནས་དྲུག་ནི། ནང་སོག་རང་སྐྱོང་ལྗོངས་དང༌། བོད་རང་སྐྱོང་ལྗོངས།

ཤིང་ཅང་རང་སྐྱོང་ས་ཁུལ། ནིག་ཤ་ ཧུཨི་ རིགས་རང་སྐྱོང་ལྗོངས། མཚོ་སྔོན་ཞིང་ཆེན་དང་ཀན་སུ་ཞིང་ཆེན་བཅས་ཡིན་པ་དང༌། རེས་གཟའ་པ་སངས་ཉིན་ཐའེ་ལྦན་གྱི་རྒྱལ་ས་ཐའེ་ཕེ་ནང་དུ་རྒྱ་ནག་སྐམ་ས་ཆེན་པོའི་ཡུལ་བསྐོར་སྤྲོ་འཆམ་ལས་ཁུངས་གསར་འཛུགས་བྱས་པའི་མཛད་སྒོའི་ཐོག་རྒྱ་ནག་སྐམ་ས་ཆེན་པའི་མཚོ་ཁག་གཉིས་ཀྱི་ཡུལ་བསྐོར་སྤྲོ་འཆམ་བརྗེ་ལེན་ལས་ཁང་གི་ཚོགས་གཙོ་རུས་མིང་ཧྲའོ་ཆི་ལྦེ་ཡིས་སྤེལ་བའི་གཏམ་བཤད་ནང༌། ཐའེ་ལྦན་དུ་འགྲིམས་འགྲུལ་བྱེད་ཆོག་པའི་རྒྱ་ནག་གི་ཞིང་ཆེན་དང་རང་སྐྱོང་ལྗོངས་ཀྱི་ས་གནས་ཁག་དྲུག་ཕར་སྣོན་སྒོ་མོ་ཕྱེ་བ་མ་ཟད། ད་དུང་རྒྱ་ནག་གི་ཕྱོགས་ནས་ཐའེ་ལྦན་དུ་ཡུལ་བསྐོར་སྤྲོ་འཆམ་པ་བསྐྱོད་མཁན་མང་དུ་འགྲོ་བའི་ལས་དོན་སྤེལ་རྒྱུ་དང་དེ་ཡང་མི་སྒེར་གྱི་ཡུལ་བསྐོར་སྤྲོ་འཆམ་དུ་བསྐྱོད་ཐུབ་པའི་ལས་དོན་འཆར་གཞི་བྱེད་བཞིན་ཡོད་ལུགས་བཤད་ཡོད་པ་དང༌། ཧྲའོ་ཡིས། ལོ་འདིའི་ནང་དུ་རྒྱ་ནག་སྐམ་ས་ཆེན་པོ་ནས་ཐའེ་ལྦན་དུ་ཡུལ་བསྐོར་སྤྲོ་འཆམ་པ་འབུམ་དྲུག་ལྷག་བསྐྱོད་ཐུབ་པའི་རེ་བ་ཡང་བྱེད་ཀྱི་ཡོད་པ་རེད། ད་དུང་རེས་གཟའ་པ་སངས་ཉིན་རྒྱ་ནག་གི་ལྷོ་ཤར་ཕུའུ་ཅན་ཞིང་ཆེན་གྱི་གྲོང་མཚོ་དང་གྲོང་གསེབ་ས་ཁུལ་ནས་སྐུ་ཚབ་བརྒྱ་ལྷག་སླེབས་ཡོད་པ་ཚོ་དང་ཐའེ་ལྦན་གྱི་དབུས་མཚོ་གླིང་གི་གྲོང་མཚོ་དང་གྲོང་གསེབ་ས་ཁུལ་ཁག་གི་སྐུ་ཚབ་བརྒྱ་ལྷག་དབར་ལ་ཡུལ་བསྐོར་སྤྲོ་འཆམ་པའི་ལས་དོན་དང༌། སོ་ནམ་ཐོན་སྐྱེས་ཀྱི་ལས་དོན་མཉམ་ལས་གོང་འཕེལ་གཏོང་རྒྱུའི་གྲོས་མཐུན་ཐོག་ས་རྟགས་རྒྱབ་ཡོད་པ་རེད།