བལ་ཡུལ་དང་རྒྱ་གར་བར་ཚོང་དོན་གྱི་གྲོས་མཐུན་བྱུང་ཡོད་པ།

༄༅༎བལ་ཡུལ་གྱི་སྲིད་བློན་མ་རྡལྦ་ཀུ་མའར་ནེ་པལ་ད་རེས་རྒྱ་གར་དུ་འཚམས་འདྲིར་ཕེབས་ཏེ་རེས་གཟའ་སྤེན་པའི་ཉིན་བལ་ཡུལ་དང་རྒྱ་གར་གཉིས་བར་ལ་ཚོང་དོན་གྱི་གྲོས་མཐུན་གསར་པ་ཞིག་ཐོག་གྲོས་འཆམ་བྱུང་ཡོད་པ་རེད།

བལ་པོའི་སྲིད་བློན་མ་རྡལྦ་ཀུ་མའར་ནེ་པལ་འདི་ལོའི་ཕྱི་ཟླ་ལྔ་པའི་ནང་སྲིད་བློན་དུ་བསྐོ་བཞག་བྱུང་བ་ནས་བཟུང་འདས་པའི་ཟླ་གསུམ་ལྷག་ཙམ་དེའི་ནང་ཐེངས་དང་པོ་གཞུང་འབྲེལ་གྱི་འཚམས་འདྲི་དེ་རྒྱ་གར་དུ་ཕེབས་པ་དང་དེའི་དམིགས་ཡུལ་ནི་ཡུལ་གྲུ་གཉིས་བར་འབྲེལ་ལམ་གྱི་ནུས་སྟོབས་ཆེ་རུ་གཏོང་རྒྱུ་ཡིན་ཞིང་དེ་རེང་རེས་གཟའ་སྤེན་པའི་ཉིན་ཉིན་མ་ལྔའི་གཞུང་འབྲེལ་གྱི་འཚམས་འདྲི་མཇུག་སྒྲིལ་ཡོད་པ་རེད། དེ་རིང་བལ་པོའི་སྲིད་བློན་གྱིས་གསལ་བསྒྲགས་ཤིག་སྤེལ་བའི་ནང་དུ་ད་རེས་ཁོང་རྒྱ་གར་དུ་འཚམས་འདྲིར་ཕེབས་ཏེ་རྒྱ་གར་གྱི་སྲིད་བློན་མཱན་མོ་ཧན་སིང་མཆོག་དང་མཇལ་འཕྲད་གནང་བ་དང་ཚོང་འབྲེལ་གྲོས་མཐུན་གསར་པ་གྲོས་འཆམ་བྱུང་བ།ཕྱོགས་གཉིས་ཀྱི་ས་མཚམས་ཕན་ཚུན་དངུལ་དང་དུག་རྫས།མཚོན་ཆ་ནག་ཚོང་རྒྱབ་ཀྱི་ཡོད་པའི་གནད་དོན་སོགས་ཐོག་བཀའ་བསྡུར་གནང་སྟེ་ཁྱིམ་མཚེས་ཡུལ་གྲུ་གཉིས་བར་ལ་བཟང་ཕྱོགས་ཀྱི་འབྲེལ་ལམ་ཧ་ཅང་གི་ཡག་པོ་བྱུང་བ་དང་འཚམས་འདྲི་ཧ་ཅང་གི་ལམ་ལྷོང་ཆེན་པོ་བྱུང་ཞེས་དགའ་ཚོར་ཆེན་པོའི་བསྔགས་བརྗོད་གནང་ཡོད་པ་རེད། རྒྱ་གར་དང་ཁྱིམ་མཚེས་ཡུལ་གྲུ་བལ་ཡུལ་གཉིས་ནི་འབྲེལ་ལམ་ཉེ་བའི་གནའ་འབྲེལ་གྱི་ཡུལ་གྲུ་ཞིག་དང་ཚོང་འབྲེལ་ལྡན་པའི་རྒྱལ་ཁབ་གཙོ་བོ་ཞིག་ཏུ་གྱུར་ཏེ་འབྲེལ་ལམ་ཡག་པོ་ཡོད་པ་ཞིག་ཡི་ནཔ་དང་ཡིན་ནའང་དེ་སྔ་བལ་ཡུལ་ནང་དུ་མི་ལོ་བཅུ་ཕྲག་རིང་མའོ་གྱེན་ལོག་ཤོག་ཁག་གིས་རྒྱལ་ནང་དམག་འཁྲུག་བརྒྱབ་པ་དང་དེ་རྗེས་ཕྱི་ལོ་ཉིས་སྟོང་དྲུག་ལོར་གཞུང་དང་མའོ་གྱེན་ལོག་ཤོག་ཁག་བར་ཞི་བའི་གྲོས་འཆམ་བྱུང་བའི་རྗེས་མའོ་གྱེན་ལོག་ཤོག་ཁག་གཞུང་ནང་འཛུལ་ཞུགས་བྱས་པ་མ་ཟད་འོས་བསྡུའི་ནང་རྒྱལ་ཁ་ཆེན་པོ་ཐོབ་སྟེ་མའོ་གྱེན་ལོག་ཤོག་ཁག་གིས་གཞུང་གསར་པ་གསར་འཛུགས་བྱས་པ་ནས་བཟུང་རྒྱ་གར་བར་གྱི་འབྲེལ་ལམ་ཇེ་སྡུག་ཕྱིན་ཡོད་པ་རེད།

ད་རེས་བལ་ཡུལ་གྱི་སྲིད་བློན་ཁོང་གིས་བལ་པོའི་གཡོན་ཐལ་ཆེ་བའི་ཆབ་སྲིད་ཚོགས་པས་རྒྱ་གར་གཞུང་གིས་བལ་ཡུལ་གྱི་ནང་སྲིད་ལ་ཐེ་ཇུས་བྱེད་པ་དང་བལ་ཡུལ་གཞུང་ལམ་ལྷོང་མི་ཡོང་བའི་ཐབས་རྒྱ་ཇུས་གཏོང་བྱེད་ཀྱི་ཡོད་པའི་སྐྱོན་བརྗོད་བྱེད་བཞིན་པ་དང་ལྷག་པར་དུ་བལ་པོའི་དེ་སྔའི་སྲིད་བློན་ཚོས་གཞུང་འཛིན་གནང་སྟེ་གཞུང་འབྲེལ་གྱི་འཚམས་འདྲི་ཐེངས་དང་པོ་དེ་རྒྱ་ནག་ཏུ་ཕེབས་དང་དེ་རྗེས་རྒྱ་གར་དུ་ཕེབས་སྲོལ་ཡོད་ཀྱང་ད་རེས་ཁོང་གི་འཚམས་འདྲི་ཐོག་མ་དེ་རྒྱ་གར་དུ་ཕེབས་ཡོད་པ་རེད༎