ས་ཡོམ་གོད་ཆག་ཁྲོད་མི་ཤི་བའི་གྲངས་འབོར་༧༥༥༧ཟིན་འདུག

བལ་ཡུལ་ནང་ས་ཡོམ་གྱི་གོད་ཆག་ཁྲོད་རྐྱེན་འདས་སོང་བའི་མིིའི་གྲངས་འབོར་༧༥༥༧ཟིན་པ་དང་༡༤༥༠༠ལ་རྨས་སྐྱོན་ཕོག་འདུག
དེ་ཡང་ཕྱི་ཟླ་༤པའི་ཚེས་༢༥ཉིན་བལ་ཡུལ་ནང་འགུལ་ཚད་རིམ་པ་༧དང་གྲངས་ཆུང་༨བྱས་པའི་ས་འགུལ་གྱི་གནོད་འཚེ་ཕོག་པའི་གོད་ཆག་འོག་རྐྱེན་འདས་སུ་ཕྱིན་པའི་མིའི་གྲངས་འབོར་ད་བར་ཤེས་རྟོགས་བྱུང་བ་༧༥༥༧་ཡིན་པ་བལ་ཡུལ་གཞུང་གིས་གསལ་བསྒྲགས་བྱས་ཡོད་ཅིང་། ད་དུང་ཡང་ས་ཁུལ་མང་པོ་ཞིག་ཏུ་ཛ་དྲག་མྱུར་སྐྱོབ་དང་ངལ་སེལ་གྱི་རོགས་རམ་འབྱོར་ཐུབ་མེད་པར་བལ་ཡུལ་གཞུང་ལ་སྐྱོན་བརྗོད་ཤུགས་ཆེ་བྱུང་བཞིན་ཡོད་སྟབས། དེ་རིང་གཟའ་མིག་དམར་ཉིན་བལ་ཡུལ་གཞུང་གིས་ཛ་དྲག་མྱུར་སྐྱོབ་དང་ངལ་སེལ་རོགས་རམ་གྱི་ལས་དོན་ཤུགས་ཆེ་ཞིག་སྤེལ་རྒྱུ་ཡིན་པ་བརྗོད་ཡོད་པ་རེད།
བལ་ཡུལ་གཞུང་གིས་བརྗོད་དོན་ལྟར་ན། ཛ་དྲག་མྱུར་སྐྱོབ་ངལ་སེལ་རོགས་རམ་མཁོ་སྤྲོད་ཀྱི་ལས་དོན་འདིའི་ནང་བལ་ཡུལ་གྱི་དམག་མི་དང་ཉེན་རྟོག་པ་ཆིག་འབུམ་གསུམ་ཁྲི་ཆིག་སྟོང་ཙམ་ཞུགས་རྒྱུ་དང་། ཕྱི་རྒྱལ་གྱི་རོགས་ཚོགས་དང་མྱུར་སྐྱོབ་སྡེ་ཁག་གི་མི་གྲངས་བརྒྱ་ཙམ་ལས་དོན་དེའི་ནང་མཉམ་ཞུགས་བྱ་རྒྱུ་ཡིན་འདུག
བལ་ཡུལ་གྱི་ནང་སྲིད་བློན་ཆེན་Laxmi Prasad Dhakalགྱིས་ད་ཆ་ས་ཡོམ་གྱི་གོད་ཆག་བྱུང་བའི་གནས་སྟངས་རིམ་པས་སྟངས་འཛིན་འོག་སླེབས་ཐུབ་པ་དང་། ས་ཡོམ་གྱི་གོད་ཆགས་ཆེ་ཤོས་བྱུང་ཡུལ་གྱི་ས་ཁུལ་ཁག་ཏུ་ངལ་སེལ་རོགས་རམ་འབྱོར་ཐུབ་ཡོད་པ་འགྲེལ་བརྗོད་གནང་ཡོད་པ་རེད།
བལ་ཡུལ་རྒྱལ་ཡོངས་ཛ་དྲག་མྱུར་སྐྱོབ་ལས་དོན་ལྟེ་གནས་ཁང་གིས་ས་ཡོམ་གྱི་གོད་ཆགས་འོག་རྐྱེན་འདས་སུ་ཕྱིན་པའི་གྲངས་འབོར་༧༥༥༧ཙམ་དུ་སླེབས་ཡོད་པ་དང་། མི་གྲངས་༡༤༥༠༠ལྷག་ལ་རྨས་སྐྱོན་ཕོག་ཡོད་པར་མ་ཟད། ད་དུང་ས་ཡོམ་གྱི་གོད་ཆགས་ཆེ་ཤོས་བྱུང་སའི་ས་གནས་མང་པོ་ཞིག་དུ་ཛ་དྲག་མྱུར་སྐྱོབ་ཀྱི་ལས་དོན་རུ་ཁག་སླེབས་ཐུབ་མེད་པ་དེ་དག་གི་ནང་ཡང་མི་ཤི་བའི་དོན་རྐྱེན་ཚབས་ཆེ་བྱུང་ཡོད་སྟབས་ཤི་རྨས་ཀྱི་གྲངས་འབོར་ད་དུང་ཇེ་མཐོར་འགྲོ་རྒྱུ་ཡིན་པའི་ཚོད་དཔག་བྱེད་བཞིན་ཡོད་པ་རེད།
གཟའ་ཟླ་བའི་ཉིན་ཨ་མི་རི་ཀའི་མྱུར་སྐྱོབ་ངལ་སེལ་རུ་ཁག་གིས་ཐད་འཕུར་གནམ་གྲུའི་ཐོག་ནས་མཐའ་མཚམས་ས་གནས་འགའ་ཤས་ཀྱི་ནང་མྱུལ་ཞིབ་ཀྱི་ལས་དོན་སྤེལ་འདུག་ཅིང་། ས་ཁུལ་དེ་དག་གི་ནང་མཁའ་ལམ་གྱི་ཐོག་ནས་ཟས་རིགས་མཁོ་སྤྲོད་དང་རྨས་སྐྱོན་ཕོག་པའི་མི་ཁག་གཅིག་ཐད་འཕུར་གནམ་གྲུའི་ཐོག་ནས་འོར་འདྲེན་བྱེད་འཆར་ཡོད་འདུག

གསར་འགོད་པ་སྤྱི་ཁྱབ་རྩོམ་སྒྲིག་པ་སྐལ་ལྡན་བློ་གྲོས།