བལ་ཡུལ་གྱི་སྲིད་བློན་གོ་གནས་ནས་དགོངས་ཞུ།

༄༅༎བལ་ཡུལ་གྱི་མའོ་ཚོགས་པའི་སྲིད་བློན་པཱར་ཅན་རྡ་མཆོག་ཡུལ་གྱི་དམག་སྤྱི་རུཀ་མེན་གུརྡ་ཀ་ཊ་ལྦལ་གོ་གནས་ནས་གནས་དབྱུང་བཏང་བའི་དཀའ་རྙོག་འོག་རང་ཉིད་སྲིད་བློན་གྱི་ལས་གནས་ནས་དགོངས་ཞུ་གནང་དགོས་བྱུང་བའི་གནས་ཚུལ་ཐོན་འདུག

པཱར་ཅན་རྡས་ཡུལ་གྱི་དམག་སྤྱི་ཀ་ཊ་ལྦལ་དམག་སྤྱིའི་གོ་གནས་ནས་གནས་དབྱུང་བཏང་བ་དེ་སྲིད་འཛིན་རཱམ་སྦ་རན་ཡ་རྡལྦ་མཆོག་གིས་རྩ་ཁྲིམས་དང་འགལ་བའི་བྱ་བ་ཞིག་ཆགས་ཀྱི་ཡོད་པའི་ཐག་གཅོད་གནང་ཡོད་པ་རེད། གོང་ཞུས་སྲིད་འཛིན་མཆོག་གི་ཐག་གཅོད་དེ་པཱར་ཅན་རྡས་དམག་སྤྱི་ཀ་ཊ་ལྦལ་དམག་སྤྱིའི་གོ་གནས་ནས་ཕྱིར་འབུད་བྱས་ནས་ཆུ་ཚོད་འགའ་ཤས་རྗེས་བྱུང་བ་ཞིག་ཡིན་པ་རེད། དེ་བཞིན་སྲིད་འཛིན་མཆོག་ལ་དམག་སྤྱི་ཀ་ཊ་ལྦལ་གོ་གནས་སུ་མུ་མཐུད་བཞག་དགོས་པའི་ཞུ་སྙན་ཞིག་ཡུལ་གྱི་སྲིད་དོན་ཚོགས་པ་བཅོ་བརྒྱད་ཀྱིས་ཕུལ་ཡོད་པ་མ་ཟད་ཞུ་སྙན་དེའི་ནང་སྲིད་འཛིན་མཆོག་གིས་ཡུལ་གྱི་རྩ་ཁྲིམས་གཞི་བཟུང་དམག་སྤྱིའི་ལས་གནས་ནས་ཕྱིར་འབུད་བྱས་པ་དེ་བཀག་འགོག་གནང་དགོས་སྐོར་ཞུ་སྙན་དེའི་ནང་བཀོད་ཡོད་པ་རེད། སྲིད་འཛིན་ཡ་རྡལྦན་མཆོག་གིས་སྲིད་བློན་པཱར་ཅན་རྡས་ཡུལ་གྱི་དམག་སྤྱི་ཕྱིར་འབུད་བྱེད་པའི་ཐག་གཅོད་དེ་མ་འགྲིག་པའི་ཐག་གཅོད་གནང་བ་དེས་མའོ་ཤོག་ཁག་གི་སི་པི་ཨེན་ཚོགས་པས་ངོ་རྒོལ་ཆེད་གཞུང་འཛིན་ནས་ཕྱིར་འཐེན་བྱེད་རྒྱུའི་ཐག་གཅོད་བྱས་ཡོད་པའི་གནས་ཚུལ་ཐོན་བཞག།