བལ་ཡུལ་ཁྲིམས་ཁང་ནས་སྲིད་འཛིན་གཞོན་པར་བཀའ་ཁྱབ།

༄༅༎བལ་ཡུལ་གྱི་ཆེས་མཐོའི་ཁྲིམས་ཁང་གིས་གཟའ་འཁོར་འདིའི་ནང་ཚུད་ལ་བལ་ཡུལ་གྱི་སྲིད་འཛིན་གཞོན་པ་པ་ར་མ་ནན་རྡ་ཇ་ལ་བལ་པོའི་སྐད་ཡིག་ཐོག་ནས་སྲིད་འཛིན་གཞོན་པའི་མཛད་འགན་བཞེས་པའི་དམ་བཅའ་བཞེས་དགོས་པའི་བཀའ་ཁྱབ་བཏང་ཡོད་པ་དང་གལ་ཏེ་ཁོང་གིས་དམ་བཅའ་མ་ལེན་པ་ཡིན་ཚེ་སྲིད་འཛིན་གཞོན་པའི་མཛད་འགན་མུ་མཐུད་བཞེས་ཆོག་གི་མེད་པའི་སྐོར་གསུངས་ཡོད་པ་རེད།

དེ་ཡང་ཕྱི་ལོ་ཉིས་སྟོང་བརྒྱད་ལོའི་ཕྱི་ཟླ་བདུན་པའི་ཚེས་ཉི་ཤུ་གསུམ་ཉིན་ཁོང་གིས་སྲིད་འཛིན་གཞོན་པ་དང་སྤྱི་ཁྱབ་དྲུང་ཆེའི་མཛད་འཁུར་གྱི་དམ་བཅའ་ཧིན་རྡིའི་སྐད་ཡིག་གི་ཐོག་ནས་བཞེས་པ་དང་ཡང་སྐབས་དེར་སྲིད་འཛིན་གྱིས་བལ་པོའི་སྐད་ཡིག་ཐོག་ནས་དམ་བཅའ་བཞེས་པའི་གནས་ཚུལ་བྱུང་བར་བརྟེན་ན་ནིང་ཕྱི་ཟླ་བདུན་པའི་ཕྱི་ཚེས་ཉི་ཤུ་ལྔ་ཉིན་བལ་པོའི་ཆེས་མཐོའི་ཁྲིམས་ཁང་གི་སྦལ་ཀི་རིཤ་ན་ནིའུ་པ་ནེ་ཟེར་བས་སྲིད་འཛིན་གཞོན་པར་ཧིན་རྡིའི་སྐད་ཡིག་ཐོག་ལ་དམ་བཅའ་བཞེས་པར་འགྲིག་མི་ནགྱི་གྱོད་དོན་ཁྲིམས་གཏུགས་བྱས་ཡོད་པ་རེད། ཉེ་ཆར་བལ་པོའི་ཆེས་མཐོའི་ཁྲིམས་ཁང་ནས་ཐེངས་གཉིས་སྲིད་འཛིན་གཞོན་པར་མཛད་འགན་བཞེས་པའི་དམ་བཅའ་བལ་པོའི་སྐད་ཡིག་ཐོག་ནས་བཞེས་དགོས་པའི་བཀའ་ཁྱབ་བཏང་ཡང་ཁོང་གིས་དམ་བཅའ་མ་བཞེས་པར་རྩོད་གཞིའི་གནད་དོན་ཞིག་ཏུ་གྱུར་ཡོད་ཅིང་དེ་ཡང་ཐོག་མར་ཕྱི་ཟླ་བདུན་པའི་ཚེས་ཉི་ཤུ་བཞི་ཉིན་ཆེས་མཐོའི་ཁྲིམས་དཔོན་ལྷན་ཚོགས་ཀྱི་ཚོགས་མི་གཉིས་ཀྱིས་གལ་ཏེ་ཁོང་གིས་སྲིད་འཛིན་གཞོན་པ་དང་སྤྱི་ཁྱབ་དྲུང་ཆེའི་མཛད་འཁུར་བཞེས་རྒྱུ་ཡིན་ཚེ་ངེས་པར་དུ་དམ་བཅའ་བཞེས་དགོས་པའི་བཀོད་ཁྱབ་བཏང་བ་དང་དེ་རྗེས་ཟླ་བ་འདིའི་ཕྱི་ཚེས་བཅུ་གཉིས་ཉིན་ཁྲིམས་དཔོན་ལྷན་ཚོགས་ཡོངས་ནས་བསྐྱར་དུ་དམ་བཅའ་བཞེས་དགོས་པ་དང་དེ་ཡང་བལ་པོའི་སྐད་ཡིག་ཐོག་ནས་བཞེས་དགོས་པ་ཨུ་ཚུགས་མཐའ་སྐྱེལ་གནང་ཡོད་པ་མ་ཟད་ད་རེས་རེས་གཟའ་ཉི་མའི་ཉིན་སླར་ཡང་གཟའ་འཁོར་འདིའི་ནང་ཚུད་ལ་བལ་པོའི་སྐད་ཡིག་ཐོག་ནས་དམ་བཅའ་བཞེས་དགོས་པའི་བཀའ་ཁྱབ་བཏང་ཡོད་པ་རེད།