བོད་མི་༡༤བོད་ནས་བྲོས་བྱོལ་སྐྱབས་བཅོལ་ལ་འབྱོར་འདུག

བོད་ཀྱི་ས་ཁུལ་འདྲ་མིན་ནས་བལ་ཡུལ་བརྒྱུད་བྲོས་བྱོལ་ལ་ཡོང་མཁན་བོད་མི་མི་གྲངས་༡༤ལྡི་ལིར་འབྱོར་འདུག
དེ་ཡང་འདི་གའི་གསར་འགོད་པས་གནས་ཚུལ་བཏང་དོན། ཉེ་བའི་ནང་བོད་ནས་བལ་ཡུལ་བརྒྱུད་གསར་དུ་བྲོས་བྱོལ་ལ་འབྱོར་བའི་བོད་མི་མི་གྲངས་༡༤ལྡི་ལི་བོད་ཀྱི་སྣེ་ལེན་ཁང་ལ་འབྱོར་ཡོད་པ་དང་། ཚེས་༡༧ཉིན་བཞུགས་སྒར་ཕྱོགས་སུ་ཕེབས་ཐོན་གནང་འདུག ཁོང་ཚོ་ནི་བོད་རིགས་ན་གཞོན་ལོ་ན་༡༧་ནས་༣༠་བར་ཡིན་པ་དང་། བཞུགས་སྒར་ཕྱོགས་སུ་ཕེབས་ཐོན་བྱས་པའི་བོད་རིགས་༡༤རྣམས་བོད་ནས་འདས་པའི་ཟླ་བ་གཅིག་གི་དུས་ཡུན་ནང་བལ་ཡུལ་དུ་འབྱོར་ནས་བལ་ཡུལ་གྱི་སྣེ་ལེན་ཁང་དུ་འཚམས་འདྲི་དང་། དགོས་མཁོ་ཁག་ཕུལ་ནས་ཉར་འཇོག་ཞུས་ཡོད་པ་དང་། དེ་ནས་རིམ་པས་བལ་ཡུལ་ནང་དུ་ཡོད་པའི་རྒྱ་གར་གྱི་གཞུང་ཚབ་ཁང་བརྒྱུད་ནས་ཡིག་ཆ་དང་། ཕྱག་ཁྱེར་སོགས་འགྲོ་ལུགས་རིམ་པ་བསྒྲུབ་རྗེས་བལ་ཡུལ་ནས་རྒྱ་གར་གྱི་ཕྱོགས་སུ་ཕེབས་སྐྱེལ་གནང་ཡོད་པ་རེད།
ཕྱི་ལོ་༢༠༠༨་སྔོན་དུ་བོད་ནས་ལོ་གཅིག་གི་དུས་ཡུན་ནང་མི་གྲངས་་༢༠༠༠་ནས་༤༠༠༠་ཙམ་གསར་དུ་འབྱོར་བའི་ལོ་རྒྱུས་བྱུང་ཡོད། འོན་ཀྱང་ཕྱི་ལོ་༢༠༠༨་གྱི་ཞི་རྒོལ་ཆེན་མོ་བྱུང་བའི་རྗེས་སུ་རྒྱ་ནག་དང་། བལ་ཡུལ་གཉིས་ཀས་ས་མཚམས་ཀྱི་ཁུལ་དུ་དམ་བསྒྲགས་དང་། མཐའ་མཚམས་དམག་མི་འཕར་མ་འགྲེམས་འཇོགས་ཀྱིས་བོད་ནས་བྲོས་བྱོལ་ཕེབས་མཁན་ཇེ་ཉུང་དུ་ཕྱིན་ཡོད་ཅིང་། ལྷག་དོན་དུ་བོད་ནས་བོད་མི་བྲོས་བྱོལ་བ་རྣམས་ལ་རྒྱ་ནག་གིས་དམ་བསྒྲགས་ཤིན་ཏུ་ཆེན་པོ་བྱས་པར་བརྟེན་བོད་ནས་བལ་བོད་ས་མཚམས་བརྒྱུད་ནས་ཡོང་མཁན་ཤིན་ཏུ་ནས་ཉུང་དུ་ཕྱིན་པ་རེད།  

གསར་འགོད་པ་ཀརྨ་རྡོ་རྗེ།