བལ་ཡུལ་དམག་སྤྱི་གནས་དབྱུང་གཏོང་ཐབས་ནོར་འཁྲུལ་ཡིན།

༄༅༎བལ་ཡུལ་གྱི་སྲིད་བློན་གསར་པ་མཱ་རྡལྦ་ཀུ་མའར་ནེ་པལ་མཆོག་གིས་སྲིད་བློན་ཟུར་པ་པཱར་ཅན་རྡས་བལ་ཡུལ་གྱི་དམག་སྤྱི་གནས་དབྱུང་གཏོང་ཐབས་བྱས་པ་དེ་ནོར་འཁྲུལ་ཡིན་པ་དང་ཁོང་གིས་དམག་སྤྱི་གོ་གནས་མུ་མཐུད་བཞེས་རྒྱུ་ཡིན་སྐོར་དབྱིན་ཇིའི་སྦི་སྦི་སི་གསར་འགྱུར་ལས་ཁང་ལ་གསུངས་ཡོད་པ་རེད།

བལ་ཡུལ་གྱི་སྲིད་བློན་ཟུར་པ་པཱར་ཅན་རྡ་ནས་དམག་སྤྱི་རུཀ་མང་གུལ་ཀ་ཊ་ལྦལ་ལ་མའོ་གྱེན་ལོག་ཤོག་ཁག་གི་དམག་ཟུར་༡༩༠༠༠ཙམ་བལ་ཡུལ་གྱི་རྒྱུན་ལྡན་དམག་དཔུང་ཁོངས་སུ་ཟླ་བསྒྲིལ་གཏོང་རྒྱུའི་ལས་འཆར་ལ་དོ་ཕོག་བཏང་བའི་སྐྱོན་འཛུགས་བྱས་སྟེ་ཁོང་དམག་སྤྱི་ནས་ཕྱིར་འབུད་བཏང་ཡོད་པ་རེད། ཡིན་ཡང་བལ་ཡུལ་གྱི་སྲིད་འཛིན་མཆོག་ནས་སྲིད་བློན་གྱི་ཐག་གཅོད་དེ་རྩ་ཁྲིམས་དང་འགལ་བ་ཡིན་པའི་བཞེངས་ཕྱོགས་འཛིན་སྟེ་དམག་སྤྱི་རང་སར་གནས་དགོས་པའི་ཐག་གཅོད་བྱས་པའི་རྩོད་རྙོག་གིས་རྐྱེན་པས་པཱར་ཅན་རྡ་སྲིད་བློན་གྱི་ལས་འཁུར་ནས་དགོངས་ཞུས་བྱས་སྟེ་ཉེ་སྔོན་མཱ་རྡལྦ་ཀུ་མའར་བལ་ཡུལ་གྱི་སྲིད་བློན་གསར་པར་འོས་འདེམས་བྱུང་ཡོད་པ་རེད། རེས་གཟའ་ཕུར་བུའི་ཉིན་དབྱིན་ཇིའི་སྦི་སྦི་སི་གསར་འགྱུར་ལས་ཁང་གིས་སྲིད་བློན་གསར་པ་མཱ་རྡལྦ་ཀུ་མའར་ནེ་པལ་མཆོག་ལ་དེ་སྔོན་སྲིད་བློན་ཟུར་པས་ཕྱིར་འབུད་བྱས་པའི་དམག་སྤི་ཀ་ཊ་ལྦལ་གྱི་གོ་གནས་བསྐྱར་གསོ་བྱེད་མིན་སྐོར་བཅར་འདྲི་བྱས་པར་སྲིད་བློན་མཆོག་གིས་ཁོང་གིས་སྣེ་འཁྲིད་པའི་གཞུང་འཛིན་ཚོགས་པའི་ངོས་ནས་སྲིད་བློན་ཟུར་པས་དམག་སྤྱི་ཕྱིར་འབུད་བྱས་པ་དེ་ཐག་གཅོད་ནོར་བ་ཞིག་ལ་ངོས་འཛིན་བྱེད་ཀྱི་ཡོད་པ་དང་དེར་བརྟེན་བལ་ཡུལ་གྱི་གཞུངགསར་པའི་བློན་ཆེན་ཁག་གཏན་འབེབས་བྱུང་མཚམས་དམག་སྤྱི་ཕྱིར་འབུད་བྱས་པའི་ནོར་འཁྲུལ་གྱི་ཐག་གཅོད་དེར་བསྐྱར་བཅོས་བྱ་རྒྱུ་ཡིན་ཞེས་གསལ་སྟོན་བྱས་ཡོད་པ་རེད།