བོད་ནང་གི་རྔ་བ་ཕྱོགས་སུ་མུ་མཐུད་རིམས་ནད་ཁྲོད་མི་སྣ་འདས་གྲོངས་སུ་འགྲོ་བཞིན་ཡོད་འདུག

ཕྱི་ལོ་༢༠༢༢ལོའི་ཕྱི་ཟླ་༡༢་པའི་ཟླ་མཇུག་ནས་བཟུང་རྒྱ་ནག་གཞུང་འབྲེལ་ངོས་ནས་རིམས་ནད་བཀག་བསྡོམས་གློད་པ་དང་འབྲེལ། བོད་ནང་རིམས་ནད་ཁྱབ་གདལ་ཤུགས་ཆེར་སོང་སྟེ་མི་སྣ་འདས་གྲོངས་ཀྱི་གནས་ཚུལ་རིམས་པར་ཐོན་བཞིན་ཡོད་པ་ལྟར། ད་ལྟའི་ཆར་མདོ་སྨད་རྔ་བ་ཕྱོགས་སུ་མུ་མཐུད་འདས་གྲོངས་སུ་འགྲོ་བཞིན་པའི་གནས་ཚུལ་བྱུང་གི་ཡོད་འདུག་ལ། འདས་པའི་བདུན་ཕྲག་གཅིག་རིང་རྔ་བ་ཀིརྟི་དགོན་པར་ཉིན་ལྟར་རྒྱུ་ཆད་མེད་པར་ཕུང་པོ་མང་དུས་༡༣ནས་༡༤་དང་། ཉུང་དུས་༧ནས་༨་བར་ཡོང་གི་ཡོད་པ་དང་། རྔ་བ་ཀིརྟི་དགོན་གྱི་དུར་ཁྲོད་དུ་འདས་པའི་བདུན་ཕྲག་གཅིག་ལྷག་རིང་འདས་གྲོངས་སུ་ཕྱིན་པའི་ཕུང་པོ་མང་དྲགས་ཏེ། བྱ་གཏོར་སྐབས་བྱ་རྒོད་ཀྱིས་མ་ཟས་སྟབས། ད་ལྟའི་ཆར་མེ་ལ་ཞུགས་འབུལ་གྱི་ཐབས་ཤེས་བྱེད་ཀྱི་ཡོད་སྐོར། བོད་ནང་གི་འབྲེལ་ཡོད་བོད་མི་ཁག་ཅིག་ནས་འགྲེལ་བརྗོད་གནང་བྱུང་།

གོང་ཞུས་གནས་ཚུལ་མཁོ་སྤྲོད་པ་གཅིག་ནས་མུ་མཐུད་བརྗོད་དོན་ལ།ད་ལྟའི་ཆར་དཀའ་ངལ་ཆེ་ཤོས་དེ་ཏོག་དབྱིབས་རིམས་ནད་ཡིན་མིན་བརྟག་དཔྱད་དང་བདག་པོ་རྒྱག་མཁན་སྨན་པ་དང་སྨན་ཁང་མེད་པ་དང་། སྤྱིའི་ཆ་ནས་འདས་གྲོངས་སུ་འགྲོ་མཁན་མང་ཆེ་ཤོས་རྒན་རྒོན་དང་ནད་གཞི་ཅན་ཡིན་པ་དང་། དཔེར་ན་རྔ་བ་ནས་བུ་མོ་ལོ་ཆུང་ཞིག་ནད་གཞི་ཞིག་གི་རྐྱེན་གྱིས་ལོ་ཤས་སྔོན་རྒྱ་ནག་ཁྲིན་ཏུའུ་སོགས་སུ་རྒྱ་སྒོར་ཁྲི་མང་པོས་སྨན་བཅོས་བྱས་ཏེ་དྲག་སྐྱེད་ཅུང་ཙམ་བྱུང་ཡོད་ཀྱང་། ཉིན་ཤས་སྔོན་རིམས་ནད་ཀྱི་ནད་རྟགས་ཚང་མ་ཐོན་སྟེ་མཐར་འདས་གྲོངས་སུ་ཕྱིན་ཡོད་པ་དང་། འདས་གྲོངས་སུ་འགྲོ་བཞིན་པ་མང་ཆེ་བར་ཚ་བ་ཤུགས་ཆེར་འཕར་ནས་གྲོངས་བཞིན་ཡོད་པ་དང་། ཀིརྟི་དགོན་པའི་དུར་ཁྲོད་དུ་ཕུང་པོ་དུར་མཇུག་གིས་ཁེངས་ནས་ཉིན་གྲངས་༡༥ལྷག་འགྲོ་བཞིན་ཡོད་པ་བརྗོད་བྱུང་།

གཞན་ཡང་ཕྱི་ཟླ་༡ཚེས་༡༠་དང་༡༡་ཉིན་ལྷ་སའི་དུར་ཁྲོད་ཁག་ཏུ་ཕུང་པོ་སྐྱེལ་འདྲེན་བྱེད་མཁན་མང་པོ་ཡོང་གི་ཡོད་ན་ཡང་། ཞིབ་ཕྲའི་གྲངས་ཐོ་སོགས་ཤེས་རྟོགས་མེད་པ་དང་། དེ་བཞིན་ལི་ཐང་ཕྱོགས་སུ་འདས་གྲོངས་སུ་འགྲོ་བཞིན་པའི་གནས་ཚུལ་མང་དག་ཅིག་ཡོང་གི་ཡོད་འདུག་ལ། གསེར་རྟ་བླ་རུང་སྒར་གྱི་དུར་ཁྲོད་དུ་ཕུང་པོ་མང་དྲགས་ཏེ་བྱ་རྒོད་ཀྱིས་མ་བཟས་སྟབས། ཕུང་པོ་མང་པོ་སྤུངས་ནས་འཇོག་དགོས་བྱུང་གི་ཡོད་པ་དང་། ལ་ཤས་ཀྱིས་ཉེ་འཁོར་ཆུ་ནང་ལ་བྱ་གཏོར་གྱིས་གཡུགས་བཞིན་ཡོད་པ་དང་། གཞན་ཡང་རྔ་བ་ཕྱོགས་ནས་ཀིརྟི་དགོན་པའི་དུར་ཁྲོད་ཙམ་མ་ཡིན་པར་དགོན་པ་རེ་རེར་དུར་ཁྲོད་རེ་ཡོད་པས། དུར་ཁྲོད་གཞན་དུ་ཡང་ཕུང་པོ་སྐྱེལ་འདྲེན་བྱེད་མཁན་བྱུང་གི་ཡོད་པ་རེད་ལ། ད་ལྟའི་བར་རྔ་བ་ཕྱོགས་ནས་ཤེས་རྟོགས་བྱུང་བ་མི་གྲངས་༢༠༠ལྷག་འདས་གྲོངས་སུ་ཕྱིན་ཡོད་སྐོར་འགྲེལ་བརྗོད་གནང་གི་འདུག

སྔ་ལོ་ཕྱི་ཟླ་༨ནས་བོད་ཁུལ་དུ་ཏོག་དབྱིབས་རིམས་ནད་ཁྱབ་གདལ་ཧ་ཅང་ཆེན་པོ་ཕྱིན་སྟེ་ཟླ་བ་འགའ་ཤས་རིང་དམ་དྲག་ཤུགས་ཆེ་བྱས་ཡོད་ན་ཡང་། རྒྱ་ནག་ནང་རིམས་ནད་དང་འབྲེལ་བའི་ངོ་རྒོལ་ཤུགས་ཆེར་བྱུང་སྟབས་རྒྱ་ནག་གཞུང་གིས་འདས་པའི་ལོ་གསུམ་རིང་ཏོག་དབྱིབས་རིམས་ནད་དང་འབྲེལ་བའི་དམ་དྲག་ཡོངས་རྫོགས་གློ་བུར་དུ་ཕྱིར་བསྡུ་བྱས་ཡོད་པ་རེད། བོད་ནང་དུ་ཡང་སྲིད་བྱུས་དེ་ལག་བསྟར་བྱས་རྗེས། ནད་ཡམས་དེ་བོད་ཀྱི་ས་ཁུལ་མང་པོའི་ནང་འགོས་ཁྱབ་ཧ་ཅང་ཆེན་པོ་འགྲོ་བཞིན་ཡོད་པ་མ་ཟད། བོད་ཀྱི་ས་ཁུལ་གང་སར་འདས་གྲོངས་སུ་འགྲོ་བཞིན་པའི་གནས་ཚུལ་མུ་མཐུད་བྱུང་བཞིན་ཡོད་པ་རེད།

གསར་འགོད་པ། སངས་རྒྱས་དཀོན་མཆོག  
རྩོམ་སྒྲིག་པ། བསྟན་འཛིན་འཕགས་སྒྲོན། 
དྲ་ཐོག་སྤེལ་མཁན། བསྟན་འཛིན་འཕགས་སྒྲོན།