ལོ་གསར་མཆོད་འབུལ་དང་ངོ་རྒོལ་བརྒྱུད་སྲུང་བརྩི།

༄༅།    །བཙན་བྱོལ་བོད་མིའི་སྒྲིག་འཛུགས་ཀྱི་བཀའ་ཤག་གིས། བོད་ཀྱི་ལོ་གསར་ལ་བོད་ནང་གི་བོད་མིའི་ཚོར་གདུང་སེམས་མཉམ་སྐྱེད་ཞུ་བའི་ཆེད་དུ་ཆོས་ཕྱོགས་ཀྱི་བྱེད་སྒོ་སྤེལ་དགོས་པའི་འབོད་འབུལ་གནང་བ་ལྟར། ལོ་གསར་ཚེས་གཅིག་ཉིན་བཙན་བྱོལ་བོད་མིའི་སྒྲིག་འཛུགས་ཀྱིས་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་གཞུང་འབྲེལ་གྱི་ཆོས་ཕྱོགས་ཀྱི་བྱེད་སྒོ་སྤེལ་བ་དང༌། ཡང་དེ་ཉིན་བཞུགས་སྒར་ཉེ་འཁྲིས་སུ་ཆགས་པའི་ས་རྭ་བོད་ཀྱི་མཐོ་རིམ་སློབ་གཉེར་ཁང་གི་སློབ་མ་༤༠ ཙམ་གྱིས་ལོ་གསར་མ་གཏོང་ཞེས་པའི་རས་དར་འཁྱེར་བཞིན། རས་ནག་པོས་ཁ་ཁབ་ཏེ། བོད་ནང་གི་ད་ལྟའི་ཛ་དྲག་གི་གནས་སྟངས་སྤྱི་དང༌། ཉེ་ཆར་རྒྱ་ནག་གཞུང་གིས་བོད་མི་ཁག་ཅིག་ལ་རང་ལུས་མེ་སྲེག་གཏོང་རྒྱུར་སྐུལ་སློང་བྱས་པའི་ཉེས་མེད་ཉེས་བཙུགས་ཀྱིས་སྲོག་ཐོག་དང་།    བཙོན་འཇུག་གི་ཉེས་བཅད་བཏང་བ་སོགས་བོད་ནང་གི་བོད་མི་ཚོས་མྱོང་བཞིན་པའི་ཡ་ང་བའི་གནས་སྟངས་རྒྱལ་སྤྱིའི་ཐོག་དྲིལ་བསྒྲགས་ཡོང་ཐབས་ཀྱི་ཆེད་དུ་བཞུགས་སྒར་ཉེ་འདབས་སུ་གསར་བཞེངས་གནང་བའི་དཔའ་བོའི་རྡོ་རིང་གི་མདུན་ཐང་དུ་ཟས་བཅད་ངོ་རྒོལ་གྱི་ལས་འགུལ་གནང་ཡོད་པ་རེད། ཚེས་གཅིག་ཉིན་གྱི་ཟས་བཅད་ལས་འགུལ་དེ་ནི་བོད་ནང་གི་བོད་མི་རྣམས་རྒྱ་ནག་གཞུང་གི་དྲག་གནོན་དང་དམ་བསྒྲགས་འོག་དཀའ་སྡུག་མྱོང་བཞིན་པ་ཚོར་གདུང་སེམས་མཉམ་སྐྱེད་ཞུ་རྒྱུ་དང༌། ཉིན་གཉིས་པའི་ཟས་བཅད་ངོ་རྒོལ་དེ་ནི། རྒྱ་ནག་གཞུང་གིས་བོད་མི་གང་བྱུང་འཛིན་བཟུང་བྱས་ཏེ་ཉེས་མེད་ཉེས་འཛུགས་ཀྱིས་དྲང་བདེན་མིན་པའི་ཁྲིམས་ཐག་བཅད་པར་ངོ་རྒོལ་བྱ་རྒྱུའི་ཆེད་དུ་ཡིན་པ་རེད། དེ་བཞིན་ལྡི་ལི་བསམ་ཡས་གླིང་གཞིས་སྒར་གྱི་བོད་མི་ཚོས་ཀྱང་ལོ་གསར་ཚེས་གཅིག་ཉིན་བསམ་ཡས་གླིང་བོད་དགོན་དུ་འདུ་འཛོམས་ཀྱིས་ཐོག་མར་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་སྐུ་པར་མཐོང་གྲོལ་རིན་པོ་ཆེར་མཇལ་དར་སྒྲོན་པ་དང་།    དེ་རྗེས་བོད་ནང་གི་བོད་མི་ཚོར་གདུང་སེམས་མཉམ་སྐྱེད་ཀྱི་ཆོས་འབུལ་སྨོན་ལམ་གཞི་རྒྱ་ཆེན་པོ་ཞིག་ཚོགས་ཡོད་པ་རེད། །