རྒྱ་གར་བྱང་ཤར་ཁུལ་གྱི་ཞུ་གཏུག་མཇུག་སྒྲིལ་ཡོད་པ།

༄༅༎ཟླ་འདིའི་ཕྱི་ཚེས་༢༢ ཉིན་རྒྱ་གར་བྱང་ཤར་ཁུལ་དུ་བོད་དོན་རྒྱབ་སྐྱོར་ཡོང་ཆེད་ཞུ་གཏུག་གི་ལས་འགུལ་སྤེལ་མཁན་སྤྱི་འཐུས་རྣམས་རྗར་ཁནྜ་མངའ་སྡེ་རུ་འབྱོར་ཞིང། མངའ་སྡེའི་སྲིད་སྐྱོང་དང། གྲོས་ཚོགས་ཀྱི་ཚོགས་གཙོ། སྤྱི་ཁྱབ་བློན་ཆེན་ཟུར་པ་གཉིས། དབུས་དང་མངའ་སྡེའི་གྲོས་ཚོགས་འཐུས་མི། སྲིད་དོན་ཚོགས་པ་ཁག་གི་དབུ་ཁྲིད་སོགས་ས་གནས་ཀྱི་གནད་ཡོད་ཆབ་སྲིད་མི་སྣ་རྣམས་དང་མཇལ་འཕྲད་ཞུས་ཡོད་པ་རེད།
དེ་ཡང་གོང་རྒྱ་གར་བྱང་ཤར་ཁུལ་དུ་ཞུ་གཏུག་གི་ལས་འགུལ་སྣེ་ཁྲིད་མཁན་སྤྱི་འཐུས་པདྨ་འབྱུང་གནས་ལགས་དང། སྤྱི་འཐུས་གསེར་རྟ་ཚུལ་ཁྲིམས་ལགས། སྤྱི་འཐུས་དབྱངས་ཅན་སྒྲོལ་དཀར་ལགས། སྤྱི་འཐུས་ཤར་གླིང་ཟླ་སྒྲོན་ལགས་བཅས་ཆ་ཏི་ས་གྷར་མངའ་སྡེའི་ནང་ཞུ་གཏུག་ལས་འགུལ་གྲུབ་ནས་ཕྱི་ཚེས་༢༢ ཉིན་གྱི་དགོང་མོ་རྗར་ཁནྜ་མངའ་སྡེའི་རྒྱལ་ས་རན་ཅི་རུ་འབྱོར། ད་ལྟའི་ཆར་མངའ་སྡེ་དེར་འོས་བསྡུ་བྱས་པའི་གཞུང་དུས་ཡུན་མ་རྫོགས་གོང་ནས་དགོངས་པ་ཞུ་དགོས་བྱུང་བར་བརྟེན། སྲིད་སྐྱོང་གིས་མངའ་སྡེ་དེའི་འགན་དབང་ཆ་ཚང་བཞེས་བཞིན་པའི་སྐབས་ཤིག་ཏུ་ཁེལ་ཡོད་སྟབས། མངའ་སྡེ་དེའི་སྲིད་སྐྱོང་ཌོཀ་ཊར་སཱ་ཧིད་ཨེཧ་མད་(Dr. Sayeed Ahmed)མཆོག་དང་མཇལ་འཕྲད་གནང་ཞིང། བོད་ནང་གི་ཛ་དྲག་གནས་སྟངས་ངོ་སྤྲོད་དང་སྦྲགས་བོད་དོན་རྒྱབ་སྐྱོར་ཡོང་བའི་འབོད་སྐུལ་ཞུས་པར། ཁོང་གིས་བོད་དོན་ལ་བརྩེ་སེམས་དང་གདུང་སེམས་མཉམ་བསྐྱེད་ཡོད་ཅེས་སོགས་གསུངས་ཡོད་འདུག།

གང་ལྟར་རྒྱ་གར་བྱང་ཤར་ཁུལ་དུ་ཞུ་གཏུག་གི་ལས་འགུལ་སྣེ་ཁྲིད་མཁན་སྤྱི་འཐུས་རྣམ་པས་གོང་དུ་ཞུས་པའི་གནད་ཡོད་མི་སྣ་དེ་དག་ལ་བོད་ནང་གི་ཛ་དྲག་གནས་སྟངས་ངོ་སྤྲོད་དང་སྦྲགས་བོད་དོན་རྒྱབ་སྐྱོར་ཡོང་བའི་འབོད་སྐུལ་ཞུ་སྐབས། ཚང་མས་བོད་དོན་ལ་རྒྱབ་སྐྱོར་ཆེན་པོ་ཡོད་པའི་རྣམ་འགྱུར་ཧ་ཅང་གསལ་པོ་བསྟན་ཡོད་པ་བཅས་ཀྱི་གནས་ཚུལ་འདུག།