ཨ་མི་རི་ཀའི་སྲིད་འཛིན་ལྷོ་ཀོ་རི་ཡར་ཕེབས་འབྱོར་གནང་ཡོད་པ།

༄༅༎ཨ་རིའི་སྲིད་འཛིན་སྦ་རཀ་ཨོ་སྦ་མ་མཆོག་དེ་རིང་ལྷོ་ཀོ་རི་ཡའི་ནང་ཕེབས་འབྱོར་ཟིན་པ་ལྟར་བྱང་ཀོ་རི་ཡའི་རྡུལ་ཕྲན་ལས་འཆར་དང་ཐག་གཅོད་མ་བྱུང་བར་འགག་བསྡད་པའི་ཕྱོགས་གཉིས་དབར་ཚོང་དོན་ཁྲལ་ཆག་གི་མཐུན་གྲོས་བཅས་ཀྱི་སྐོར་བཀའ་མོལ་གཙོ་བོ་གནང་རྒྱུ་ཡིན་པ་རེད།

ཨོ་སྦ་མ་མཆོག་དང་མགྲོན་བདག་ལྷོ་ཀོ་རི་ཡའི་སྲིད་འཛིན་ལི་མཱང་སྦཀ་རྣམ་གཉིས་དབར་སང་ཉིན་རེས་གཟའ་ཕུར་བུའི་ཉིན་ཆེས་མཐོའི་ལྷན་འཛོམས་གནང་རྒྱུ་ཡིན་པ་དེ་ད་ལོ་ཕྱི་ཟླ་བཞི་པ་ནས་མཚམས་འཇོག་བྱུང་བའི་བྱང་ཀོ་རི་ཡའི་རྡུལ་ཕྲན་གོ་མཚོན་མེད་པ་བཟོ་རྒྱུའི་རྒྱལ་ཁབ་དྲུག་གི་ལྷན་ཚོགས་ནང་ཀོ་རི་ཡ་བྱང་མ་བསྐྱར་དུ་འཛུལ་བཞུགས་བྱེད་དུ་འཇུག་ཐབས་ཀྱི་འབད་བརྩོན་སྐོར་བཀའ་མོལ་གཙོ་བོ་གནང་རྒྱུ་ཡིན་པ་རེད།

དེ་དང་ཆབས་ཅིག་ཨཕ་ག་ནི་སི་ཐན་ནང་རོགས་སྐྱོབ་ཀྱི་ལས་དོན་གཞི་རྒྱ་ཆེ་རུ་གཏོང་ཕྱོགས་དང་ཡང་ཁུལ་དེའི་ནང་གི་རང་ཡུལ་གྱི་ལས་མི་ཚོར་སྲུང་སྐྱོབ་བྱ་རྒྱུའི་དོན་དུ་དཔུང་དམག་ཆེད་གཏོང་བྱ་ཕྱོགས་སྐོར་ལ་ལྷོ་ཀོ་རི་ཡས་ཐག་གཅོད་ག་རེ་གནང་ཡོད་མེད་སྐོར་དབུ་ཁྲིད་རྣམ་གཉིས་དབར་བཀའ་མོལ་གནང་སྲིད་པ་རེད།

འོན་ཀྱང་ལྷོ་ཀོ་རི་ཡའི་གཞུང་གིས་ཟླ་བ་ཉི་ཤུ་དགུ་མན་ཙམ་གྱི་གོང་ལ་བཞག་པའི་ཚོང་དོན་ཁྲལ་ཆག་གི་མཐུན་གྲོས་བཞག་གནང་ཡོད་པ་དེ་ལག་བསྟར་བྱ་རྒྱུ་ཨ་རིའི་ཕྱོགས་ནས་འགོར་གཞི་ཆེན་པོ་ཡོང་བཞིན་ཡོད་པར་བློ་འཚབ་གནང་གི་ཡོད་པ་རེད།

ཨ་རིའི་སྲིད་འཛིན་ཁུལ་དེར་མ་ཕེབས་གོང་ནས་ལྷོ་ཀོ་རི་ཡའི་སྲིད་འཛིན་ལི་མཆོག་གི་མགྲིན་ཚབ་པས་ཨ་རིའི་སྲིད་འཛིན་ཨོ་སྦ་མ་མཆོག་མཐུན་གྲོས་ཐད་བཞེངས་ཕྱོགས་བརྟན་པོ་ཞིག་འཛིན་གནང་བའི་རེ་བ་ཡོད་ལ་ དེ་དག་དོན་འཁྱོལ་ཡོང་ཐབས་སུ་འབད་བརྩོན་བྱེད་བཞིན་ཡོད་ཅེས་འགྲེལ་བརྗོད་གནང་ཡོད་པ་རེད།