བྱང་ཀོ་རི་ཡའི་རྒྱལ་བཙུགས་དུས་ཆེན་སྲུང་བརྩི་ཞུས་ཡོད་པ་རེད།

༄༅༎གཟའ་མིག་དམར་ཉིན་བྱང་ཀོ་རི་ཡའི་ཡུལ་གྲུ་འདི་གསར་བཙུགས་བྱས་སྟེ་ལོ་ངོ་དྲུག་བཅུ་འཁོར་བའི་དུས་ཆེན་སྲུང་བརྩི་ཞུས་ཡོད་ཅིང་ རྒྱལ་སྤྱིའི་ཐོག་ནས་བྱང་ཀོ་རི་ཡའི་སྲིད་གཞུང་གིས་རྡུལ་ཕྲན་ལས་རིགས་མེད་པ་བཟོ་རྒྱུའི་ཁས་ལེན་བྱས་པ་དེ་དག་རྩ་འཛིན་བྱེད་མིན་ཐད་དོགས་པ་ཆེན་པོ་བྱེད་བཞིན་ཡོད་ལ་ དེ་བཞིན་བྱང་ཀོ་རི་ཡའི་འགོ་འཁྲིད་ཀྱི་གཟུགས་གཞིའི་གནས་བབ་བཟང་པོ་མེད་པའི་གནས་ཚུལ་ཞིག་ཡོངས་ཁྱབ་ཡོད་པ་དང་ ཟ་འབྲུའི་དཀའ་ངལ་ཇེ་ཆེར་འགྲོ་བཞིན་པའི་གནས་ཚུལ་མུ་མཐུད་ཐོན་བཞིན་ཡོད་པ་རེད་

གཟའ་མིག་དམར་ཉིན་གྱི་དུས་ཆེན་སྲུང་བརྩི་ཞུ་བའི་མཛད་རིམ་གྱི་ཁོངས་ནས་ གལ་འགངས་ཆེ་ཤོས་དེ་དམག་སྟོབས་ངོམས་རྒྱུའི་དམག་མིའི་རུ་སྒྲིག་དེ་ཡིན་ཞིང་ དཔུང་དམག་འབོར་ཆེན་ཞིག་ནས་བྱང་ཀོ་རི་ཡའི་རྒྱལ་ས་ པིཡོང་ཡེང་གི་ལམ་ཆེན་བརྒྱུད་རྒྱལ་ཁབ་དེ་འཛུགས་མཁན་ཀིམ་ཨིལ་སུང་གི་དྲན་རྟེན་ཐང་ཆེན་བར་དམག་བསྟར་རུ་བསྒྲིགས་བྱ་རྒྱུ་ཡིན་པ་རེད་ ཡིན་ན་ཡང་ཕྱི་ཕྱོགས་ནས་བྱང་ཀོ་རི་ཡའི་ད་ལྟའི་འགོ་འཁྲིད་ཀིམ་ཇོང་ཨིལ་རྒྱལ་ཁབ་གསར་བཙུགས་ཀྱི་དུས་ཆེན་མཛད་སྒོ་དེའི་ཐོག་མཉམ་ཞུགས་གནང་མིན་ཐད་དོ་སྣང་གཙོ་བོ་བྱེད་རྒྱུ་ཡིན་ཞིང་ ཀིམ་ཇོང་ཨིལ་ཕྱི་ཟླ་བརྒྱད་པའི་ཟླ་དཀྱིལ་ཙམ་ནས་མང་ཚོགས་ཀྱི་ཁྲོད་ཐོན་པའི་གནས་ཚུལ་རྩ་བན་ནས་གོ་རྒྱུ་མེད་པ་དང་ ཁོ་པ་གཟུགས་གཞི་བདེ་མིན་གྱི་གནས་ཚུལ་ཞིག་ཁྱབ་ཡོད་པ་རེད་

ལྷོ་ཀོ་རི་ཡའི་གསར་འགྱུར་བརྒྱུད་ལམ་ཁག་གིས་ ལོ་ན་༦༦ལ་སླེབས་པ་ ཀིམ་ཇོང་ཨོལ་གྱི་གཟུགས་གཞིའི་གནས་བབ་ཇེ་སྡུག་ཏུ་ཕྱིན་ཡོད་པའི་གནས་ཚུལ་བཀོད་སྤེལ་ཤུགས་ཆེ་བྱས་ཡོད་པ་དང་ དེ་སྔོན་ཀོ་རི་ཡ་ལྷོ་མའི་གསང་ལས་སྡེ་ཚན་གྱིས་ ཀིམ་ཇོང་ཨིལ་ལ་སྙིང་དང་ གཅིན་སྙིའི་ན་ཚ་ཡོད་ལུགས་བརྗོད་ཡོད་པ་རེད་ འོན་ཀྱང་ཀིམ་རང་ཉིད་ནས་གནས་ཚུལ་དེ་དག་བདེན་པ་མིན་ལུགས་གསལ་བཤད་བྱས་ཡོད་པ་རེད།